بحث هذه المدونة الإلكترونية

الثلاثاء، 10 يونيو، 2008

بسطيلة بفواكه البحر و الكورجيت و المخللات










السلام عليكم ورحمة الله وبركاته













وصفة اليوم بسطيلة بفواكه البحر و الكورجيت و المخللات

المقادير:




500 غرام حوت ابيض
500 غرام كلمار
800 غرام كروفيت
3 حبات كبيرة كورجيت محكوكة شرائط طويلة

2حامضات مصيرين محكوكين
ربيع مڭرض
زيتيون طرونشات اسود و اخضر
150 غرام كونكومبر (خيار مخلل) محكوك
بصلة مشحرة
2 ضروس ثوم محكوك
فرماج موزريلا محكوك
كلما كان اكثر كلما كان احسن
ملح
رشة ابزار
ورقة الغار
راس ملعقة صغيرة التوابل الاربعة
رشة خرقوم
راس ملعقة صغيرة هريسة
ملعقة كبيرة صوص صوجا


ورقة البسطيلة (منزلية او جاهزة)


للتزيين استعملو للي حبيتو انا استعملت الخضار
(خص، خيار و تومات سوريز)


الطريقة:






اولا وجدت ورقة البسطيلة ،



غنحط الطريقة ان شاء الله فقسم المعجنات
لما مكيكونش عندي الوقت نوجدها كنشريها جاهزة !

الحوت كيكون عندي منقي و مغسول فالكوجيلاتور
و ايضا فواكه البحر (كروفيت و كلمار)





كنعمل الحوت يتبخر هنا عندي غير السمطة




هي للي عملت تبخرات
مع الكلمار ايضا بخرتو

طبعا نقيت البصلة (بيضاء متعملوش الحمرا كتمرر) ،
و قطعتها تروشات رقيقة و درتها تتشحر فشوية زيت
حتى دبلات




ثم ضفت ليها الكورجيت محكوكة على الطول شرائط
مع الثوابل فص كبير ثوم، و ورقة الغار،و الملح و رشة ابزار
و راس ملعقة صغيرة التوابل الاربعة و رشة خرقوم،



بعد مطيب الكورجيت و تتشرب العطرية،
(مكتاخدش وقت خصها تبقا شادة فراسها يعني الطيب بلا مدوب)



كنضيف ليها الربيع و الزيتون طرونشات اسود و اخضر
و الكورنيشو محكوك و المصير محكوك
و دوائر الكلمار مبخرة



و نالتحريك ببطء ،
بعد ميتشرب الكلمار التوابل
كنضيف الحوت منقي و مفتت



ثم نضيف الكروفيت



و الموتزاريلا محكوكة




و نحرك الكل واحد 2 دقائق لا اكثر فوق نار مهيلة
برفق باش ميدوبوش طراف الحوت

و ها الحشوة جاهزة



و بعدها لما كيبرد الخليط
كنبدا فتعمار و تلماط البسطيلة





لمطها فپايركس أوڤال (بيضوي الشكل)




فرشت طبقة الورقة على الطبسيل و خليتها فايضة فالحواشي
مكنكثرش الورقة باشمتجيش معجنة و تغلب الوقرة على الحشوة
و حطيت الحشوة فالوسط





و سديت عليها بلحواشي للي بقات و لمطها مزيان ب2 ورقات اضافيات




دهنتها بالزبدة و دخلتها للفرن تتحمر



و كانت غاتحرق ههههه لاني تشطنت مع السلطة و نسيت البسطيلة


لما تحمرات
فرشت ليها الخص فطبق التقديم و زينتها بالخيار دوائر و الطوماط سوريز


التقديم:




قدموها دافية






او باردة




الحوت كيكون الذ لما كيكون بدرجة الحرارة المحيطة




و بالصحة ولراحة



ان شاء الله تنال اعجابكم




اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال




الله يرزقنا و إياكم خيرات الدارين و لا يحرمنا من طيبات الجنة و نعيمها





د
متم في رعاية الكريم





اختك
م أمنــار





أم ريـَّــان


وعليكم السلام ورحمة الله وبركاته

الجمعة، 6 يونيو، 2008

عصير سموثي باللوز والخوخ و الكرموص و التفاح و التمر



السلام عليكم ورحمة الله وبركاته








عصير اليوم:
عصير سموثي باللوز والخوخ و الكرموص و التفاح و التمر



لذيذ و صحـــــــــي بــــــــزاف بدون سكر او اية اضافات
مفـــــيد جدا جدا جدا... للصغار و الكبار
و يليق كفطور او عشا خفيف و مغذي لمتبعي الريجيم الصحي
ان شاء الله ينال اعجابكن


نخليكم مع المقادير و الطريقة البسيطة










المقادير :


دائما الكميات حسب عدد الاشخاص


خوخ
تفاح
كرموص
لوز
تمر
ماء

شخصيا لكل كاس عصير من الحجم الكبير كنعمل :
نصف خوخة كبيرة + نصف تفاحة كبيرة
+ 2 كرموصات + 7 تمرات (من النوع الرطب القابل للطحن بحال الدڭلة)
+ 2 ملاعق كبيرة رقائق اللوز


و كنطحن كل كاس كبير بنصف كاس عنبة ماء
باش كيجي القوام ثقيـــــل و عاقد او ما يسمى سمـوثي

و مع الفواكه و التمر لا داعي لإضافة السكر
وممكن تعوضو الماء بعصير الليمون او الحليب لو توفر او اي سائل كتفضلو حسب الرغبة









الطريقة :




اولا كنغسلوالفواكه فالماء و الخل و كنضفوها مزيان

شخصيا مكنقشرش الفاكهة لان القشر كيعطيني طعم و قوام مميز اضافة الى اللون و الفائدة اغلب الفيتامينات كتكون مركزة فالقشرة فمن غير الصحي نلوحها


و كنقطع الخوخ و التفاح و نحيد ليه العلف
و كذلك التمر كنحيد ليه العلف (كنختار التمر الرطب القابل للطحن)
و كنقطع الكرموس
و كناخذ اللوز كنقطعو رقائق باش يسهال طحنو


و هنا صورة للقياس للي كنعمل لكل كاس

كيف قلت

لكل كاس عصير من الحجم الكبير كنعمل :
نصف خوخة كبيرة + نصف تفاحة كبيرة
+ 2 كرموصات + 7 تمرات (من النوع الرطب القابل للطحن بحال الدڭلة)
+ 2 ملاعق كبيرة رقائق اللوز
و كنطحن كل كاس كبير بنصف كاس عنبة ماء


ثم فالخلاط كندير الماء و التفاح و الكرموص و الخوخ وكنطحن الكل مزيان
حتى كيتجانسو




ثم كنضيف اللوز و التمر بهاذ الترتيب
باش كيعطيو قرمشة و قوام للعصير



و كيف سبق و قلت كنطحن كل كاس كبير بنصف كاس عنبة ماء
باش كيجي القوام ثقيـــــل و عاقد او ما يسمى سمـوثي
يعني قياس الماء حسب عدد الكؤوس للي بغيتو تقدمو اي حسب عدد الاشخاص كل كاس كبير بنصف كاس متوسط





التقديم :



كنقدم السموثي مباشرة بعد الطحن



مزين برقائق اللوز




ممكن يشرب او يؤكل بملعقة حسب الرغبة



فالصيف بحال دابا كنطحنو بالماء المثلج اما فالبرد فبالماء عادي


و دائما غير يتطحن يتقدم باش تكون الاستفادة من فوائد الفاكهة اكبر









اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد








اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها







دمتم في رعاية الكريم







اختكم أمنــار







أم ريـَّــان




وعليكم السلام ورحمة الله وبركاته

وصفات مشابهة

 
Paperblog