بحث هذه المدونة الإلكترونية

الاثنين، 15 أغسطس، 2011

كويسات معمرين بالكفتة و الجبن




السلام عليكم الغزالات نهاركم مبارك

تقبل الله صيامكم و اعمالكم و ضاعف حسناتكم
وصفة اليوم بسيطة و سهلة و طبعا لذيذة



ان شاء الله تنال اعجابكم




و هي كويسات معمرين بالكفتة و الجبن




نخليكم مع المقادير و الطريقة








المقادير :

العجين:




عجين العشر دقائق المعروف او الپات فويتي او اي عجين كتفضلوه 

انا هنا استعملت عجينتي اللينة للمعجنات 






الحشوة :



350 غ كفتة



بصلة يبضاء كبيرة





ربيطة معدنوس



توابل الكفتة
 غ
100جبن بلدي او اي جبن او فرماج كتفضلو
الملح
الكامون
الزيت






الطريقة:



انا كانت عندي العجينة جاهزة مسبقا و مكونجليا


عجينتي اللينة للمعجنات





جبدتها ساعة قبل الاستعمال و خليتها ديكونجلا على خاطرها على جنب

(ملاحظة: لما كتكونجلا كتكون افضل و كيبانالفرق فالخبز)


شلضت البصلة و رديتها تتشحر مع الملح و الزيت و شوية الماء حتي دبلات



بعد مطابت البصله حيدتها من فوق النار
و زدت ليها التوابل ديال الكفتة الجاهزة و التحميرة و الكامون



و ضفت الكفتة و خلطت الكل مزيان حتى تشربات الكفتة البصلة و التوابل



و رديتها تتشحر و طيب



و خلطهم مع بعض
و شحرتهم حتى نشفو من المرق







ضفت المعدنوس مشلض و طفيت عليها






و خليت الحشوة تبرد على جنب
  و بديت فتجهيز العجين للي غنعمر




طلقت العجينة بالدلاك على سطح مرشوش بالدقيق



طلقتها رقيييقة اقل من 2 ميليميتر كيف كتشوفو فالصور



و قطعتها دوائر كبيرة

ممكن تقطعوها بزلافة كبيرة او اي قطاعة من الحجم الكبير

كناخذو مولات الحلوة اي نوع عندنا ديال لاطارط او الكيك
انا استعملت مولات صغيرة سيليكون ديال الكابكيك



الى استعملتو مولات اينوكس او غيرها دهنوها بالزبدة و رشوها بالدقيق باش ميلصقش ليكم العجين
اما السيليكو فمكيحتاج يتدهن





كيف مبين فالصور كناخذ دائرة العجين كنحطها فوق المول و ندخلها برفق و نجمع الجنبات على شكل تشناف




و هاهما كويساتنا واجدين للعمارة
فهاد الوقت كتكون العمارة بردات و جاهزة باش نحشيو بيها العجين




فكل كاس عجين كندير 2 معالق كبيرة كفتة




و كنضيف ليها ملعقة كبيرة ديال الجبن و نخلطو مع الكفتة



كندير المولات فطاوة الفرن فيها شوية الماء باش متنشفش لينا الكفتة

و كندخل الكويسات يطيبو على درجة حرارة 180 الى 200 c° حسب سخونية فرنكم






قبل ميكملو الطياب كنخرجهم و نزيد فيهم ملعقة كبيرة ديال الجبن فكل كاس بلا منخلطو مع الكفتة



و كندهن شنينفات كل كاس بشوية زبدة ندخلهم يتحمرو مزيان



و هاهما كويسات الكفتة واجدين للتقديم
كنخرج الكويسات من المول و نستفهم فطبق التقديم


التقديم:

قدموهم سخان او دافيين



بالصحة و الراحة




طبعا ممكن تنوعو فالعمارة حسب الذوق
فواكه البحر
حوت
لحم
دجاج
خضار
او حتى حشوات حلوة فواكه كريمات ....



كيجيو لذاذ و الى عندكم العجين جاهز راه مكياخدش تحضير العمارة وقت


ان شاء الله تكون وصفة مفيدة و سهلة


اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

ليست هناك تعليقات:

إرسال تعليق

وصفات مشابهة

 
Paperblog