البڭري بالخرشف

السلام عليكم ورحمة الله وبركاته

هاد الشهيوة معروفة و كنظن كلشي كيعرف ينصب الخرشف

لكن مافيها باس نوريكم طريقتي للي مكتختالفش عن الطريقة التقليدية

المقادير:

(حسب عدد الاشخاص حنا غير 3 ناقص واحد حيت ريان مكياكلوش هههه)

ساق خرشف طري
(من الافضل تختارووها صغيرة و طرية باش متكونش كلها لياف و خيوط)
لحم بقري مقطع (اي جزء كتفضلو انا عملت الفخض)
بصلة كبيرة مشلضة
ضرس كبير ثوم
عريشات قزبر و معدنوس معقودين
ملعقة صغيرة ملح
ملعقة صغيرة كامون
نصف ملعقة صغيرة سكنجبير
نصف ملعقة صغيرة خرقوم
نصف ملعقة صغيرة راس الحانوت
ملعقة كبيرة زيت الزيتون
زيتون بلدي ديال الدار
حامض مرقد
ماء للنصب

الطريقة :

اولا كنقيو الخرشف بالطريقة المعروفة
اي اننا نحيدو ليه ديك الجلدة الشفافة للي كتكون مغطياه
و كنحيدو من الخيوط و كنقطعوه لصبيعات

و بعدها كنرقدوه فالماء معصور فيه حامضة
و من الافضل نخليوه فذاك الماء مدة فالثلاجة مثلا ساعة
حتى يتحيد منو التراب و الرواسب
و فنفس الوقت الحامض كيقتل الطفيليات
و كيحافظ على لون الخرشف باش ميتاكسد و يولي لونو بني بدل الاخضر

بعدها كنصفيوه و نعاودو نشللوه بالماء

و نبداو فتحضير الطبق

فالكوكوط كنديرو اللحم و البصلة المشلظة
مع التوابل : ملعقة صغيرة ملح + ملعقة صغيرة كامون
+ نصف ملعقة صغيرة سكنجبير + نصف ملعقة صغيرة خرقوم
+ نصف ملعقة صغيرة راس الحانوت + ملعقة كبيرة زيت الزيتون

كنخليو الكل يتشحر مع ملعقة ماء باش متحرقش لينا التوابل او العطرية

بعد متتشحر اللحم و البصلة كنضيف ليها الخرشف للي قطرت من الماء
و كنخليه يتشحر معاها واحد 5 دقائق

كنغطي الكوكوط غير للنصف يعني مكنسدهاش

بعدها كنضيف الزيتون البلدي و ربيطة ديال القزبر و المعدنوس و الثوم المدقوق

و كنضيف قياس الماء الكافي فاش غيطيب الكل

و كنسد الكوكوط حتى يطيب كلشي

بعد متكون اللحم و الخرشف طابو و رطابو

كنضيف الحامض المرقد

و نخلي المرقة تتبخر شوية باش تجي واقفة و ثقيلة

التقديم :

و بعدها كنقدم الكل فطاجين او طبق التقديم

كنستف اللحم اولا ثم الخرشف ثم الزيتون و الحامض المرقد

و بالصحة و الراحة

ملاحظة:

الى كانت اللحم كبيرة ماشي فتية غيخصكم تطيبوها نصفطيبة
عاد تضيفو الخرشف باش ميهراش مع طياب اللحم

و طبعا ممكن تنقيو الخرشف و تنظفوه بالطريقة للي ذكرت الماء و عصير الحامض
و لو كنتو عتحفظوه فالثلاجة قبل الطبخ قطروه من خليط الماء و الحامض
و ديروه فميكات بلا متشللوه باش يبقى محافظ على لونو فالثلاجة لحين وقت الطبخ

و ان شاء الله نحط ليكم طرق اخرى لطبخ و تقديم الخرشف
غير عن هاد الطريقة التقليدية ديالنا،
كاني طرق كثيرة كيجي بيها لذيذ

ان شاء الله تعجبكم طريقتي و تفيدكم

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته