بحث هذه المدونة الإلكترونية

الأحد، 26 أكتوبر، 2008

طريقتي في تنظيف الكويزينيير بدون ماء






السلام عليكم



طبعا كلكم حادكات وكاتعرفو تخليو الفورنو او الكويزينير ... ديالكم تايشعل و يحمر الوجه




ولكن مافيها باس نوريكم طريقتي



كل وحدة فينا وطريقتها انا جربت شحال من طريقة :
الصابون البلدي، بيكاربونات الصودا، اجاكس، مسيو بروبر، الرشاشة ٠٠٠
كلشي زوينين لكن متيبردوش ليا خاطري؛
النظافة تاتكون ولكن اللمعان ديال الالمينيوم لا !!!
و تايبان تراس ديال تنشاف الماء

هنا كيف كتشوفو الكويزينيير مـــــــــــــــــــوســــــــــــــــــخ حالتو
وخصو حكة فاعلة تاركة باش يرجع كيف كان



المهم الخلاصة انا وليت نظف بالغبرة المنظفة او ما يسمى ب : بيجاڤيليسون
Bi-javellisant
رخيص و فعال
كينظف مع استعمال الماء او بدون ماء على الناشف يعني بلا مانستعمل الماء


غتحتاجو لغير هاد المنظف و منديل ناشف
منها تتكون النظافة و اللمعان ومنها اقتصاد فالوقت و المجهود و فالماء ايضا

وممكن تستعملو اي نوع تفضلو فيه عدة ماركات بحال اجاكس و فاكس و المنتوج الاقتصادي و غيرهم المهم هو المحتوى واحد
و الماركات راها كثيرة
تيتنظف بيه الحمام و الطواليط اعزكم الله
و البوطة و الزليج و الماعن
و الارضيات و الاسطح بشكل عام
والتمن ابتداء ا من 10 دراهم للعلبة ديال نصف كيلو و راها كتبقى مدة طويلة يعني جد اقتصادية
الفرق تيكون غير ف اسم المنتوج اما المكون فهو واحد

نبداو على بركة الله




كيف قلت غحتاجو للبودرة المنظفة
و لمنديل نظيف ناشف
و طبعا باش تحافظو على يديكم ديرو اللڭات او القفازات




نزولو الحديدات





و العيون على جنب





و نبداو نرشو الغبرة على سطح الكويزينيير غير شوية ماشي تغرقوه




و ناخدو المنديل نطويوه ونبداو نمسحو بشكل دائري



البلايص لي كتكون معلكة نمسحوها مزينا



و غتبان ليكم الاوساخ لصقات فالمنديل



نمسحو الحديدات



و العيون حتا هما



بنفس المادة و الطريقة




و مننساوش الحيط او لي عندو الغطاء ديال الكويزينيير




و ها النتيجة على المنديل تيشرب الزيت و الوسخ كامل



ناخذو شطابة صغيرة و البالة



و نجمعو بيها الغبرة



و نمسحو لاهوت اسبيرونت حتا هيا



بنفس الطريقة بالناشف



ثم نمسحو بمنديل نظيف سطح الكويزينيير





و العيون



و الحديدات




و الشعالات




و نردوهم لبلايصهم


وهكا ميدخلش ليكم الماء فعيون الغاز
او تخافو يتصدى إلا كان من حديد





و فنفس الوقت كتكسبو الوقت و الجهد

مكاين لا جيكس لا غيرو و يديكم مغيكحالوش







و هاهوا تنقا و تيفرح و يشهيك تطيبي فيه





و كيف كتشوفو النتيجة ظاهرة فالصور






مكتتطلبش بزاف ديال الوقت و الجهد
ماشي بحال الى بقينا كنخلطو فالماء و المنظفات و حك حك حك حك ...





ملاحظة : المادة راها موجودة عند الهري و بائع مواد التنظيف و غتلقاوها فالاسواق الممتازة فالمكان الخاص بالمنظفات ، كتنظف كل الاسطح : زاج ، انوكس، زليج ، سيراميك ...
ثمنها جد اقتصادي و العلبة ديالها كتدوم مدة طويلة مقارنة مع باقي المنظفات


ان شاء الله تكون تجربتي مفيدة ليكم و تعطيكم فكرة جديدة عن التنظيف بالبخار

لا تنسوني من صالح الدعوات لي و لاهلي الحبيبات هذا طلبي منكم فارجوا ان لا تبخل علي




اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال


الله يرزقنا و إياكم خيرات الدارين و لا يحرمنا من طيبات الجنة و نعيمها


دمتن في رعاية الكريم



اختكن أمنــار




أم ريـَّــان




وعليكم السلام ورحمة الله وبركاته

سابلي الزبيب معلك


السلام عليكم ورحمة الله وبركاته







حبيباتي هاد السابلي كيجي لذيذ و معلك
وكيعجب الصغار و الكبار
و مقاديرو بساط جدا









المقادير :







كيف العادة عندي عجينة سابلي اساسية
كنعملها دائما لانها ناجحة و اقتصادية
و ممكن ضيفي عليها للي بغيتي من منكهات او اضافات انتي و ذوقك


200 غرام زبدة لينة
150 غرام سكر ڭلاصي
ملعقة فانيلا
كنشري روح الفانيلا (غبرة ماشي السكر فاني) بالعبار احسن و نكهتها اقوى من الساشي
بيضة واحدة (كبيرة)
15 سنتيليتر زيت
500 غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 غرام زبيب (كلما كان الزبيب اكثر كلما كان حسن)








الطريقة :


في إناء كنطربو الزبدة مع السكر ڭلاصي





حتى الحصول على خليط كريمي ابيض




ثم كنضيفو الزيت



و كنطربو مرة اخرى

ثم كنضيفو البيضة




و نطربو الكل مزيان حتى يتجانس و يعطينا كريمة موس ثقيلة



ثم كنضيفو الدقيق المنخول بشوية بشوية



مع الفاني و خميرة الحلوة و المايزينا ،




و نعجنو الكل بإضافة الدقيق





بشوية بشوية













حتى الحصول على كرة متجانسة مكتلصقش فاليدين




ثم كنضيفو ليها الزبيب للي قطعناه طريفات صغار




كلما كانت كمية الزبيب اكثر و كلما تقطع صغير كلما كان السابلي معلك اكثر




كنخدمو العجينة مزيان




حتى يدخل فيها الزبيب




و يتجانس معها




كنسخنو الفرن بدرجة حرارة 180°


كنحطو العجينة ديالنا على سطح العمل النظيف



و نطلقوها بالمدلك





ثم كنبداو فتشكيل السابلي ديالنا باي شكل كتفضلو
حسب المراشم للي عندكم




انا عملتو بشكل وريدة




و بشكل مستطيل







وجدت الطاوة فرشتها بورق الزبدة

و ستفت فيها السابلي
حاولو تهزوه بشي ملعقة او سباتيل
باش يحافظ على شكلو و ميكونوش فيه طباع الصبيعات

و دخلتو للفرن المسخن من قبل
على درجة حرارة 180 °
بين 10 او 15 دقيقة حسب السخونية ديال كل فران




خليتها حتى بردات و ستفتها فعلبة حافظة








التقديم :







قدموها بالصحة و الراحة










اما بشكلها العادي او الى بغيتو تزينوها حسب الذوق




كتجي معلكة و كذوب فالفم و لذيذة







خصوصا لوليدات عزيزة عليهم و مزيان ليهم
لانه معروف فوائد الزبيب و تاثيرو على الذكاء و الحفظ و الذاكرة








ملاحظة :



هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة
فعلبة حافظة محكومة الاغلاق

و ايضا ممكن بدل الزبيب تستعملو المشماش يابس
او انناس او فواكه يابسة
محكوكة او مقطعة بنفس الطريقة
و ممكن تزيدو كمية السكر او تنقصوها حسب اذواقكم

يعني العجينة كتبقى واحدة و التنويع فالاذواق
حسب الرغبة و متوفر في كل مطبخ


إن شاء الله تعجبكم الوصفة و تجربوها
و تكون اضافة جديدة و مفيدة ليكم








اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته




وصفات مشابهة

 
Paperblog