السلام عليكم ورحمة الله وبركاته
سبق و نزلت ليكم طريقتي فتحضير موس الشكلاطة
موس الشكلاطة باللوز المحمر المهرمش
و ليوم غنقدمها ليكم
موسا الشكلاطة بشكل مغايير
بطبقات بفاكهة الموسم الفريز
و لا داعي نقول انها كتجي لذيذة خصوصا للي عزيز عليها الشكلاطة و الفريز بحالي هههه
ان شاء الله تنال اعجابكم
المقادير:
250 غرام شكلاطة سوداء بتركيز 75 % كاكاو او اكثر حسب المتوفر عندكم
20 غرام بودرة الكاكاو المر
5 بيضات (كبار)
30 غرام زبدة مالحة (ممكن تستعملو لابريري (لابريري ماشي زبدة العبار لان ديال العبار كتطلق الماء لذلك استعملنا الزبدة ديال العلبة مكتطلقش الماء)
فريز ( رابعة اونصف كيلواو اكتر حسب حبكم للفريز)
الطريقة :
اولا ندوبو الزبدة اما فحمام مريم او فالفرن دافي او الميكرواوند حسب الرغبة
انا ذوبتها فحمام مريم ( اي كسرولة فيها الماء غليان نوضعو عليها كسرونة اصغر و نوضعو الكل فوق عافية مهييلة)
بعد مندوبو الزبدة ندوبو معها ايضا الشكلاطة السوداء
سبب خلط الزبدة المالحة مع الشكلاطة السوداء باش نتفاداو ان الشكلاطة تقصاح بسرعة لما نخلطو معها باقي المكونات الزبدة كتخلي الشكلاطة لينة و كتضيف ليها لمعان ايضا)
فالوقت فاش كذوب الشكلاطة
كناخذو البيض و نفرقو صفار البيض عن البياض
كنطربو بياض البيض و نطلعوه حتى يشكل لينا موس قابطة فراسها
ثم كنضيفو للشكلاطة الذائبة بودرة الكاكاو المر و نخلطو الكل
ثم نضيفو ليهم صفار البيض و نطربو الكل
حتى يشكلو لينا موس شكلاطة كثيفة و ثقيلة
بعدنا نضيفو لهاد الخليط بياض البيض للي طلعنا من قبل
نضيفوه برفق بلا منطربو لكن نحاولو نخلطوه بملعقة او سپاتيل
بحركات خفيفة باش منهرسوش الموس ديالنا و نخسروها و هاهي جهزات
دابا ناخذو الفريز ديالانا نغسلوه مزيان و نشفوه و نقيوه
و نقطعو كمية منو مكعبات صغيرة او حسب الذوق
بالنسبة لطريقة تقديم موس الشكلاطة بالفريز ممكن تعملوها بالشكل للي بغيتو
اما فطبق واحد او فاطباق فردية
و ممكن اما تخلطو موس الشكلاطة مع الفريز او تخليوهم منفصلين باش تشكلو طبقات
انا عملتها فكؤوس (ڤيرينات) باش يكون تقديمها اسهل
و مخلطتش الفريز مع الموس باش يعطيني طبقات واضحة الموس بوحدها و الفريز بوحدو
و لإعطاء شكل للموس عملتها فقمع الپوشوار
و عمرت بيها الڤيرينات
عملت طبقة اولى من موس الشكلاطة
تم طبقة ثانية من مكعبات الفريز
ثم طبقة ثالثة
من الموس
و بعدها زينت بفريزة
كيف مبين فالصور
(ممكن تعملو عدد الطبقات للي بغيتو)
و دخلتها للثلاجة
مدة لا تقل عن 5 ساعات باش تشد راسها مزيان
التقديم:
بعد مقبطات الموس
قدمتها
بالصحة و الراحة
نتمنى تجربوها و تردو عليا خبر
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
أمنــار
أم ريـَّــان
وعليكم السلام ورحمة الله وبركاته
المشاركات
ليست هناك تعليقات:
إرسال تعليق