السلام عليكم ورحمة الله وبركاته
هدا طبق بسيطة
كيجي خفيف و سريع التحضير
ان شاء الله تعجبكم هاد الطريقة فتقديم الميرلا بشكل مغاير
المقادير :
سمكة ميرلا
بطاطة
بصل
طوماط سوريز او مطيشة كبيرة حسب المتوفر
ممكن تضيفو للي بغيتو من الخضار
الشرمولة :
ربيع
عطرية الحوت
ملح
ابزار
كامون
خرقوم
تحميرة
سكنجبير
ملعقة زيت
الطريقة:
غسلت الخضار و نقيت البصلة و قطعتها ترونشات او دوائر
و كذلك البطاطة قطعتها ترونشات
شلضت الربيع
ستفت ترونشات البصلة فطبق كيدخل الفرن (هذا تيفال فمكنحتاج ندهنو او نزيتو )
و ستفت فوقها ترونشات البطاطة
و خذيت الحوتة بعد منقيتها و غسلتها مزينا و قطرتها و حطيتها فوق الخضار
وجدت الشرمولة ديالها
و للي هي :
ربيع مشلض + ملح + ابزار + كامون + عطرية الحوت + قبيصة خرقوم + قبيصة تحميرة + سكنجبير+ ملعقة زيت
خلطتهم مزيان
و شديت الحوته ديالي و دهنتها مزينا بهاد الخليط من كل الجهات
و للي بقا دهنت بيه الكرش ديالها
و وزعتو على الخضار
و وزعت حبات طوماط سوريز فالطبق
و ضفت للكل قياس كاس صغير من الماء
و مباشرة لفرن حتى طابت الحوتة و الخضار
و هاهي جاهزة للتقديم
كيف كتبين الصورالخضار كتجي معلكة و محمرة و كتتشرب المرق و التوابل و كذلك الحوتة كتجي محمرة من الخارج و هشيشة من الداخل
التقديم :
قدموها بالصحة و الراحة سخونة او دافية
كيف قلت الخضار كتكون بطيبة معلكة و محمرة
و الحوتة محمرة من برا
و الداخل ديالها هشيش و لذيذ
بالصحة و الراحة
اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
اختكم أمنــار
أم ريـَّــان
وعليكم السلام ورحمة الله وبركاته
المشاركات
ليست هناك تعليقات:
إرسال تعليق