الشوفلور مقلي فالاكتيفراي

السلام عليكم ورحمة الله وبركاته

انا من محبي الشوفلور خصوصا مقلي بالبيض
لكن طبعا لدواعي الرشاقة و حفاظا على لاطاي " مانكان " ;) ديالي هههههه
مكنكترش منو
و دابا مع الاكتيفراي وليت نزعم عليه بلا خوف من الزيت
(وليت نخاف غير من المصران و فعايل الشوفلور ههههه)

بلا كثرة بلا بلا كيف عادتي نخليكم من الطريقة البسيطة

المقادير :

راس شوفلورة
ملح
ابزار
كامون
ربيع
خل
بيضة
ملعقة صغيرة ممسوحة دقيق
ملعقة صغيرة زيت

الطريقة:

طبعا نقيت الشوفلور و قطعتو فروع و غسلتو مزيان و نشفتو و تبلتو بملعقة خل و رشة ملح و ابزار و كامون و الربيع مشلظ و درتو يتبخر فالڤابوروز او طنجرة التبخير

بعد مطابو زهرات الشوفلور وجدت خليط البيضة مطربة مع ملعقة صغيرة ممسوحة من الدقيق( باش تزيد التڭرميل)

بعد مبرد الشوفلور بديت نغطسو فخليط البيض

و نستفو فمقلاة الاكتيفراي
و نرشوه بمقدار ملعقة صغيرة زيت

و درتو يتحمر بين 10 الى 15 دقيقة

و هاهو وجد محمر و مڭرمل بلا ميتغمس الزيت

التقديم :

طبعا قدموه كيفما بغيتو اما تخضرو بيه شي طويجين محمر
او كسلطة او كمقبلات

انا قدمتو مع قليل من الصوص البيضاء (بطاطة مطحونة مع الثوم و القزبر حبوب و الابزار و رشة ملح و خل و الحليب)

بالصحة والراحة

من الاحسن بدل متسلقو الشوفلور انكم تبخروه ،
باش كتتفاداو الريحة تعطي فالدار
و فنفس الوقت كتحافظو على اكبر قدر من مكوناتو
بلا متضيع فماء السلق ،
و طبعا باش ميكحال كترشو عليه اما الحامض او الخل
باش يحافظ على لونو بعد الطياب

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

حليب و قهوة موس على طريقتي

السلام عليكم ورحمة الله وبركاته

وصفتي لليوم ساهلة ماهلة و بسيييييطة جدا

لكن ملي كتقدميها للاهل او للضياف كتعجبهم

حليب و قهوة موس

و هاكذا باش كنقدم الحليب و القهوة عادة
ان كان بالقهوة المطحونة او القهوة سريعة الذوبان
بزوج كيعطيو نفس النتيجة
مع اختلاف فالطعم طبعا حسب الماركات

نخليكم مع المقادير و الطريقة

المقادير:

كيف العادة المقادير حسب عدد الاشخاص

حليب( استعمل فاغلب الوقت حليب البودرة لاني كنتحكم فكثافتو )
قهوة ( اما مطحونة او سريعة الذوبان من اي نوع حسب المتوفر)
ماء مغلي لدرجة الفوران
سكر
شكلاطة للتزيين او التحلية بدل السكر

الكميات:

عادة كنقدمها فالماڭ او فكاس القهوة
يعني كيكون نصف الكمية قهوة و نصفها حليب لو بغيتها تجي نص نص
و لو بغيتها تكون قاصحة فثلثاي الكاس قهوة و ثلث حليب
و لو غيتها خفيفة فثلث الكاس قهوة و ثلثان حليب

انواع القهوة :

كل مرة حسب المتوفر
او حسب طلب زوجي لانه من محبي القهوة فكيبغي ينوع فالاذواق
اضافة الى انه كيبغي ديال الدار لذلك كيخصني ننوع فالتقديم و فالطعم و الكثافة
بدون منحتاج لعصارة او تقنيات صعبة
غير الطحان يفي بالغرض
كيف كتشوفو فالصور كل مرة كنستعمل نوع

انواع الحليب :

عادة كنستعمل الحليب بودرة

لانه هو للي متوفر عندي فالدار دائما

لو توفر عندي الحليب المركز المحلى

او غير المحلى

كنضيفو لحليب البودرة كنعمل منو قياس ملعقة كبيرة لكل كاس
كيعطي طعم مميز

ولو توفر عندي الحليب الطازج

كنفيضو كيف المعتاد
لكن بعد ميفيض كنضيف عليه الحليب البودرة
لكل كاس ملعقة كبيرة لانه كيعطي طعم مميز و موس ثقيلة

الطريقة:

كندير الماء يغلى

لو غندير القهوة المطحونة
فكنديرها فورق التصفية و نكب عليها الماء مغلي كيفور
و نخليها تتقطر

لو بغيتها قاصحة كنعمل 2 ملاعق عبار القهوة لكل كاس
و لو بغيتها مزبوطة على قولت المصريين كنعمل ملعقة واحدة
و لو بغيتها خفيفة فنصف ملعقة
(بالملعقة كنعني الملعقة الخاصة بقياس القهوة المطحونة يعني ملعقة كبــيـرة عــامرة غير ممسوحة)

لو غندير القهوة سريعة الذوبان

فكندير 3 ملاعق صغيرة ممسوحة لكل كاس لو بغيتها قاصحة
و2 ملاعق صغيرة ممسوحة لكل كاس لو بغيتها متوسطة
او ملعقة واحدة صغيرة ممسوحة لو بغيتها خفيفة ،

و كنضيف الماء الغليان لدرجة الفوران غير لقياس فاش نذوب القهوة سريعة الذوبان ،
و بعدها كنضيف للقهوة(مطحونة او سريعة الذوبان) الحليب البودرة
لكل كاس عنبة كنعمل 3ملاعق صغيرة عامرة غير ممسوحة
لو بغيتو بطعم كريمي فكنعمل 4 ملاعق بدل 3 و كنعمل كلشي فالخلاط

و نطحن الكل

حتى تتكون عندي موس كثيفة

كيف مبين فالصور

ثم كنضيف الماء او القهوة الغليانة الباقية و كنحلي بالسكر او بالشكلاطة

و نعاود نخلط الكل حتى تتكثف الموس
و تولي رغوة كلها فقاعات

لاحظو كيف انها سخونة بزاف يعني مبرداتش فالخلاط

لان الماء تعدى درجة الفوران
فمكيبردش دغيا و الدليل ان البخار ضبب العدسة

كنكبها مباشرة فالفناجين

او الماڭ او كؤوس القهوة

كبيتها هنا فكاس شفاف باش تبان ليكم الموس و كثافتها

و الحد الفاصل بينها و بين الحليب بالقهوة

ان شاء الله تكون واضحة للاسف الفلاش مكيبينش الفرق واضح

و بدونو الصورة كتكون مظلمة بزاف

بعد مكبيت الخليط فالكؤوس

زينت بالشكلاطة السائلة

بشكل عشوائي

التقديم:

كنقدم كافيأولي ديالي

عادة كنقدمها فالماڭ (الفناجين الكبيرة الحجم)

و هو باقي سخـــون فطور او كاسكروط

خفيف او كورصي

و بالصحة و الراحة

الخلاصة :

ماشي مهم نوع الحليب او القهوة المستعملة
لكن المهم هو الطريقة
و ان الماء او القهوة للي غنوجدو بيهم الخليط يكون فات دررجة الفوران
و الاهم هو انك تخلطي الكل فالخلاط الكهربائي بسرعة كبيرة
انا كنستعمل سرعة 5 للحصول على موس او رغوة كثيفة
و طبعا الطعم لما كتتخلط القهوة و الحليب مزيان
و كيندامجو مع بعضهم بحال الكريمة
كيكون اروع

ان شاء الله تكون طريقة سهلة و بسيطة للتقديم
و نكون وفقت فالشرح

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

و عليكم السلام ورحمة الله وبركاته