حرشة معمرة باللوز و الكونفيتير

السلام عليكم ورحمة الله وبركاته

نهاركم طيب


وصفتي لليوم ان شاء الله تابع لسلسلة وصفاتي للحرشة المعمرة





هاد المرة معمرة بالكنفتير و اللوز "رقائق اللوز"

نخليكم مع المقادير والطريقة

المقادير:

500 غرام سميدة الحرشة

ملعقة صغيرة ملح،
ملعقة كبيرة سكر

رأس ملعقة خميرة الخبز،
روح الڤانيلا غبرة
قطرات من روح الخوخ ...

خميرة حلوى ،
فنجان حليب بودرة
فنجان زيت
1/4 لتر ماء / كاس ديال عنبة
(ممكن إضافة الماء اكثر حسب جودة الدقيق المستعمل)

للحشوه او العمارة

كنفتير اي نوع كتفضلو





انا استخدمت كنفتير الخوخ صايباتو لي ماما الله يحفظها

لوز مقطع رقائق

الطريقة :

في إناء نخلطو المقادير الناشفة بالتتابع

كيف مبين فالصور
500 غرام سميدة الحرشة
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ روح الڤانيلا غبرة
+فنجان حليب

نخلطو كلشي النواشف مزايان و نضيفو الزيت

و نفتلوها

كيف تانفتلو الكسكس او البات بريزي حتا تشرب الزيت

ثم نضيفو4/1 لتر ماء ونعجنو السميد

و نضيفو ليه ايضا قطرات من روح الخوخ

ونخلطو مزيان حتا نحصلو على خليط رخو
و متماسك فنفس الوقت

(ممكن إضافة الماء اكثر حسب جودة الدقيق المستعمل)

و نخليوها ترتاح شوية
و نبداو فتكويرها

و قسمت العجين الى كويرات بقياس المشمشة الكبيرة

كناخذ كرة الحرشة




و نبسطها فراحة يدي كيف مبين فالصور


و كنحشيها بملعقة صغيرة من الكنفتير





و ملعقة صغيرة من رقائق اللوز

كنحطهم وسط الكرة المبسطة

و كنعاود نسدها و نكورها

و الطريقة مشروحة بالصور

و بعد منكملو التعمار

نسخنو المقلة (مقلة وجدة الثقيلة افضل)

و كنبداو نمرمدو كويرات الحرشة فالسميدة من كل الجهات

و نڭرصوها كيف مبين فالصورة

و نبداو نطيبو الحريشات ديالنا

على نار مهيلة

حتى يتحمرو و يطيبو على خاطرهم
و يكتاسبو لون ذهبي محمر

التقديم :







نقدموها سخونة او باردة







كتجي معلكة بالكنفتير



و فنفس الوقت مقرمشة باللوز

بالصحة و الراحة

اتمنى تجربوها و تنال اعجابكم و تكون طريقة جديدة لتقديم الحرشة

ملاحظة :

الحرشة قابلة للتجميد سواء ا كانت عادية او محشية
يعني ممكن تعملوها بكمية كبيرة و تحشيوها بحشوات متنوعة مالحة و حلوة
و تحفظوها فالفريزر او المجمد لحيت تحتاجوها
خصوصا و شهر رمضان الفضيل على الابواب و كنبغيو نوجدو شهيوات خفيفة مسبقا
باش يبقى لينا وقت للعبادات فالشهر الابرك

لما تبغيو تقدموها جبدوها و خليوها ديكونجلا على خاطرها
و سخنوها اما فالفرن مسبق التسخين او فمقلة وجدة الثقيلة
و قدموها بالصحة و الراحة بحالا عاد وجدتوها

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته