الڭلية بالشكلاط الابيض و القرفة

السلام عليكم ورحمة الله وبركاته


سنة سعيدة
الله يدخلها عليكم بالخيرات و البركات و بالصحة و الهنا و بكل متمنيتو ان شاء الله
واخا جات التهنئة معطلة كالعادة

نتمنى تكونو كلكم باحسن حال


كيف واعدتكم من مدة فموضوع الڭلية
هاذي واحدة من الطرق باش ممكن تنوعو فتقديم الڭلية او الذرة مقلي

ان شاء الله تكون اضافة جديدة و مفيدة
خصوصا للوليدات الصغار (وحتى الكبار كلشي عزيزة عليه الڭلية ) باش ينوعو فاكل البيت






بلا منزيد نطول عليكم هاذي ڭلية عادية
لكن المغاير فيها هو اني كنظيف عليها نوع من الڭلاصاج بالشكلاطة البيضاء و القرفة
او ممكن تعوضو بللي متوفر عندكم (ڭلاصاج عادي بالسكر + اي نكهة كتفضلو )

نخليكم مع المقادير و الطريقة:


المقادير :

ذرة يابس
ملح
زيت

الكميات كتبقى حسب عدد الاشخاص:

لكل كاس ذرة
كنعملو 2 معالق كبيرة زيت
و رشة ملح حسب الذوق

للڭلاصاج :








100 غرام شكلاطة بيضاء



4 معالق ماء

قرفة






الطريقة:




اولا نقيو الذرة نغسلوها و نشفوها مزيان
(بعد المرات كتكون فيها شوائب و غبار )






ناخذو كاسرولة ،طنجرة او كوكوط تكون ثقيلة القاع
باش تتوزع فيها الحرارة بشكل متساوي و متحرقش لينا الڭلية




كنعملو اولا الزيت تسخن على عافية متوسطة
غير تبان لينا الزيت بدات تغلي




كنلوحو فيها حبوب الذرة و نحركوها مزيان باش كلها تتزيت
لو كانت الزيت زايدة ممكن تصفيوها


و نعملو فوقها غطاء
من الافضل يكون مثقب بحال الكسكاس باش يخلي الهواء يتبخر
و نخليوها تطيب على عافية مهيييييلة


و فنفس الوقت نعملو الشكلاطة

مع الماء فكسرولة فحمام مريم حتى الذوب الشكلاطة على نار هادئة





و طبعا بعد مدة غنبداو نسمعو الفرقعات ديال الذرة

لما كيطيب كلها و ميبقاش صوت الفرقعة





نرشوها بالملح حسب الذوق و هي باقي سخونة

و نظيفوها للشكلاطة





و نرشوها بالقرفة (القياس للي كنفضلو شخصيا انا من محبي القرفة لذلك كنكثرها)






و نحركو الكل باش تتجانس



و تتشبع حبات الڭلية بالشكلاطة و القرفة

و هاهي جاهزة


التقديم:




ممكن نقدموها كيف هي دافية او باردة فطبق التقديم




او ممكن نشكلو بيها حلى بحال النوڭا مستطيلة او باي اشكال كنفضلو و هي باقي سخونة باش تاخذ الشكل للي بغينا بعد متبرد
و نقدموها لاطفالنا

بالصحة و الراحة
و بإذن الله انا عند وعدي نزيدكم وصفات ديال الڭلية بالذرة لتقديمها بطرق و نكهات و اشكال متنوعة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته








  

الڭلية ديال القمح

السلام عليكم و رحمة الله



وصفة اليوم ان شاء الله ساهلة بزآآاف و كتعجب الكبار و الصغار



هي الڭلية ديال القمح








هي صحية بزاف و مفيها لا دهنيات لا اضافات و سهلة جدا و منافعها كثيرة
ان شاء الله نكون وفقت فالشرح
للعلم الطريقة خذيتها من اماما الله يحفظها و ينولني رضاها دنيا و اخرة
مع بعض الاضافات من عندي باش نسهل عليا التحضير (العڭز و ميدير ههه)


المقادير ولا ابسط و لا اسهل :



قمح حبوب كاملة
ماء


ملح او بدون ملح حسب الذوق








الطريقة :




اولا طبعا ناخذو حبوب القمح نقيوها و نغسلوها مزيان




من بقايا الاتربة حتى يتنقى و ميبقاوش فيه شوائب كيف مبين فالصور



بعدها شدي القمح حبوب صاينين (يعني كاملين)



بيتيه فشوية الماء مملح او غير مملح غير قياس الماء للي يشرب القمح
و الصباح غتلقايه شرب داك الماء و تنفخ و كبار فالحجم ،



خوذي مقلة (مقلة وجدة الثقيلة) او مقلة طين او اي مقلة عندك



ديري فيها داك القمح الى بغيتي ممكن تملحيه حسب ذوقك لو معملتيش ليه الملح فماء الترقاد ، او ممكن تخليه مسوس دون ملح حتى مسوس كيجي لذيذ لان القمح فالاصل طعمو حلو




و على نار مهيييييلة بقاي تديه و تجيبيه



دون التوقف عن التحريك



غيبدا ينشف من الماء و يتغير لونو و حتى حجمو يبدا يزيد اكثر


استمري فعملية التحريك على نار مهيــــلة حتى يتڭلى و تتفرڭع الحبات ،


طفي عليه و خليه يبرد و ديريه فشي بواط محكمة الاغلاق باش يبقى مڭرمل و مقرمش



و هنا صور كتبين الحبة ديال القمح


كيف كانت فالاصل و كيف كبرات و ولات بعد الترقاد و الڭلي


حاولت نصورها قريبة باش تبان ليكم قداش كتولي الحبة




تقريبا كيتضاعف حجمها 3 مرات




التقديم :

ممكن يتقدم فاي وقت







فالڭوتي او مع كويس اتاي او قهوة او كڭرينيوتاج




و ممكن تاكلي منو وقتما بغيتي لان حبوب القمح عموما صحية و القمح مڭلي كينفع المعدة بزاف و كيعاون على الجير او كيف كنقولو الحرقة


و بالصحة و الراحة

ان شاء الله تكون الطريقة واضحة و تجربوه و تردو عليا خبر لو كنتو من محبات القمشة و الحبوب الكاملة


ملاحظة :

نفس الطريقة ممكن تعملو بيها حبوب الشعير او حبوب الخرطال او حبوب الفارينة او غيرها من الحبوب


اللهم ادمها نعمة و بارك لنا فيها و اكتب لي بها حسنة ترضاها و اجعل فيها الصحة و العافية

الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان

وعليكم السلام ورحمة الله وبركاته

الپوتايتوس بعطرية الكفتة

السلام عليكم ورحمة الله وبركاته










اليوم عنقدم ليكم پوتايتوس بنكهة جديدة
بخلطة توابل مغربية اصيلة
ساهلة و لذيذة و مقرمشة




الپوتايتوس بعطرية الكفتة











المقادير :




1 كيلوغرام بطاطة ( حبذا تكون صفراء باحجام متقاربة)




1 ملعقة كبيرة عطرية الكفتة (سكنجبير والكمون والقرفة ، والتحميرة الحلوة ، و القزبرة حبوب و بسيبيسة... مطحونين) ممكن تشريوها جاهزة كتتباع واجدة
ملح
ملعقة كبرة زيت









الطريقة:



كنديرو الماء يغلي


طبعا كنغسلو البطاطة مزيان
و نختارو النوع الاصفر للي قشرتو رقيقة
لان معروف ان الپوتايتس هي البطاطة للي كتقلى بالقشرة ديالها يعني مكتنقاش

و لما يوصل درجة الفوران يعني يطبخ مزيان
كنلوحو فيه البطاطة تسلق بين 2 دقائق لا اكثر





نقطروها من الماء و كنقطعوها على 4 او على 6 اقسام
باش تعطينا ما يشبه الاصابع متساوية الأحجام




نملحوها على ذوقنا
و نضيفو ليها عطرية الكفتة
و نضيفو ليها الزيت (انا عملتها فالاكتيفراي يعني مع ملعقة زيت)
لو بغيتو ممكن تعملوها فالفرن نفس النتيجة و نفس كمية الزيت غير ملعقة تكفي
نخليوها تقلى حتى تتحمر
و دير قشرة محمرة و مقرمشة
كيف كتبين الصور














التقديم:





نقدمها سخونة او دافية




كمرفق لطبق رئيسي او كمقبلات
او نخضر بيها فوق اللحم او الدجاج
او نقدما للاطفال للي عزيزة عليهم البطاطة المقلية



كيف شفتو ساهلة سريعة و لذيذة بإذن الله لما تجربوها تردو عليا خبر







اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

الپوتايتوس مكعبات بزيت الزنجلان

السلام عليكم ورحمة الله وبركاته

اليوم عنقدم ليكم مكعبات پوتايتوس بزيت الزنجلان






ساهلة و لذيذة و مقرمشة

المقادير :




بطاطة
زيت الزنجلان






ملح

الطريقة:

طبعا كنغسلو البطاطة مزيان
و نختارو النوع للي قشرتو رقيقة
لان معروف ان الپوتايتس هي البطاطة للي كتقلى بالقشرة ديالها يعني مكتنقاش




كنديرو الماء يغلي
و لما يوصل درجة الفوران يعني يطبخ مزيان
كنلوحو فيه البطاطة تسلق نصف سلقة بين 3 الى 5 دقائق لا اكثر






بعد متسلق البطاطة نصف سلقة





كنقطعوها مكعبات




نملحوها على ذوقنا





و نضيفو ليها زيت الزنجلان





(انا عملتها فالاكتيفراي يعني مع ملعقة زيت)





لو بغيتو ممكن تعملوها فالفرن نفس النتيجة و نفس كمية الزيت غير ملعقة تكفي

نخليوها تقلى حتى تتحمر

و دير قشرة محمرة و مقرمشة
كيف كتبين الصور

التقديم:

نقدمها سخونة او دافية

كمرفق لطبق رئيسي او كمقبلات

او نخضر بيها فوق اللحم او الدجاج

او نقدما للاطفال للي عزيزة عليهم البطاطة المقلية

كيف شفتو

ساهلة سريعة و لذيذة بإذن الله
و كتغيير عن الزيت المائدة جربو زيت الزنجلان
طعم مميز اكثر و صحي اكثر

لما تجربوها تردو عليا خبر

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته