حلويات عقدة اللوز

السلام عليكم حبيباتي


مدام حنا على ابواب عيد الاضحى المبارك
ولابد متكونو بديتو كتوجدو لشهيواتو

فجبت ليكم مجموعة جديدة و حصرية جدا
مبتكرة من بنات افكارنا قمرة و انا

من الحلويات بعقدة اللوز

غنعطيكم المقادير و الطريقة
اما التشكيل فالصور هي للي غتعطيكم فكرة
لانه للاسف مكنقدرش نصورها وقت التشكيل بالتفاصيل
لان العمل كيكون متعب شوية


هاد المجموعة حضرناها انا و اختي الحبيبة قمرة ليل
فمناسبات متنوعة
فإن شاء الله تكون افكار جديدة و مفيدة ليكم


المقادير:


مقادير العجين:

عجين كعب غزال المعروف

حنا كنعملو الاتي:

1كيلوغرام دقيق الفورصالممتاز الخاص بالحلويات
راس ملعقة صغيرة ملح
قبصة مسكة حرة
ملعقة عسل
350 غرام زبدة لينة او مذابة
50 ميليلتر زيت
ماء الزهر لجمع العجين

و مقادير العقدة:

1كيلوغرام لوز بودرة(مسلوق و منقي و منشف و مطحون بدورة)
350 إلى 500 غرام سكر سنيدة الكمية حسب حبكم للحلاوة
2 ملاعق كبيرة عسل ليمون
رشة مسكة حرة
ملعقة روح اللوز الحلو
رشة قرفة او رشة زيست الليمون
2 بياض البيض
ماء الزهر لجمع العجين
150 غرام زبدة اقل او اكثر حسب نوعية اللوز

مقادير التزيين:
ملونات غذائية
بريون متعدد الالوان
عسل + ماء الزهر للتلميع


الطريقة:

اولا بالنسبة لعجين اللف (عجين الكعبة)

كنخلطو كل النواشف

الدقيق + راس ملعقة صغيرة ملح+ قبصة مسكة حرة مدقوقة مزيان منيلة
ثم كنضيفو الزبدة المذابة و زيت + ملعقة عسل
و كنرملو العجين كيف كنعملو مع العجين المرمل پات بريزي
بعد ميترمل العجين و يتبسبس مزيان
كنضيفو ماء الزهر حتى تجمع العجينة و نحصلو على عجين متماسك لين قابل للمط اي كيتجبد


نقصموه كويرات حسسب الحاجة و نلونو كل كرة حسب الرغبة او نحليوها عادية
ن نعملوها فبلاستيك غذائي و نخليوها ترتاح 15 دقيقة على جنب

و ندوزو نوجدو العقدة


كناخذو اللوز بودرة(مسلوق و منقي و منشف و مطحون بدورة)
كنطحنوه مع السكر حتى يتعجن و نضيفو ليه 2 بياض البيض
و ملعقتين كبيرة عسل ليمون + رشة مسكة حرة مدقوقة و منيلة
+ملعقة روح اللوز الحلو + رشة قرفة او رشة زيست الليمون

ثم نضيفو الزبدة حسب تزيات اللوز و نعجنو الكل بقليل من ماء الزهر حسب حاجة العجين للسائل
حتى نحصلو على عجينة متماسكة و طيعة لينة سهلة التشكيل

نخليوها ترتاح و تتشرب 15 دقيقة
و نجهزو الدوات العمل (المراشم الطوابع ...)
و نبداو العمل حسب جود مخيلتنا

نمدو العجين رقيق بالدلاك او بآلة المعجنات 2 الى 1،5 ميليميترات لا اكثر
و نشكلوها بعجينة اللوز و نغلفوها بيها حسب الشكل للي بغينا

بعد منكملو تشكيل كل الحلويات
لابد نخليوها ترتاح على الاقل 4 ساعات (هذا سر نجاح حلويات اللوز)
ثم نخبزوها ففرن مسبق التسخين على درجة حرارة 150 إلى 180 حسب سخونة فرنكم
مدة بين 15 و 20 دقيقة و ردو معاها البال و هي فالفرن
خصها تذهب من التحت فقط و الفو يبا محافظ على لونو الطبيعي
يعني طيب بلا متتحمر

ملي تقرب تخرج من الفرن

جهزو العسل الملمع
كنذوبو العسل فقليل من ماء الزهر

و كنغمسو فيه الحلويات باش يعطيها اللمعان و ايضا الحلاوة المميزة ديال العسل و الزهر
ثم كنرشوها بالملمعات حسب اللون المفضل

و نحفظوها فالثلاجة او الكونجيلاتور حسب الرغبة
ملي تبغيو تقدموها جبدوها حتى تكتاسب درجة حرارة المطبخ و قدموها بالصحة و الراحة


للعلم هاد الشكيلات كنا جهزناهم فأعراس و سبوع ...
و ان شاء الله نحاول نزل ليكم اشكال اخرى
دابا تقريبا وريتكم اكثر من 40 شكل من شكيلاتنا
ان شاء الله نزيدكم الخير

لكن حبيباتي طلبي ليكم هو الدعاء الطيب
لي و لاختي لانها هي المتخصصة فالحلويات انا غير داخلة الزحام ههههه
فلا تحرمننا من صادق الدعاء و طيبه


اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم



مع تحيات حبيبتي

قمرة ليل


أمنــار

أم ريـَّــان
وعليكم السلام ورحمة الله وبركاته