بحث هذه المدونة الإلكترونية

الأحد، 14 يونيو، 2009

عصير المشماش و التفاح المثلج








السلام عليكم ورحمة الله وبركاتة




ان شاء الله تكونو كلكم بالف خير







هذا عصير ساهل مبرد و بسيط بفواكه الموسم





تبردو مع هاد الصهد
















المقادير:





مشماش
تفاح
لتر حليب
انا استعملت لتر الا ربع ماء المثلج مع كاس كبير بودرة الحليب (نيدو)
و فنجان من مكعبات ثلج
سكر حسب الذوق

الكميات حسب عدد الاشخاص
نفس قياس التفاح نفس قياس المشماش نفس قياس الماء او الحليب
مثلا الى درتو رابعة ديرو رابعة من كلشي المقادير بنفس الكمية
باش يجيكم العصير متجانس و سميك نوعا ما ماشي غير ماء جاري
















الطريقة:

اولا كنغسلو الفوكه ديالنا و نقيوها مزيان







بعدها كناخذو المشماش و كنعملوه مع نصف كمية الماء و كنضيفو عليه السكر حسب الذوق و كنديروه فكاسرونة و نديروه يسخن شوية 4 او 5 دقائق،




باش يعطينا السيرو ديالو و كيجي رطب و الذ فالعصير
كنخليوه يبرد



ثم فالخلاط كنديرو مكعبات الثلج مع التفاح و المشماش
بهاذ الترتيب من القاصح للين













ثم كنطحنوه











حتى كيتجانسو و كنضيفو قياس الماء الكافي باش يعطينا عصير ثقيل و قوامو عاقد


و نقدموه مباشرة بالصحة و الراحة












التقديم:




قدمتو مزين بترونشات مشماش،




هو عصير ساهل سريع و مغذي و منعش فنفس الوقت





و ممكن تعوضو التفاح و المشماش باي فاكهة متوفرة عندكم







و بالصحة و الراحة










اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

الأربعاء، 10 يونيو، 2009

البڭري باللوبية الخضراء



السلام عليكم ورحمة الله وبركاته





هاد الشهيوة معروفة




و كنظن كلشي كيعرف ينصب اللوبية خضراء




و هذا وقتها لله الحمد

لكن مافيها باس نوريكم طريقتي







المقادير:





حسب عدد الاشخاص

لوبية خضراء طرية




(من الافضل تختارووها صغيرة و طرية باش متكونش كلها لياف و خيوط)



لحم بقري مقطع (اي جزء كتفضلو انا عملت الفخض)



بصلة كبيرة مشلضة



معدنوس
ضرس كبير ثوم
ملعقة صغيرة ملح
ملعقة صغيرة كامون
نصف ملعقة صغيرة سكنجبير
نصف ملعقة صغيرة خرقوم
نصف ملعقة صغيرة راس الحانوت
ملعقة كبيرة زيت الزيتون
زيتون
بودرة تنسيمة البڭري ( اختيارية)
حامض مرقد



ماء للنصب










الطريقة :

اولا كنقيو اللوبية بالطريقة المعروفة
اي اننا نحيدو ليها الخيوط الو الألياف الجانبية و كنقطعوه لصبيعات

و بعدها كنرقدوها فالماء معصور فيه حامضة
و من الافضل نخليوها فذاك الماء مدة فالثلاجة مثلا ساعة
حتى يتحيد منها التراب و الرواسب
و فنفس الوقت الحامض كيقتل الطفيليات
و كيحافظ على لون اللوبية باش ميتاكسد و يولي لونوها بني بدل الاخضر لما طيب

بعدها كنصفيوها و نعاودو نشللوها بالماء

و نبداو فتحضير الطبق





فالكوكوط كنديرو اللحم و البصلة المشلظة



مع التوابل : ملعقة صغيرة ملح + ملعقة صغيرة كامون
+ نصف ملعقة صغيرة سكنجبير + نصف ملعقة صغيرة خرقوم
+ نصف ملعقة صغيرة راس الحانوت + ملعقة كبيرة زيت الزيتون



كنخليو الكل يتشحر مع ملعقة ماء باش متحرقش لينا التوابل او العطرية




بعد متتشحر اللحم و البصلة كنضيف ليها اللوبية للي قطرت من الماء



مع الثوم و ملعقة صغيرة بودرة تنسيمة البڭري




(كتعطي طعم مميز لان اللوبية اصلا فيها طعم حلاوة و طبعا ليكم الحرية فاضافتها او لا )







و كنضيف قياس الماء الكافي فاش غيطيب الكل



و كنسد الكوكوط حتى يطيب كلشي




بعد متكون اللحم و اللوبية طابو




كنضيف الزيتون و المعدنوس مشلض رقيق



و الحامض المرقد






و كنسد عليهم واحد 2 دقائق فوق نار مهيلة
و نخلي المرقة تتبخر شوية باش تجي واقفة و ثقيلة










التقديم :







و بعدها كنقدم الكل فطاجين او طبق التقديم







كنستف اللحم اولا



ثم اللوبية ثم الزيتون و الحامض المرقد







و بالصحة و الراحة









ملاحظة:

الى كانت اللحم كبيرة ماشي فتية غيخصكم تطيبوها نصف طيبة
عاد تضيفو اللوبية باش متهراش مع طياب اللحم

و طبعا ممكن تنقيو اللوبية و تنظفوها بالطريقة للي ذكرت الماء و عصير الحامض
و لو كنتو عتحفظوها فالثلاجة قبل الطبخ قطروها من خليط الماء و الحامض
و ديروها فميكات بلا متشللوها باش تبقى محافظ على لونوهافالثلاجة لحين وقت الطبخ




ان شاء الله تعجبكم طريقتي و تفيدكم





اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

وصفات مشابهة

 
Paperblog