لپات أشو

السلام عليكم ورحمة الله وبركاته

اليوم ان شاء الله غنزل وصفة الپات أشو المعتمدة عندي

الوصفة خذيتها من موقع اجنبي لوصفات الباتيسري و البولونجي الاساسية
"recettes de bases"
طبعا انا كنعمل نصف المقادير لان الكمية كتكون كافية بالنسبة لي

المقادير :

20 غرام زبدة
3 بيضات
500 غرام فورص
ملعقة صغيرة ملح
ملعقة سكر
1/4 لتر ماء

الطريقة:

طبعا الطريقة فيها شوية الخدمة و العذاب
لان كتتطلب مجهود يدوي
ولكن النتيجة تستاهل

فكسرونة تانكبو 1/4 لتر ماء لي وجدنا و نخليوه يغلي

ثم نضيفو الزبدة
و نضيفو الملح و السكر

نخليوه فوق نار خفيفة
حتا تذوب الزبدة و عنداكم التحرق

نزولوها من فوق العافية

ثم نضيفو الفورص مغربل بمرة

و نبداو نحركو

حتا يمتازج الفورص بالخليط

و هنا نردوها فوق البوطة
على عافية مهيلة

و نبداو نحركو بقوة و بسرعة

حتا يتكون عندنا عجينة كيف الصورة

رطبة و جامعة راسها

بعدها نطفيو عليها
و ندوزو للمرحلة الثانية

إما تخلطيها فالروبو او بالخلاط اليدوي

المكون الوحيد لي بقا هو البيض

تنبداو نضيفو 3 بيضات وحدة بوحدة

كل مرة نضيف وحدة

و نخلط حتا تمتازج مع العجين

عاد نضيف الأخرى

و هنا شكل العجين

تيولي رخو كيف ظاهر فالصورة

بعد ماكملنا العجين
نوجدو الطاوات ديالنا
فاش غنعملو لي شو او لي إكليغ
او كيفما بغيتو تسميوهم
ممكن تستعملو بوشوار إلا عندكم
ولي ماعندوش يستخدم ملعقة

و هادي هيا الطريقة

تتهزي زوج معالق وحد تتهزي بيها كويرة صغيرة من العجين

و الثانية تطيحيها بيها فالطاوة مزيتة طبعا
تتكون بشكل عشوائي

لي عندها بوشوار او جوا الحلويات
ممكن تتفنن فالاشكال و الاحجام

ندخلو لي شوشو ديالنا للفران
على حرارة معتدلة 150 C°

و نخليهم يتنفخو و يتحمرو
على خاطرهم

شخصيا كنفضلهم محمرين من برا و رطيطبين من الداخل
كيعجبني اللون الذهبي الداكن و القرمشة للي كيعطي (على اللون البارد/طياب الشمس)

التقديم:

و هاهما واجدين بالصحة و الراحة

شخصيا كنكوجليهم لحين حاجتي ليهم

و بالنسبة للعمارة او الحشو
لو كانو حلوين كنحشيهم بالكريم باتيسسير

او بالشكلاطة السوداء

او كريمة الفواكه

او الكراميل

او بالكريم موس

او الكونفيتيرو الفواكه

...

و لو كانو مالحين ايضا الحشوات تتنوع بالصلصات
و الاضافات من فواكه البحر و الحوت او المخللات او الدجاج او الكفتة
يعني الحشوة كتبقى حسب الرغبة

المهم التفنن و الابتكار معندو حد كلا يدير لي تايفضل
و حتا هما ممكن تكونجليوهم وقتما حتاجيتوهم
شي ضيف جا على غفلة تلقاوهم واجدين
غير ديكونجليهم و وجد حشوة سريعة و حشيهم

و قدمهم بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته