بحث هذه المدونة الإلكترونية

الثلاثاء، 10 يناير، 2012

الڭلية بالشكلاط الابيض و القرفة



السلام عليكم ورحمة الله وبركاته


سنة سعيدة
الله يدخلها عليكم بالخيرات و البركات و بالصحة و الهنا و بكل متمنيتو ان شاء الله
واخا جات التهنئة معطلة كالعادة

نتمنى تكونو كلكم باحسن حال


كيف واعدتكم من مدة فموضوع الڭلية
هاذي واحدة من الطرق باش ممكن تنوعو فتقديم الڭلية او الذرة مقلي



ان شاء الله تكون اضافة جديدة و مفيدة
خصوصا للوليدات الصغار (وحتى الكبار كلشي عزيزة عليه الڭلية ) باش ينوعو فاكل البيت




بلا منزيد نطول عليكم هاذي ڭلية عادية
لكن المغاير فيها هو اني كنظيف عليها نوع من الڭلاصاج بالشكلاطة البيضاء و القرفة
او ممكن تعوضو بللي متوفر عندكم (ڭلاصاج عادي بالسكر + اي نكهة كتفضلو )

نخليكم مع المقادير و الطريقة:


المقادير :

الكميات حسب عدد الاشخاص




ذرة يابس
ملح



زيت

الكميات كتبقى حسب عدد الاشخاص:

لكل كاس ذرة
كنعملو 2 معالق كبيرة زيت
و رشة ملح حسب الذوق

للڭلاصاج :



100غ شكلاطة بيضاء
4 معالق ماء



قرفة

الطريقة:




اولا نقيو الذرة نغسلوها و نشفوها مزيان
(بعد المرات كتكون فيها شوائب و غبار )




ناخذو كاسرولة ،طنجرة او كوكوط تكون ثقيلة القاع
باش تتوزع فيها الحرارة بشكل متساوي و متحرقش لينا الڭلية




كنعملو اولا الزيت تسخن على عافية متوسطة
غير تبان لينا الزيت بدات تغلي



كنلوحو فيها حبوب الذرة و نحركوها مزيان باش كلها تتزيت
لو كانت الزيت زايدة ممكن تصفيوها



و نعملو فوقها غطاء
من الافضل يكون مثقب بحال الكسكاس باش يخلي الهواء يتبخر
و نخليوها تطيب على عافية مهيييييلة


و فنفس الوقت نعملو الشكلاطة




مع الماء فكسرولة فحمام مريم حتى الذوب الشكلاطة على نار هادئة




و طبعا بعد مدة غنبداو نسمعو الفرقعات ديال الذرة



لما كيطيب كلها و ميبقاش صوت الفرقعة



نرشوها بالملح حسب الذوق و هي باقي سخونة




و نظيفوها للشكلاطة




و نرشوها بالقرفة (القياس للي كنفضلو شخصيا انا من محبي القرفة لذلك كنكثرها)





و نحركو الكل باش تتجانس




و تتشبع حبات الڭلية بالشكلاطة و القرفة





و هاهي جاهزة


التقديم:




ممكن نقدموها كيف هي دافية او باردة فطبق التقديم




او ممكن نشكلو بيها حلى بحال النوڭا مستطيلة او باي اشكال كنفضلو و هي باقي سخونة باش تاخذ الشكل للي بغينا بعد متبرد
و نقدموها لاطفالنا

بالصحة و الراحة
و بإذن الله انا عند وعدي نزيدكم وصفات ديال الڭلية بالذرة لتقديمها بطرق و نكهات و اشكال متنوعة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته

مرقة البڭري بالبطاطة قصبية








































السلام عليكم ورحمة الله وبركاته


سنة سعيدة
الله يدخلها عليكم بالخيرات و البركات و بالصحة و الهنا و بكل متمنيتو ان شاء الله
واخا جات التهنئة معطلة كالعادة

توحشــــــتــــــــكـــــــــــــــــــــــــــــــــــــــــــــــــــــــــــــــم بــــــــــــــــــــــــــــــــــــزاف
و نتمنى تكونو كلكم باحسن حال

و باش منجيش بيدي خاويين مع هاد البرد جبت ليكم مرقة بخضرة من خضار الموسم



كنظن كلشي كيعرف ينصب البطاطة قصبية



و هذا وقتها لله الحمد










لكن مافيها باس نوريكم طريقتي















المقادير:





حسب عدد الاشخاص

البطاطة قصبية





لحم بقري مقطع (اي جزء كتفضلو انا عملت الفخض)




بصلة كبيرة مشلضة




ضرس كبير ثوم
ملعقة صغيرة ملح
ملعقة صغيرة كامون
نصف ملعقة صغيرة سكنجبير
نصف ملعقة صغيرة خرقوم
نصف ملعقة صغيرة راس الحانوت
ملعقة كبيرة زيت الزيتون
زيتون و معدنوس (أنا مكانش متوفر عندي)
ماء للنصب

















الطريقة :


اولا كنغسلو مزيان البطاطة قصبية و نقيوها





(كاين فاش كنطيبها بقشرتها بلا منقيها غير كنغسلها و نفركها مزيان بشي شيتة )

و بعدها كنرقدوها فالماء معصور فيه حامضة
و من الافضل نخليوها فذاك الماء مدة فالثلاجة مثلا ساعة
حتى يتحيد منها الرواسب و فنفس الوقت الحامض كيقتل الطفيليات و كيحافظ على لون البطاطة قصبية باش ميتاكسد

بعدها كنصفيوها و نعاودو نشللوها بالماء

و نبداو فتحضير الطبق





فالكوكوط كنديرو اللحم و البصلة المشلظة


مع التوابل : ملعقة صغيرة ملح + ملعقة صغيرة كامون
+ نصف ملعقة صغيرة سكنجبير + نصف ملعقة صغيرة خرقوم
+ نصف ملعقة صغيرة راس الحانوت + ملعقة كبيرة زيت الزيتون


كنخليو الكل يتشحر مع ملعقة ماء باش متحرقش لينا التوابل او العطرية
بعد متتشحر اللحم و البصلة كنضيف الثوم و قياس الماء الكافي فاش غيطيب الكل
و كنسد الكوكوط حتى يطيب كلشي





بعد متكون اللحم طابت كنضيف البطاطة قصبية



انا مكانش عندي الزيتون و المعدنوس متوفرين لذلك نصبتها بلاش لكن لو كانو كتجي المرقة اللذ طبعا

و كنسد عليها و نخليها طيب





و نخلي المرقة تتبخر شوية باش تجي واقفة و ثقيلة








التقديم :





و بعدها كنقدم الكل فطاجين او طبق التقديم



كنستف اللحم اولا ثم البطاطة قصبية (ثم الزيتون )




و بالصحة و الراحة









ملاحظة:

البطاطة قصبية



معروف عليها دغيا كطيب لذلك طيبت اللحم اولا عاد ضفتها باش متدوبش و تجي معجنة و ذايبة فالمرقة

حتى فالطاجين كتجي اللذ و ممكن تنصب مع خضار اخرى طبعا ماشي غير بوحدها
قيمتها الغذائية كبيرة و خصوصا لمرضى السكري وا لناس للي كتبع ريجيم او حميات صحية
غنية بڤيتامين "
ب" و الپوتاسيوم و الكالسيوم و الفوسفور و الماغنزيوم و الحديد و طبعا غنية بالالياف


ممكن تستهلك بالقشرة ديالها للي فيها منافع و كتزيد تغني الطعم ، بدل متقشر ممكن تغسل و تحك بفرشات مزيان و تطبخ بالقشرة

المعروف على مذاقها انه كيفكرنا بمذاق القوق و الخرشف و كذلك النوازيت او بالفصحى البندُق

لما تبغيو تختارو حبات البطاطة قصبية ختاروها تكون طرية و شادة فراسها ماشي لاوية تكون قشرتو مشدودة و جديد
ممكن تحفظ فالثلاجة فبلاستيك غذائي مدة لا باس بها من اسبوع ل 15 يوم او اكثر و تبقى بنفس الطراوة
و ممكن تعمل بيها عدة اطباق ماشي غير المرقة (ڭراتان, سلطات ... و حتى الديسير علاش لا ...)

و ان شاء الله نقدم ليكم طرق اخرى لتقديم البطاطة قصبية




اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته

وصفات مشابهة

 
Paperblog