بحث هذه المدونة الإلكترونية

الأحد، 30 أكتوبر، 2011

سابلي بقشور الليمون و نكهة و كنفتير المشماش







السلام عليكم ورحمة الله وبركاته







هاد السابلي كيجي لذيذ و معلك
وكيعجب الصغار و الكبار
و مقاديرو بساط جدا










سابلي بقشور الليمون و نكهة و كنفتير المشماش












المقادير :







كيف العادة عندي عجينة سابلي اساسية
كنعملها دائما لانها ناجحة و اقتصادية
و ممكن ضيفي عليها للي بغيتي من منكهات او اضافات انتي و ذوقك




200 g غرام زبدة لينة (أأكد زبدة ماشي مارڭرين)
150g غرام سكر ڭلاصي (او 10 معالق كبيرة )
ملعقة صغير نكهة روح المشماش
بيضة واحدة كبيرة (البيضة الكبيرة كيكون فيها 80 غرام لو استعملتو بيض صغير عملو 2 بيضات صغار)
15 cl سنتيليتر زيت (اي 150 ميليليتر او نصف كاس عنبة او 10 معالق كبيرة زيت/ عبرو بللي يناسبكم)
500 g غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 g كنفتير المشماش (او 4 معالق كبيرة )
50 g غرام قشور الليمون (او 4 معالق كبيرة ) محكوكين رقاق كيف مبين فالصورة


للحشو و التزيين :

كنفتير مشماش على شكل جولي ليسهل العمل به ( او ممكن تصفيو كنفتير المشماش من طراف المشماش الكبيرة او تطحنوه مزيان لو مكانش متوفر عندكم جولي )
سكر ڭلاصي













الطريقة :


في إناء كنطربو الزبدة مع السكر ڭلاصي





حتى الحصول على خليط كريمي ابيض



ثم كنضيفو الزيت


 




و كنطربو مرة اخرى

ثم كنضيفو البيضة






و نطربو الكل مزيان حتى يتجانس و يعطينا كريمة موس ثقيلة


 

ثم نضيفو ليهم قشور الليمون
و نخلطوهم و نضيفو نكهة المشماش
و نضيفو 4 معالق كنفتير مشماش



و هاهي الكريمة باش غنجمعو العجين جاهزة





كنضيفو الدقيق المنخول مع خميرة الحلوة و المايزينا ،




بشوية بشوية على الكريمة




باشما نخلتو الدقيق مزيان (مرة و 2 و 3) باشما كانت الحلوة بعد الطبخ احسن






و نعجنو الكل





و حنا كل مرة كنضيفو شوية ديال الدقيق حتى نكملوه كلو






حتى تتجانس المكونات



و يتشرب العجين مزيان كل مكوناتو



و نحصولو على كرة متجانسة مكتلصقش فاليدين





نغطيوها و نخليوها ترتاح واحد نصف ساعة فالثلاجة








بعدها نخرجوها من الثلاجة و و نجهزو سطح العمل نرشوه بشوية دقيق



 




و نطلقوها بالمدلك مزيان عملوها بالسُّـمـْـك للي بغيتو انا كنفضلها بسُّـمـْـك رقيق باش متجيش الحلوى غليضة بعد لصقها بالكنفتير








ثم كنبداو فتشكيل السابلي ديالنا باي شكل كتفضلو
حسب المراشم للي عندكم



انا عملتو بشكل شميسة




وجدت الطاوة فرشتها بورق الزبدة




و ستفت فيها السابلي

 



حاولو تهزوه بشي ملعقة او سباتيل
باش يحافظ على شكلو و ميكونوش فيه طباع الصبيعات

و دخلتو للفرن المسخن من قبل على درجة حرارة 180 °
بين 8 او 12 دقيقة حسب السخونية ديال كل فران



 


ردو ليها البال راه دغيا كطيب
غير تكتاسب لو ذهبي خفيف خرجوها

لما تبرد تماما اما ستفيها فعلبة ح
افظة
او لو غتقدموها حشيوها او لصقوها بالكفتير و زينوها حسب الذوق بالسكر ڭلاصي


  

و هنا طريقة التزيين و الحشو

الحلقات ديال السابلي المثقوبة ستفتها و رشيت عليها السكر ڭلاصي اولا



 



اما الدوائر الكاملة فعملت فوق كل وحدة منها ملعقة صغيرة من جولي او كنفتير المشماش (بلا طراف المشماش) و حطيت عليها الحلقة المزينة بالسكر ڭلاصي




 


كنعملو السكر ڭلاصي على الحلقات قبل منلصقوها بالكنفتير باش يكون منظر الكنفتير باين و لامع
لو خلينا السكر ڭلاصي للاخير بعد منكونو لصقنا السابلي بالكنفتير مغيبقاش يبان الكنفتير فالوسط حيت غيغطيه السكر









التقديم :







قدموه بالصحة و الراحة

 




 



كيجي معلك و مقرمش فنفس الوقت




و كيذوب فالفم سهل و لذيذ

















ملاحظة :



هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة فعلبة حافظة محكومة الاغلاق كسابلي بلا متلصقوها او تحشيوها بالكنفتير
حتي تبغيو تقدموها و عاد تحشيوها او تلصقوها بالكنفتير هكا كتبقى مدة اطول مقرمشة
الكنفتير كلما بقا كلما خلاها معلكة اكثر و طبعا لذيذة
شخصيا مكتبقاش عندي مدة طويلة تبارك الله كيطيرها ليديات بالخف

و ايضا ممكن بدل قشر الليمون و كنفتير المشماش تعملو حاجات اخرى حسب ذوقكم و المتوفر عندكم
و ممكن تزيدو كمية السكر او تنقصوها حسب اذواقكم

يعني العجينة كتبقى واحدة و التنويع فالاذواق
حسب الرغبة و متوفر في كل مطبخ

راني حاولت نعطي المقاييس مسهلة بالغرام او السنتيليتر او حتى بالكاس و الملعقة
باش يكونو اسهل ان شاء الله للي معندهاش ادوات قياس

إن شاء الله تعجبكم الوصفة و تجربوها
و تكون اضافة جديدة و مفيدة ليكم





اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته

الجمعة، 28 أكتوبر، 2011

الڭلية ديال القمح






السلام عليكم و رحمة الله



وصفة اليوم ان شاء الله ساهلة بزآآاف و كتعجب الكبار و الصغار



هي الڭلية ديال القمح


http://a4.sphotos.ak.fbcdn.net/hphotos-ak-snc7/385488_267886196589151_100001033182924_805999_1734527023_n.jpg





هي صحية بزاف و مفيها لا دهنيات لا اضافات و سهلة جدا و منافعها كثيرة
ان شاء الله نكون وفقت فالشرح
للعلم الطريقة خذيتها من اماما الله يحفظها و ينولني رضاها دنيا و اخرة
مع بعض الاضافات من عندي باش نسهل عليا التحضير (العڭز و ميدير ههه)


المقادير ولا ابسط و لا اسهل :



قمح حبوب كاملة
ماء


ملح او بدون ملح حسب الذوق








الطريقة :




اولا طبعا ناخذو حبوب القمح نقيوها و نغسلوها مزيان




من بقايا الاتربة حتى يتنقى و ميبقاوش فيه شوائب كيف مبين فالصور



بعدها شدي القمح حبوب صاينين (يعني كاملين)



بيتيه فشوية الماء مملح او غير مملح غير قياس الماء للي يشرب القمح
و الصباح غتلقايه شرب داك الماء و تنفخ و كبار فالحجم ،



خوذي مقلة (مقلة وجدة الثقيلة) او مقلة طين او اي مقلة عندك



ديري فيها داك القمح الى بغيتي ممكن تملحيه حسب ذوقك لو معملتيش ليه الملح فماء الترقاد ، او ممكن تخليه مسوس دون ملح حتى مسوس كيجي لذيذ لان القمح فالاصل طعمو حلو




و على نار مهيييييلة بقاي تديه و تجيبيه



دون التوقف عن التحريك



غيبدا ينشف من الماء و يتغير لونو و حتى حجمو يبدا يزيد اكثر


استمري فعملية التحريك على نار مهيــــلة حتى يتڭلى و تتفرڭع الحبات ،


طفي عليه و خليه يبرد و ديريه فشي بواط محكمة الاغلاق باش يبقى مڭرمل و مقرمش



و هنا صور كتبين الحبة ديال القمح
http://a6.sphotos.ak.fbcdn.net/hphotos-ak-snc7/301932_267886143255823_100001033182924_805998_616425629_n.jpg

كيف كانت فالاصل و كيف كبرات و ولات بعد الترقاد و الڭلي
http://a5.sphotos.ak.fbcdn.net/hphotos-ak-snc7/295832_267886113255826_100001033182924_805997_474499591_n.jpg

حاولت نصورها قريبة باش تبان ليكم قداش كتولي الحبة

http://a8.sphotos.ak.fbcdn.net/hphotos-ak-ash4/307895_267886279922476_100001033182924_806000_33124109_n.jpg


تقريبا كيتضاعف حجمها 3 مرات

http://a6.sphotos.ak.fbcdn.net/hphotos-ak-ash4/305896_267886486589122_100001033182924_806003_1710540171_n.jpg


التقديم :

ممكن يتقدم فاي وقت


http://a7.sphotos.ak.fbcdn.net/hphotos-ak-ash4/385165_267886519922452_100001033182924_806004_357192748_n.jpg




فالڭوتي او مع كويس اتاي او قهوة او كڭرينيوتاج

http://a3.sphotos.ak.fbcdn.net/hphotos-ak-ash4/310557_267886639922440_100001033182924_806006_1364996817_n.jpg


و ممكن تاكلي منو وقتما بغيتي لان حبوب القمح عموما صحية و القمح مڭلي كينفع المعدة بزاف و كيعاون على الجير او كيف كنقولو الحرقة
http://a4.sphotos.ak.fbcdn.net/hphotos-ak-ash4/384397_267886423255795_100001033182924_806002_988888656_n.jpg

و بالصحة و الراحة

ان شاء الله تكون الطريقة واضحة و تجربوه و تردو عليا خبر لو كنتو من محبات القمشة و الحبوب الكاملة


ملاحظة :

نفس الطريقة ممكن تعملو بيها حبوب الشعير او حبوب الخرطال او حبوب الفارينة او غيرها من الحبوب


اللهم ادمها نعمة و بارك لنا فيها و اكتب لي بها حسنة ترضاها و اجعل فيها الصحة و العافية

الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان

وعليكم السلام ورحمة الله وبركاته


وصفات مشابهة

 
Paperblog