بحث هذه المدونة الإلكترونية

السبت، 18 أغسطس، 2012

سابلي بروح النوازيت وقشور و كونفيتيري الليمون











السلام عليكم ورحمة الله وبركاته

عواشركم مباركة

الله يكتب لينا فهاد الايام المباركة نيل رحمته و غفرانه

أتمناكن جميعا بخير

و أسأل الله أن يجعل شهر رمضان الفضيل شهر رحمة ومغفرة وعتق لنا جميعا
توحشتكم بزاف

و غيابي عنكم مزاد الا شوقي ليكم

و ان شاء الله نرجع نشارككم
الله لا يحرمني من مجمعكم الطيب
واستسمح بشدة لأن دخولي للمنتدى ونشاطي فيه قل كثيرا

عواشركم مباركة مسعودة باشما تمنيتو ان شاء الله
حبيباتي هاد السابلي كيجي لذيذ و معلك
وكيعجب الصغار و الكبار
و مقاديرو بساط جدا








سابلي بقشور ليمون و روح النوازيت و كونفيتيري


















المقادير :







كيف العادة عندي عجينة سابلي اساسية
كنعملها دائما لانها ناجحة و اقتصادية
و ممكن ضيفي عليها للي بغيتي من منكهات او اضافات انتي و ذوقك









200 g غرام زبدة لينة (أأكد زبدة ماشي مارڭرين)
150g غرام سكر ڭلاصي (او 10 معالق كبيرة )
4 معالق كبير نكهة روح النوازيت
بيضة واحدة كبيرة (البيضة الكبيرة كيكون فيها 80 غرام لو استعملتو بيض صغير عملو 2 بيضات صغار)
15 cl سنتيليتر زيت (اي 150 ميليليتر او نصف كاس عنبة او 10 معالق كبيرة زيت/ عبرو بللي يناسبكم)
500 g غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 g كنفتير الليمون(او 4 معالق كبيرة )
50 g غرام قشور الليمون (او 4 معالق كبيرة ) محكوكين رقاق كيف مبين فالصورة





للحشو و التزيين :

كنفتير الليمون على شكل جولي ليسهل العمل به ( او ممكن تصفيو كنفتير من طراف الليمون الكبيرة او تطحنوه مزيان لو مكانش متوفر عندكم جولي )


سكر ڭلاصي













الطريقة :


في إناء كنطربو الزبدة مع السكر ڭلاصي






حتى الحصول على خليط كريمي ابيض




ثم كنضيفو الزيت


 




و كنطربو مرة اخرى

ثم كنضيفو البيضة






و نطربو الكل مزيان حتى يتجانس و يعطينا كريمة موس ثقيلة


 

ثم نضيفو ليهم قشور الليمون
و نخلطوهم و نضيفو 4 معالق كنفتير

الليمون
 



كنضيفو الدقيق المنخول مع خميرة الحلوة و المايزينا ،





بشوية بشوية على الكريمة





باشما نخلتو الدقيق مزيان (مرة و 2 و 3) باشما كانت الحلوة بعد الطبخ احسن







و نعجنو الكل





و حنا كل مرة كنضيفو شوية ديال الدقيق حتى نكملوه كلو



و نضيفو روح النوازيت 














و نزيدو نعجنو الخليط
حتى تتجانس المكونات





و يتشرب العجين مزيان كل مكوناتو


و نحصولو على كرة متجانسة مكتلصقش فاليدين




نغطيوها و نخليوها ترتاح واحد نصف ساعة فالثلاجة



بعدها نخرجوها من الثلاجة و و نجهزو سطح العمل نرشوه بشوية دقيق





و نطلقوها بالمدلك مزيان عملوها بالسُّـمـْـك للي بغيتو هنا عملتها بسمك غليظ لكن من المفضلا تعمل بسُّـمـْـك رقيق باش متجيش الحلوى غليضة بعد لصقها بالكنفتير




ثم كنبداو فتشكيل السابلي ديالنا باي شكل كتفضلو
حسب المراشم للي عندكم





 



انا عملتو بشكل وريدة

وجدت الطاوة فرشتها بورق الزبدة

و ستفت فيها السابلي





حاولو تهزوه بشي ملعقة او سباتيل
باش يحافظ على شكلو و ميكونوش فيه طباع الصبيعات


















و دخلتو للفرن المسخن من قبل على درجة حرارة 180 ° 


بين 8 او 12 دقيقة حسب السخونية ديال كل فران



 






ردو ليها البال راه دغيا كطيب 




 

غير تكتاسب لو ذهبي خفيف خرجوها لما تبرد تماما اما ستفيها فعلبة حفاظة 













او لو غتقدموها حشيوها او لصقوها بالكفتير و زينوها حسب الذوق بالسكر ڭلاصي



و هنا طريقة التزيين و الحشو

الحلقات ديال السابلي المثقوبة ستفتها




و رشيت عليها السكر ڭلاصي اولا










اما الدوائر الكاملة فعملت فوق كل وحدة منها ملعقة صغيرة من جولي او كنفتير الليمون(بلا طراف الليمون)






و حطيت عليها الحلقة المزينة بالسكر ڭلاصي

كنعملو السكر ڭلاصي على الحلقات قبل منلصقوها بالكنفتير




باش يكون منظر الكنفتير باين و لامع




 



لو خلينا السكر ڭلاصي للاخير بعد منكونو لصقنا السابلي بالكنفتير مغيبقاش يبان الكنفتير فالوسط حيت غيغطيه السكر







التقديم :






قدموه بالصحة و الراحة



كيجي معلك و مقرمش فنفس الوقت





و كيذوب فالفم سهل و لذيذ
















ملاحظة :



هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة فعلبة حافظة محكومة الاغلاق كسابلي بلا متلصقوها او تحشيوها بالكنفتير
حتي تبغيو تقدموها و عاد تحشيوها او تلصقوها بالكنفتير هكا كتبقى مدة اطول مقرمشة
الكنفتير كلما بقا كلما خلاها معلكة اكثر و طبعا لذيذة
شخصيا مكتبقاش عندي مدة طويلة تبارك الله كيطير
وها ليديات بالخف

و ايضا ممكن
بدل كنفتير الليمون تعملو جولي او كنفتير بالفاكهة للي كتفضلو 
او ممكن عمل كراميل او شكلاطة 
او بدل قشر الليمون و روح النوازيت تعملو حاجات اخرى حسب ذوقكم و المتوفر عندكم
و ممكن تزيدو كمية السكر او تنقصوها حسب اذواقكم

يعني العجينة كتبقى واحدة و التنويع فالاذواق
حسب الرغبة و
المتوفر في كل مطبخ

راني حاولت نعطي المقاييس مسهلة بالغرام او السنتيليتر او حتى بالكاس و الملعقة
باش يكونو اسهل ان شاء الله للي معندهاش ادوات قياس

إن شاء الله تعجبكم الوصفة و تجربوها
و تكون اضافة جديدة و مفيدة ليكم







اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال




تحياتي للجميع بدون استثناء

اللهم اجعلنا ممن وفق في رمضــان لصيامه وقيامه و نيل عفوك و رضاك برحمتك يا ارحم الرحمـين

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية من لا تضيع ودائعه سبحانه عز و جل

اختكم أمنار

أم ريـَّــان و كـامـيليـا




وعليكم السلام ورحمة الله وبركاته




ليست هناك تعليقات:

إرسال تعليق

وصفات مشابهة

 
Paperblog