بحث هذه المدونة الإلكترونية

جارٍ التحميل...

الاثنين، 6 أكتوبر، 2008

طجين سريع و خفيف الكفتة بالجلبانة






السلام عليكم ورحمة الله وبركاته







اليوم غنقدم ليكم هاد الطويجين



سريع التحضير و خفيف
طبعا كلكم كتعرفو ليه لانه سهل و بسيط
كنوجدو خصوصا فالعشا لما كنكون مزروبة او معندي ڭانة ههههه
و ايضا كيعتق لو جا شي حد للعشا فآخر لحظة بلا ميعلمكم


نخليكم مع المقادير و الطريقة











المقادير :





حسب عدد الاشخاص طبعا





جلبانة
كفتة
بصلة
مطيشة
ربيع
ملعقة مطيشة الحك
ملح
ابزار
كامون
تحميرة
خرقوم
سكنجبير
زيت












الطريقة:

كنشلضو البصلة و نديروها تتشحر مع الزيت




ثم كنصيفو كرات الكفتة المتبلة مسبقا كنشحروها




و نضيفو باقي التوابل : ملح +ابزار +كامون
خرقوم+تحميرة + سكنجبير



و نشحرو الكل مزيان مع اضافة شوية ديال الماء باش متحرقش التوابل



بعدها كنضيفو الجلبانة



انا استعملت جلبانة مجمدة لذلك مضفتش الماء لانها طلقات ماها فالطاجين



و كنضيف ملعقة مطيشة الحك مطلوقة فنصف كاس ماء و نحرك الكل






و كنضيف مطيشة مشلضة ولربيع



و نسد الطاجين و نخليه يطبخ حتى يوقف فالمرق











ا

لتقديم :


و هاهو واجد للتقديم




انا خليتو حتى تشرب كل المرق حيت كليناه غير بالملعقة بدون خبز
لكن طبعا لو غيتكال بالخبز لابد يكون المرق الكافي للتغماس : )









ملاحظة:

باش نسهل و نسرع توجاد هاد الطويجين


كيف شفتو فالصور الكفتة و الجلبانة محضرين و مكنجليين مسبقا
لما كتكون الجلبانة موجودة و رخيصة
كنشريها بكميات كبيرة كنقيها و نغسلها
و نحفظها فبلاستيكات فالكونجيلاتور
و كتبقى عندي طيلة العام
كتعتقني فالسلطات و فالتخضار للطويجنات و المرقة

و كذلك الكفتة كندير ليها التوابل والربيع
و كنكورها على القياس للي بغيت و نكونجليها
فكيسهال الطبخ من بعد خصوصا كيف قلت لو كنت مزروبة






اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال




الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





أمنــار





أم ريـَّــان


وعليكم السلام ورحمة الله وبركاته





‏ليست هناك تعليقات:

إرسال تعليق

وصفات مشابهة

 
Paperblog