حرشة بالكوك

السلام عليكم ورحمة الله وبركاته

وصفتي لليوم ساهلة ماهلة و بسيييييطة جدا

ان شاء الله تابع لسلسلة وصفاتي للحرشة
هاد المرة ماشي معمرة انما معجونة بالكوك

وكيف واعدتكم هادي طريقة اخرى للحرشة
او بالاحرى طريقة عجن و تقديم اخرى للتنويع
و كتجي لـذيــــــــــذة:
حرشة بالكوك

نخليكم مع المقادير والطريقة

المقادير:

400غرام سميدة الحرشة

400غرام سميدة الحرشة
100 غرام كوك /المحكوك طبعا
ملعقة صغيرة ملح،
2 ملعقة كبيرة سكر

رأس ملعقة خميرة الخبز،

روح الڤانيلا غبرة

قطرات من روح الكوك ان توفر

خميرة حلوى ،

فنجان حليب بودرة

فنجان زيت
1/4 لتر ماء / كاس ديال عنبة
لو توفر عندك حليب الكوك يكون افضل بدل الماء

الطريقة :

في إناء نخلطو المقادير الناشفة بالتتابع

كيف مبين فالصور

400 غرام سميدة الحرشة
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ روح الڤانيلا غبرة
+فنجان حليب

نخلطو كلشي النواشف مزايان و نضيفو الزيت

و نفتلوها

كيف تانفتلو الكسكس او البات بريزي حتا تشرب الزيت

ثم نضيفو 100 غرام كوك

و نفتلوه مع العجين حتى يتجانس مزيان

ثم نضيفو4/1 لتر ماء أو حليب الكوك لو توفر عندك

ونعجنو السميد

و نضيفو ليه ايضا قطرات من روح الكوك

ونخلطو مزيان حتا نحصلو على خليط رخو

و متماسك فنفس الوقت

كيف كيبان فالصورة

(ممكن إضافة الماء اكثر حسب جودة الدقيق المستعمل)

و نخليوها ترتاح شوية

و تتشرب
و نبداو فتكويرها

قسمت العجين الى كويرات بقياس المشمشة الكبيرة

و مرمدتها فالسميدة من كل الجهات

و نڭرصوها كيف مبين فالصورة

نسخنو المقلة (مقلة وجدة الثقيلة افضل

و نبداو نطيبو الحريشات ديالنا

على نار مهيلة

حتى يتحمرو و يطيبو على خاطرهم

و يكتاسبو لون ذهبي محمر

التقديم :

نقدموها سخونة او باردة

كتجي لذيذة و كتحسي بالكوك لما كتاكليها

بالصحة و الراحة

اتمنى تجربوها و تكون طريقة جديدة لتقديم الحرشة

ملاحظة :

الحرشة قابلة للتجميد سواء ا كانت عادية او محشية

يعني ممكن تعملوها بكمية كبيرة و تحشيوها بحشوات متنوعة مالحة و حلوة
و تحفظوها فالفريزر او المجمد لحيت تحتاجوها
خصوصا و شهر رمضان الفضيل على الابواب و كنبغيو نوجدو شهيوات خفيفة مسبقا
باش يبقى لينا وقت للعبادات فالشهر الابرك

لما تبغيو تقدموها جبدوها و خليوها ديكونجلا على خاطرها

و سخنوها اما فالفرن مسبق التسخين او فمقلة وجدة الثقيلة
و قدموها بالصحة و الراحة بحالا عاد وجدتوها

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

طريقتي في تنظيف و تقطيع الدجاج بالصور

السلام عليكم ورحمة الله وبركاته

طبعا كلكم كتعرفو تنقيو الدجاج و تغسلوه و تقطعوه
لكن مفيها باس نشاركم بطريقتي البسيطة

الطريقة:

سمحو لي مصورتش الدجاجة لما كانت كتغسل هههه
حيت يديا بزوج مشغولين
و لپاراي ديالي مبغاتش تقرب للدجاج
خافت تشبق فيها ريحة الزفورة هههه

اولا كنغسل الدجاجة و نحيد منها الاحشاء ديالها
(الكبد، القانصة،القلب...)
و كنقيهم و نغسلهم و نحطهم على جنب

و بعدها كنعاود نقي الدجاجة
بمعنى كنحايد اي زائد ريش او جلد الارجل و مننساوش القرجوطة داك العرق او الوريد للي كيكون اسفل العنق لابد نحيدوه

و كنغسل الدجاجة ديالي باش تحيد منها كل الزوائد و الزفورة
و لهاذ الغرض كنغسلها بالماء و الملح و الخل او الحامض
و نفركها مزيان بالملحة الغليضة
من الداخل و من الخارج
باش يتحد منها كل الشوائب و ايضا كينقصو الدهون

و كنخليها تترقد فإناء ماء فيه الخل و الحامض

و بعدها كنشللها مزينا

و كنخليها تتقطر

إلى بغيرت نعمرها او نقدما كاملة راه كنخيها كيف هي
اما كنشرملها(و احسن تتشرمل باش تجي اكثر بنة فالطياب)
ونديرها فبلاستيكة غذائية و ندخلها للثلاجة الى كنت عنطيبها فنفس اليوم او فاليوم الموالي
أو كنديرها فالكونجيلاتو مباشرة لحين نحتاجها

اما الى بغيتها طراف فكنشدها نقطعها ،
انا كنبغي نقطعها كل طرف بوحدو باين يعني الى 9 اطراف :

العنق مع الظهر،
و 2 جنيوحات،
و السدر مقسوم الى قسمين ،
و اعلى الفخص 2 طراف
و 2 فخاض
يعني 9 فالمجموع

بعد مكنقسم دجاجتي كنخليها تقطر و ترتاح
و بعدها كنعزل كل طرف بوحدو فميكات غذائية
باش يجيني سهل ملي نجبدو

حتى الطريفات ممكن نشرملهم باي شرمولة بغيت
باش يكونو اكثر بنة ثم نديرهم فالثلاجة او الكونجيلاتور
لحيت نحتاجهم

هادي طريقتي البسيطة فتنظيف و تقطيع الدجاج
باش كيجيني سهل فالطبخ و فالتقسيم
او حتى فالحفظ فالكونجيلاتور
ان شاء الله تفيدكم

و نتمنى متبخلو عليا بدعواتكم الطيبة
لاني فأمس الحاجة ليها

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

معقودة بطريقتي

السلام عليكم

اغلبنا عزيزة علينا المعقودة

صغار او كبار

و هادي وحدة من الطرق باش كنديرها
كتجي رائعة متشبعوش منها
: (شكون شكار العروسة )

المقادير :

بطاطة مقشرة مبخرة او مسلوقة
ضرس صغير ثوم
ربيع مشلض غليض

فرماج احمر محكوك

موزريلا محكوكة

ملعقة صغيرة كامون
راس ملعقة صغيرة ابزار
ملح
ملعقة صغيرة زبدة
بيضة
رشة ملون بنكهة الزعفران

الطريقة:

بعد متبخر البطاطة كنقيوها و نحكوها فالحكاكة
و كنحكو ايضا الفرماج الاحمر و الموزريلا
و نديرو الكل فإناء

و كنضيفو ضرس صغير من الثوم المدقوق
و الملح و الكامون و الابزار و الزعفران الملون و الزبدة و الربيع

و نخلطو كل المكونات حتى تتمازج باطراف الاصابع بلا منعجنوها
غير نخلطوها مزيان

و نبداو نديرو كويرات متساوية الحجم و نڭرصوها فكف اليد المبلل بالماء

و نستفوها فالمقلات الاكتيفراي

مضفتش ملعقة الزيت
لان المعقودة فيها الزبدة و الفرماج و البيض غيتحمرو بوحدهم بدون زيت
(طبعا للي غديرها فمقلات عادية متكثرش الزيت باش ميضيعش طعم الفرماج
و ممكن تعمل فمول و تدخل للفرن تتحمر حتى هكا كتجي لذيذة )

و نخليوها تتحمر

و تكتاسب اللون الذهبي الشهي

التقديم :

و هاهي واجدة بالصحة و الراحة

كتجي مقرمشة من برا و فالداخل كيجي الفرماج و الموزريلا ديبين

لذيــذة

ان شاء الله تجربوها و تنال اعجابكم

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

العصيدة

السلام عليكم
ان شاء الله تكونو بخير

طبق العصيدة طبعا كتعرفوه ساهل ماهل
و في اقل من 10 دقائق كيوجد
(حسب نوع السميد المستعمل و حسب ان كان مرطب من قبل او لا )


مغذي و صحي بزاف و شخصيا كيعجني
زمان كان طبق رئيسي فالطابلة المغربية
لكن اليوم قليل للي كيقدمو للاسف هملناه
ممكن متكونوش كتصنفوه كطبق رئيسي
لكن بالنسبة لي هو طبق اساسي و رئيسي و كيشبــــاع و كيليق لكل الاوقات







هاد الصباح مكانش عندي الخبز فالدار للفطور
فوجدت العصيدة البلدية بزيت ارڭان و فطرنا بيها فالحين
ممكن توجدوه فالعشاء او الفطور او كاسكروط لما مكيكونش عندكم متحطو
او كيدير الجوع شرع يديه هههه و كتكونو مزروبات
اوى بلا منزيد عليكم البلا بلا كيف العادة (الطبع يغلب التطبع ههه)
نخليكم مع المقادير و الطريقة

المقادير :

بلبولة الشعير
ملح
ماء
زيت ارڭان او زبدة او زيت زيتون حسب المتوفر

الطريقة :

ولـــــى اسهل

ممكن ترطبوها من قبل لتسريع عملية الطبخ




فكسرونة كنعملو البلبولة مع ضعفين حجمها من الماء




يعني لو عملتو كاس بلبولة زيدو عليها 2 كيسان ماء
مع الملح (القياس للي كيعجبكم)
انا كتعجبني ناقصة ملح باش نحس بالحلاوة ديال الشعير مع زيت ارڭان





كتعملو الكسرونة فوق عافية متوسطة و تحركو مرة مرة




لما تتشرب البلبولة كل الماء و تطيب نحركوها مزينا و نطفيو عليها

التقديم :

و نقدموها سخونة فطبق التقديم مع اي إدام عندكم
انا قدمتها مع زيت ارڭان و بريريد ديال اتاي منعنع




و بالصحة و الراحة




قولو بسم الله





ملاحظة :

ممكن تعملو العصيدة بعدة انواع من الحبوب شعير ذرة قمح ...
حسب المتوفر
و كلها كتجي لذيذة و كتعمل بنفس الطريقة




كاين بعض النواحي فالجنوب كيقدموها باملو و العسل
و كتدار بحال سيكوك مع اللبن
و كاين للي كيسقيها بالسمن او زيت العود او الزبدة بلدية

و فبلادنا هي الطبق الاول للي كيعملو فراس السنة الهجرية
كيوجدوها و يسقيوها بارڭان و العسل
و يخبيو فيها (لوزة، فنيدة، ڭرڭاعة، حمصة كاكاوة ،ارڭانة.....)
و انت كتاكل لما كتلقى شي من الاشياء للي مخبية فيها
كيكون فاتحة العام الهجري هههه
غير تقليد و شي كيفرح لوليدات الصغار و كيزرع البسمة فالكبار

اللهم ادمها نعمة و بارك لنا فيها و اكتب لي بها حسنة ترضاها و اجعل فيها الصحة و العافية

الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
اختكم أمنــار
أم ريـَّــان

وعليكم السلام ورحمة الله وبركاته

الصوصيص بخيزو

السلام عليكم ورحمة الله وبركاته

هادا كان عشنا البارح

ساهل فالتحضير لكن المذاق كيجي لذيــذ

نخليكم مع المقادير و الطريقة

المقادير:

صوصيص

خيزو مبخر او مسلوق و مقطع صبيعات صغار
قزبر و معدنوس مشلضين
ضرس ثوم محكوك
ملح
ابزار
كامون
تحميرة

الطريقة:

كنقي خيزو و نقطو صبيعات

و نديرو يتبخر

كنفضلو مبخر باش يبقى محافظ على طعمو و مكوناتو الغذائية

لما كيطيب خيزو

كندير الصوصيص يتشحر ف 2 كيسان كبار ديال الماء

بدون زيت

كينخليه يطلق الزيت ديالو بلا منزيد ليدام

لما كيطيب الصوصيص و كتكون الصوص ديالو عقدات

كنضيف ليه باقي المقادير

خيزو + القزبر و المعدنوس+ الثوم المحكوك

+ الملح و الكامون و التحميرة و الابزار

و نحرك الكل و نخليهم يتشحرو شوية حتى تعقد المرقة او الصوص مزيان

و يتشرب خيزو البنة ديال التوابل

التقديم :

و كنقدمو سخون مع الخبز

و بالصحة والراحة

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته