حساء الحمص باليوغورت و سكنجبير طري و الحامض الاخضر

السلام عليكم ورحمة الله وبركاته

جمعة مباركة و رمضان مبارك كريم
و عواشركم مباركة مسعودة
ان شاء الله كلكم بخير
الله يكتب لينا فهاد الايام المباركة نيل رحمته و غفرانه

ثاني وصفة لي فهاذ الشهر الفضيل لهدة السنة ان شاء الله
غتكون سوپ او حساء جد مغذي و مقوي و منعش مع هاذ الحر و فنفس الوقت سهل التحضير



و هي حساء الحمص باليوغورت و سكنجبير طري و الحامض الاخضر



نخليكم مع المقادير و الطريقة

المقادير :


350 غ حمص
5 غصون من القزبر
1 سويق من الكرفس
1 ملعقة طعام من سكنجبير طري محكوك
1 يوڭورت ديال غ 125 طبيعي دون سكر أو 125 مل كريم فريش
عصير حامضة خضراء
1 ملعقة صغيرة من الكمون
1 ملعقة صغيرة من الملح

الطريقة :

اولا لربح الوقت شخصيا كنرقد الحمص فالماء




من قبل و نحفظو فالثلاجة على الاقل 12 ساعة او ليلة كاملة ،


بعدها كنصفيه من ماء الترقاد و كنسلقو مزيان فالماء مع عريش ديال السالمية حتى كيرطاب



وكنحفظو مع الماء الباقي فاش طاب فالثلاجة لحين نحتاجو


(ملاحظة: السالمية اختيارية ، لكن دورها هو انها كتحيد الغاز من الحمص و كتحافظ على طعمو )


ملي يحين وقت التحضير

كنسخنو الحمص فالماء ديالو






و كنديروه فالخلاط الكهربائي مع القزبر و الكرافص مشلضين و سكنجبير طري محكوك و عصير حامضة خضراء صغيرة و الكامون و الملح حسب الذوق


و كنضيفو الماء فاش طاب الحمص للي خلينا على جنب

حتى نحصلو على صوبة عاقدة , عينا ميزانا حسب كثافة السوپ للي بغينا



كنسخنو السوپ ديالنا فكاسروله و نضيفو ليها اليوڭورت الطبيعي بدون سكر او الكريم فريش




و نخلطوها و نقدموها فزليفات




مزينة بعريشات قزبر و ترونش حامض و الكريم فريش

التقديم :


كنقدموها سخونة او دافية او حتى باردة

كتجي لذيذة خصوصا للي عزيز عليهم الحمص و سكنجبير طري مع مذاق الحامض الاخضر

و بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته