بحث هذه المدونة الإلكترونية

الخميس، 27 فبراير 2014

كيك الهدية المحشوة


السلام عليكم ورحمة الله وبركاته


 

 حبيباتي لكن وحشة كبـــــــــــــــيــــــــــــــرة بــــــــــــــزاف 
تـوحشتكم 
توحشتكم 
تـــــــــــــــوحشتكم 

غيابي طال و شوقي ليكم أطول و اكبر 
ان شاء الله تكونو كلكم بخير و على خير 




المهم منزيدش نطول عليكم نخليكم مع المفيد 
و باش منرجعش بيدي خاويين 
وصفتي لليوم ان شاء الله غتكون عبارة عن كيك هدية





كيجي رائع فالطعم و التقديم 




و ممكن طبعا تففنو فيه كيف بغيتو حدودكم هي خيالكم  ننتقل للوصفة 






المقادير هي




 مقادير الكيك  :


استعملت عجينة كيك معتمدة عندي للكيك للي كيكون اساس للحشو و التزيين 
لو تبعتو الطريقة بالتفصيل بإذن الله غتنجح معكم و تعطيكم نتيجة جيدة كل مرة 
سهلة فالتشكيل بها و ايضا خفتها و طعمها كيناسبو الكيك المزين يعني كيك المناسبات ... 

يمكن تضاعفو المقادير حسب الحاجة
 لكن اهم حاجة انكم تكونو جهزتو كل المقادير قبل البدء فالتحضير 
و يكونو بدرجة حرارة المطبخ و هذا مهم جدا لنجاح الكيك بشكل عام لكن لا باس من التذكير 


غرام 100 دقيق 
غرام 50 نشا الذرة 
غرام50 (او 75 غرام)سكر سنيدة
غرام 50 (او 75 غرام)سكر ڭلاصي / ناعم/ بودرة/ الصقيل

( حسب درجة الحلاوة للي بغيتو شخصيا كنعمل 100 غرام سكر 50 غ سنيدة 50 غ ڭلاصي فقط) 
اربعة بيضات كبيرة الحجم (لو كانت متوسطة تستعمل 5 اما لو كان البيض من الحجم الصغير فيفضل استعمال 6 بيضات ) 
غرام 50 زبدة ذايبة
ملعقة طعام خل 
قبصة ملح 
ملعقة نكهة النوڭاتين او البندق
نصف ملعقة صغيرة بيكاربونات الصودا 
ملعقة صغيرة خميرة الحلوى 




مقادير الحشوة : 

موس الشوكولاطة السوداء سبق و نزلت الطريقة ديالها 
غتلقاوها فهذ الرابط 
 اللوز مهرمش 
مورانك مفرتت قطع كبيرة 
قطع صغيرة شوكولاطة سوداء و شكلاطة بالكاراميل ممكن تستعملو اي نوع كتفضلو بدون ذكر ماركات 



مقادير طبقة التزيين :

 عجينة السكر استعملت الجاهزة 
نسمتها بنكهة الڤانيلا و اللوز 
لتلوينها استعملت الشكلاطة السوداء و القهوة السريعة الذوبان بدل ألوان الطعام 
ممكن تستعملو الالوان للي بغيتو حسب الذوق الطريقة : 


و بعد بسم الله نبداو فالتحضير  


الطريقة : 



اولا جهزت الموس 

و قسمتو لزوج كميات 

الكمية الولى يكون فيها الثلث 1/3 
و الثانية  2/3الثلثان ديال الموس

نخليو الثلت الاول كيف هو 
باش ندهنو بيها الكيك و نغلفوه بيها
 اما الثلثان للي بقاو كنضيفو ليها  اللوز مقطع قطع كبيرة و 




قطع الشكلاطة و قطع الكاراميل او اي اضافة بغيتو للي غتعطي للموس نوع من التيكستور يعني يجي معلك و كيتحس تحت السنان ماشي غير موس رطبة  و هي باش غنحشيو الفراغ الداخلي للكيك




و دخلتها للثلاجة تشد راسها باش يسهال العمل بيها اكثر 
و هنا غتلقاو الطريقة المعتمدة عندي لموس الشوكولاطة 


بعدها جهزت الكيك للاسف مصورتش المراحل لاني كنت مزروبة ان شاء الله اعيد تصوير
 الطريقة بالتفصيل 


 1
اولا كنجهزو الطاوة او المول للي غنطيبو فيه الكيك ندهنوه بالزبدة و الدقيق كيف العادة او نفرشوه بورق الزبدة او للو كان مول سليكون ممكن مندهنوهش او غير نرشوه بشوية  دهن لتفادي اي مفاجآت  



2
كنسخنو الفرن على درجة حرارة 150 الى 180 حسب الفرن ديالكم كل فرن و درجة سخونتو و كل وحدة مع التجربة كتولي تعرف فرنها 



3
كنخلو المقادير  الجافة; الدقيق مع البيكاربونات و خميرة الحلويات و النشا مزيان 
ممكن تنخلوه عدة مرات كلما تنخل و دخل ليه الهوا كلما جا الكيك اسفنجي اكثر 






4
كنقسمو البيض 
البياض في اناء نضيف و جاف مع قبصة الملح 
و الصفار في اناء اخر نضيف و جاف مع السكر نصف كمية السكر



5
قبل منبداو فتطريب البيض  نسخنو الإناء للي كنطربو فيه لانه كلما كان دافي كلما ساعد فطلوع البيض و مضاعفة الكمية ديالو و هذا غيبان ليكم بالتجربة 

ممكن اما تسخنو  الاناء فارغ حتى يدفى فالفرن   نخرجوه و  نوضعو فيه البيض
او على طريقة حمام مريم  نطربو مباشرة فوقو باش يوفر لينا الحرارة اللازمة لتسريع و انجاح طلوع البيض
هو تفصيل  بسيط لكن كيعطي فرق كبير فنجاح الحلوى


  6
نطربو بياض البيض ملي يبدا يطلع نضيفو ليه سكر ڭلاصي مع الاستمرار فالتطريب 
حتى الحصول على شكل المورانك يعني يكون البياض كريمي املس و ناعم منطربوهش اكثر من القياس باش ميتكثلش لينا و يتكسر و فكيف كيقولو البروفيسيونيل نطربوه حتى الحصول على المنقار يعني الطراب لما كنهزوه من بياض البيض كيطلع شكل منقار املس مكيطيحش لا من الطراب لا من الإناء



7
نطربو صفار البيض مع السكر سنيدة مزيان حتى نحصلو على خليط كريمي مائل للون الابيض كثيف كيصبح تقريبا 3 الى 4 اضعاف الحجم الاصلي 
تم تضيفو ليه ملعقة الخل و الزبدة ذايبة  و الڤانيلا و نطربو الكل مزيان حتى الحصول على كريمة متجانسة
8
كنضيفو خليط صفار البيض على خليط بياض البيض غير بالمهل نخلطوه بلا منزلوه نخلطو بالسباتولا او ملعقة خشبية مسطحة  بطريقة الدوران و الطي برفق شديد بحالا كنطويو الخليط  ثم نضيفو ليه خليط المقادير الجافة اي الدقيق مع البيكاربونات و خميرة الحلويات و النشا مزيان للي سبق و نخلناها مزيان  نضيفوه على 3 دفعات و دائما نخلطو بالمهل بنفس طريقة الطي بكل رفق باش منخسروش العجين ديالنا 



9

نزلو العجين ديالنا فالاطة او الطاوة او المول للي
سبق و جهزنا
نخليوه يرتاح واحد 2 دقائق باش ياخد شكل المول بتساوي
و ندخلوه للفرن المسبق التسخين فالرف الاوسط  على درجة حرارة 150 الى 180 حسب سخونة الفرن ديالكم لو عندكم الفرفارة فالفرن يكون افضل كتعطي نتائج ممتازة للكيك
مدة الطهي حسب المول للي استخدمتو و السمك للي غيعطي للكيك يعني الطهو ممكن ياخذ من 10 الى 30 دقيقة
انا هنا استخدمت طاوة مستطيلة كبيرة خدات فيها عجينة الكيك سمك 0.5 سنتيميتر تقريبا  و لما طابت خدات سمك 1 سنتيمير ارتفاع و طيبتها لمدة 10 دقائق على درجة 180 مع استخدام الفرفارة 
كلما زاد سمك العجين كلما زاد وقت الطهي


بعد مطابت خرجتها و خليتها تبرد على جنب




10
و جهزت كل مواد التزيين انا اختاريت نعمل كيك الهدية محشو من الداخل يعني فيه فراغ داخلي حشيتو بالموس و المورانك و اللوز و قطع الشوكولا و الكاراميل ممكن تعملوه حسب ذوقكم محشي او فقط طبقات كيك بدون فراغ

بعد مبرد الكيك تماما قطعتو كيف مبين فالصور لمستطيلات و شرائط للي غنشكل بيها شكل العلبة
تبعو الصور راها كتشرح الطريقة بالتفصيل







كنحط الطبقة الاولى من الكيك و هي المستطيل الاول الاساس للعلبة
كندهنها بالموس









كنحط شرائط بشكل جدار العلبة يعني الداخل كيبقى فارغ











كنعمر الفراغ بالمورانغ مفرتت قطع كبيرة باش تعطينا القرمشة 








كنغطي الكل بالموس بشكل جيد و نعمر كل الفراغات









و نضيف طبقة 2 من الشرائط بنفس الشكل لتشكيل جدار العلبة لع ترك الوسط فارغ










كنعمر الفراغ باللوز مهرمش او مقطع قطع كبيرة 









و مرة اخرى كنغطي الكل بالموس بشكل جيد و نعمر كل الفراغات











و كنعمل طبقة 3 من الكيك هاد المرة تغطي المستطيل كامل بدون ترك فراغ الوسط باش تعطي قوة للكيك مينزلش 









و ندهنها بالموس بشكل جيد


و كنعمل بنف
س الطريقة شرائط بشكل جدار العلبة يعني الداخل كيبقى فارغ

و نعمر الفراغ بطبقة 2 من المورانڭ









و نعمر الكل بموش الشكلاطة مع ملئ كل الفراغات











و نعمل طبقة اخرى من شرائط الكيك بنفس الطريقة السابقة









نعمر الفراغ بقطع اللوز 










ونعمر كل الفراغات بالموس

و نحط فوقها اخر مستطيل  






و ندهنوه مزيان بالموس للي سبق و خلينا على جنب بدون اضافات













نحاولو نغطيو كل الكيك و نعمرو كل الفراغات و نقادو القنات قدر المستطاع باش يجينا شكل العلبة متناسق















ندخلوه للثلاجة باش تاخذ الموس شكل الكيك و تبرد

و نجهزو سطح العمل بعجينة السكر
انا استعملت العجينة الجاهزة نسمتها بالڤانيلا و اللوز 











نرش سطح العمل بشوية نشا او سكر ڭلاصي و نسرح عجينة السكر حسب السمك للي بغيتو شخصيا كنحاول نرققها ما امكن لانها ببساطة ســــــكـــــــــــــــر كتعجب الوليدات لكن حلوة بزاف (بالنسبة لي) لو اول مرة غتستعملوها مترققوهاش بزاف لانها غتتكسر ليكم لما تبغيو تنزلوها فوق الكيك لكن مع التجريب كيولي التعامل معها اسلس




















سرحت العجين مزيان بشكل متساوي 











و خرجت الكيك ديالي من الثلاجة و نزلت فوقو عجينة السكر كيف مبين فالصور













حاولو تخرجو اي هواء بين الكيك و عجين السكر
حاولت نعطيها شكل الكيك او العلبة ما امكن غير بالمهل متزربوش 
















لما خذات شكل العلبة قطعت الزوائد 










و حذيت كويرة صغيرة من الزوائد بحجم مشمشة صغيرة
و لونتها ببودرة الشوكولاطة السوداء و قليل من القهوة الزريعة الذوبان 










و دلكتها بيدي مزيان حتى تشربات اللون
حذيت قطع من زوائد عجين السكر المتبقية و ضفتها للكرة للي لونت باش عطاتني الشكل الرخامي كيف مبين فالصور









دلكتها بيدي على شكل حربوش او بودان  مستطيل










و بعدها
دلكتها بالدلاك حتى حصلت على شريط بالسمك و الطول للي بغيت 





و للي غيدور على العلبة باش يعطي شكل الريبون للي كنزينو بيه الهدايا
قطعت الشريط لشرائط ارق باش نحصل على 3 شرائط مقادة بدون زوائد












الشريط الاول خليتو طويل باش نزلو على القطر الاطول للعلبة
الشريط الثاني كان اقصر منو شوية لاني غنزلو على القطر الاصغر للعلبة
اما الشريط الثالث فقطعتو لشرائط صغيرة باش نعمل بيها الوردة او الريبون المزين للي كيكون فوق الهدية









كيف مبين فالصورة حاوت نعطيها شكل الپاپيون او العين باش تجيني اسهل فالتشكيل الصور تشرح اكثر












بعد مكنزل الشريط الاول و الثاني على العلبة على شكل ربطة الهدية
بديت كنزينها بالقطع للي جهزت لو خفتو متلصقش ممكن تدهنو بمسحة ماء غير مسحة ماشي اكثر و الا عتذوب ليكم العجينة ديال السكر (السكر كيذوب فالماء متنساوش)











الصور كتشرح اكثر الطريقة باش عملت ربطة الريبون










حاولت تصويرها من عدة زوايا باش تبان الطريقة باش ركبت الشرائط فوق بعضها لإعطاء الشكل المطلوب








ممكن تخليو الكيك مغلف كعلبة هدية دون تزيين و ممكن نزيدو  نزينيو حسب الذوق 









انا استخدمت البقايا ديال عجين السكر الرخامي قطعت منو نجيمات صغيرة باحجام مختلفة  بقطاعة الحلوى و لصقتها بشكل عشوائي على سطح الكيك باستخدام فرشات تلوين مبللة بشوية ماء غير شوية باش ميدوبش عجين السكر و ميديعش للون الرخامي فالابيض

ما لي تكملو التزيين دخلوها للثلاجة لحين التقديم

سمحو لي مصورتش هذ المرحلة ديال تقطيع و إلصاق النجيمات لانني كنت كنوجد العشا و مبقاش لي الوقت على وصول راجلي و مدام هي هدية مفاجئة كان حصني نكملها و نخبيها فالثلاجة قبل ميجي و يشوفها باش يبقى لي اثر المفاجأة

ممكن تجهزوها 3 ايام قبل التقديم كتبقى مزيانة شكلا و طعما مع الحفظ فالثلاجة فعلبة او اي حافظة طعام باش ميشربش الكيك روائح الطعام للي فالثلاجة





لو كان الكيك مخصص للاطفال ممكن تحشيوه بالحلويات العزيزة عليهم بحال الإمينيمز او الڭومة او اي فنيد او حلوى كيبغيو وليداتكم 
ايضا العجين نفسو ممكن تلونوه كيف بغيتو 
و فالتزيين ممكن تتفننو فالتلوين و التشكيل حسب الذوق
و كتبقى الفك
رة من حشو الكيك من الداخل هو خلق المفاجأة لما كيتقطع و كتظهر الحشوة
و ماشي بالضروري تغلفوه بعجين السكر ممكن تغليفو بالموس فقط او بالكريمة او كريمة الزبدة او غيرها من مغلفات الكيك للي غتعطي شكل العلبة
و ايضا حجم و شكل العلبة ممكن انتم تختاروه انا هنا عملتها مستطيلة ممكن تعملوها مربعة او معينة او دائرية على شكل اسطوانة و كتبقى طريقة التشكيل و التركيب هي هي و المراحل نفسها

واخا كتبان صعبة راها سهلة و بإذن الله غتنال اعجاب وليداتكم ازواجكم و ضيوفكم
 















التقديم :
















قدموها بالصحة و الراحة للي عزيز عليكم 










انا وجدتها لمناسبة لراجلي و جهزتها فقط ب 15 ساعة قبل التقديم
جهزتها بكل الخطوات (من الموس للكيك للشكل النهائي) بعد العصر
و قدمتها فالصباح بكري كمفاجئة قبل ميخرج للخدمة و ريان للمدرسة
بكل بساطة فطرنا بيها هههههه










عطيت هاد الديتاي باش متخلعكمش المراحل راها بسيطة و سريعة التحضير كيخص غير شوية الصبر و الترتيب المسبق و النتيجة بــــنـــــينة



























 

 و هنا كيبان الكيك و الحشوة بعد التقطيع
غتشوفو قطع اللوز و المورانك و الشوكولا و الكاراميل فالموس
و هي للي كتزيد تعطي قوام و غنى للكيك و الموس








ان شاء الله تنال اعجابكم و تجربوها و تردو عليا الخبار


و طبعا ممكن تتفنو فشكل الكيك سواء ا على شكل علب الهدايا او اي شكل بغيتو
الاساس كيبقى واحد اما التشكيل و التزيين فراجع ليكم
أطلقوا العنان لخيالكم :)



اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال




تحياتي للجميع بدون استثناء

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية من لا تضيع ودائعه سبحانه عز و جل

اختكم أمنار

أم ريـَّــان و كـامـيليـا




وعليكم السلام ورحمة الله وبركاته

الجمعة، 21 فبراير 2014

طال الغياب و طال شوقي ليكم

السلام عليكم و رحمة الله

طال الغياب و طال شوقي ليكم
و ان شاء الله العودة قريبة بإذن الله


للاسف الكثير من الوصفات فالمدونة تمسحات منها الصور
لكن بإذن الله غنحاول نعاود تنزيلها فاقرب وقت
الله المستعان 

اشواقي و تحياتي
amanarre

السبت، 18 أغسطس 2012

عجينتي اللينة للمعجنات








السلام عليكم ورحمة الله وبركاته

عواشركم مباركة

الله يكتب لينا فهاد الايام المباركة نيل رحمته و غفرانه

أتمناكن جميعا بخير

و أسأل الله أن يجعل شهر رمضان الفضيل شهر رحمة ومغفرة وعتق لنا جميعا
توحشتكم بزاف

و غيابي عنكم مزاد الا شوقي ليكم

و ان شاء الله نرجع نشارككم
الله لا يحرمني من مجمعكم الطيب
واستسمح بشدة لأن دخولي للمدونة ونشاطي قل كثيرا
لكن مع تجهيزي للرحيل مرة اخرى معنديش وقت كثير للاسف و الغياب غيزيد

  ندوزو للمهم



حبوباتي هاذي وصفة عجينتي اللينة للمعجنات









و الخدمة بيها ساهلة كتجي طيعة فاليد

و لذيذة و ممكن تتفنو فيها و تشكلوها كيف بغيتو و تنوعو فحشواتها



ان شاء الله تنال اعجابكم

نخليكم مع المقادير و الطريقة











المقادير :





سل
75 اي نصف كاس عنبة زبدة مدوبة
 سل 75 اي نصف كاس عنبة زيت
 
غرام50  اي نصف كاس عنبة حليب بودرة
  سل
150 اي كاس عنبة ماء دافي
 
غرام  350 اي 4 كيسان عنبة دقيق منخول
( كاس العنبة الواحد كيهز تقريبا 80 غرام دقيق منخول ماشي مدقص 

و كنأكد على ان الدقيق يكون منخول 
يعني تدوزوه فالغربال باش يكون خفيف 
و ميكونش مكور لان هذا كيلعب دور كبير فطراوة و جودة العجين النهائي
  ملعقة
1 عامرة صغيرة خميرة الخبز
  ملعقة
1 عامرة صغيرةخميرة الحلوى
  ملعقة
1 كبيرة سكر
  معالق
2 صغيرة خل
ملح


يمكن اضافة الماء الدافىء حسب نوعية الدقيق و شربو للماء
عادة كنعملو نصف كمية الدقيق
سائل لكن المقدار كيبقى تقريبي حسب تشرب الدقيق للسوائل كاين انواع كتتشرب اكثر و اخرى اقل لذلك جودة الدقيق كتلعب دور كبير


 




الطريقة :












هاد العجينة ممكن تحضيرها مسبقا و حفظها فالثلاجة او الكونجيلاتور لحين الحاجة لاستخدامها




كنسخن اولا الازبدة تذوب و نضيف ليها الزيت



و فإناء العجن كنعمل كاس ديال الدقيق منخول



مع نصف كاس حليب بودرة و ملعقة خميرة الخبز و السكر و 2 معالق صغيرة خل

و نضيف ليه خليط الزبدة و الزيت الدافىء و كاس الماء الدافىء 




و نخلطهم مزيان حتى يتمازجو مزيان و يتجانسو
ثم نضيف الملح للخليط 



  نخليها ترتاح شوية باش تتفاعل الخميرة و تشكل فقاعات











ثم نضيف الكمية الباقية من الدقيق بشويه بشوية حتى تتكون عندي عجينة رطيطبة 




 
نخدمها مزينا و ندلكها حتى تتكور و تولي متناسقة الشكل و متبقاش تتلصق فاليد او الروبو










ملاحظة : كيخص العجين يتخدم و يتدلك مزيان كلما دلكتيه كلما حصلتي على نتيجة احسن



هاد العجينة راها كتصلاح لكل المعجنات و الخدمة بيها سهلة
حيت كتجي طيعة فاليد و رطبة ، ممكن ديرو بيها المعجنات المالحة و الحلوة
و ممكن تعملوها و تحفظوها فالمجمد لحين الحاجة





لما كنبغي نستعملها كنخرجها من الثلاجة و نخليها ترتاح فحرارة المطبخ


و نجهز سطح العمل










نرشيو بالدقيق



و ندلك العجينة










حتى نحصل على السمك للي بغيت





انا هنا عملتها رقييقة 1 ميليميتر فالسمك تقريبا كيف مبين فالصورة 

كيف قلت عجينة لينة و طيعة فاليد كتسهل الخدمة بيها

و تبداو تشكلو بيها معجناتكم كيف تشهيتو
ممكن تعملو بيها الشوصون و الطارطات و الطورت و البيتزا و المحاشي بانواعها



و هاذي صور بعض المعجنات للي كنعمل بهاد العجينة




















 ...






 




ان شاء الله تجربوها و تردو عليا خبر


اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال




تحياتي للجميع بدون استثناء

اللهم اجعلنا ممن وفق في رمضــان لصيامه وقيامه و نيل عفوك و رضاك برحمتك يا ارحم الرحمـين

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية من لا تضيع ودائعه سبحانه عز و جل

اختكم أمنار

أم ريـَّــان و كـامـيليـا




وعليكم السلام ورحمة الله وبركاته

وصفات مشابهة

 
Paperblog