شــهــــيــوات أمــنــار

السبت، 6 نوفمبر 2010

حلويات عقدة اللوز

السلام عليكم حبيباتي

مدام حنا على ابواب عيد الاضحى المبارك
ولابد متكونو بديتو كتوجدو لشهيواتو

فجبت ليكم مجموعة جديدة و حصرية جدا
مبتكرة من بنات افكارنا قمرة و انا

من الحلويات بعقدة اللوز

غنعطيكم المقادير و الطريقة
اما التشكيل فالصور هي للي غتعطيكم فكرة
لانه للاسف مكنقدرش نصورها وقت التشكيل بالتفاصيل
لان العمل كيكون متعب شوية

هاد المجموعة حضرناها انا و اختي الحبيبة قمرة ليل
فمناسبات متنوعة
فإن شاء الله تكون افكار جديدة و مفيدة ليكم

المقادير:

مقادير العجين:

عجين كعب غزال المعروف

حنا كنعملو الاتي:

1كيلوغرام دقيق الفورصالممتاز الخاص بالحلويات
راس ملعقة صغيرة ملح
قبصة مسكة حرة
ملعقة عسل
350 غرام زبدة لينة او مذابة
50 ميليلتر زيت
ماء الزهر لجمع العجين

و مقادير العقدة:

1كيلوغرام لوز بودرة(مسلوق و منقي و منشف و مطحون بدورة)
350 إلى 500 غرام سكر سنيدة الكمية حسب حبكم للحلاوة
2 ملاعق كبيرة عسل ليمون
رشة مسكة حرة
ملعقة روح اللوز الحلو
رشة قرفة او رشة زيست الليمون
2 بياض البيض
ماء الزهر لجمع العجين
150 غرام زبدة اقل او اكثر حسب نوعية اللوز

مقادير التزيين:
ملونات غذائية
بريون متعدد الالوان
عسل + ماء الزهر للتلميع

الطريقة:

اولا بالنسبة لعجين اللف (عجين الكعبة)

كنخلطو كل النواشف

الدقيق + راس ملعقة صغيرة ملح+ قبصة مسكة حرة مدقوقة مزيان منيلة
ثم كنضيفو الزبدة المذابة و زيت + ملعقة عسل
و كنرملو العجين كيف كنعملو مع العجين المرمل پات بريزي
بعد ميترمل العجين و يتبسبس مزيان
كنضيفو ماء الزهر حتى تجمع العجينة و نحصلو على عجين متماسك لين قابل للمط اي كيتجبد

نقصموه كويرات حسسب الحاجة و نلونو كل كرة حسب الرغبة او نحليوها عادية
ن نعملوها فبلاستيك غذائي و نخليوها ترتاح 15 دقيقة على جنب

و ندوزو نوجدو العقدة

كناخذو اللوز بودرة(مسلوق و منقي و منشف و مطحون بدورة)
كنطحنوه مع السكر حتى يتعجن و نضيفو ليه 2 بياض البيض
و ملعقتين كبيرة عسل ليمون + رشة مسكة حرة مدقوقة و منيلة
+ملعقة روح اللوز الحلو + رشة قرفة او رشة زيست الليمون

ثم نضيفو الزبدة حسب تزيات اللوز و نعجنو الكل بقليل من ماء الزهر حسب حاجة العجين للسائل
حتى نحصلو على عجينة متماسكة و طيعة لينة سهلة التشكيل

نخليوها ترتاح و تتشرب 15 دقيقة
و نجهزو الدوات العمل (المراشم الطوابع ...)
و نبداو العمل حسب جود مخيلتنا

نمدو العجين رقيق بالدلاك او بآلة المعجنات 2 الى 1،5 ميليميترات لا اكثر
و نشكلوها بعجينة اللوز و نغلفوها بيها حسب الشكل للي بغينا

بعد منكملو تشكيل كل الحلويات
لابد نخليوها ترتاح على الاقل 4 ساعات (هذا سر نجاح حلويات اللوز)
ثم نخبزوها ففرن مسبق التسخين على درجة حرارة 150 إلى 180 حسب سخونة فرنكم
مدة بين 15 و 20 دقيقة و ردو معاها البال و هي فالفرن
خصها تذهب من التحت فقط و الفو يبا محافظ على لونو الطبيعي
يعني طيب بلا متتحمر

ملي تقرب تخرج من الفرن

جهزو العسل الملمع
كنذوبو العسل فقليل من ماء الزهر

و كنغمسو فيه الحلويات باش يعطيها اللمعان و ايضا الحلاوة المميزة ديال العسل و الزهر
ثم كنرشوها بالملمعات حسب اللون المفضل

و نحفظوها فالثلاجة او الكونجيلاتور حسب الرغبة
ملي تبغيو تقدموها جبدوها حتى تكتاسب درجة حرارة المطبخ و قدموها بالصحة و الراحة

للعلم هاد الشكيلات كنا جهزناهم فأعراس و سبوع ...
و ان شاء الله نحاول نزل ليكم اشكال اخرى
دابا تقريبا وريتكم اكثر من 40 شكل من شكيلاتنا
ان شاء الله نزيدكم الخير

لكن حبيباتي طلبي ليكم هو الدعاء الطيب
لي و لاختي لانها هي المتخصصة فالحلويات انا غير داخلة الزحام ههههه
فلا تحرمننا من صادق الدعاء و طيبه

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

مع تحيات حبيبتي

قمرة ليل

أمنــار

أم ريـَّــان
وعليكم السلام ورحمة الله وبركاته

الجمعة، 5 نوفمبر 2010

سلطة الخص و الليمون

السلام عليكم و رحمة الله

هاد الطبق ديال السلطة

معروف تقليدي و عصري فنفس الوقت
و هو سلطة و ديسير حسب الذوق
و مقاديرو بسيطة و سهلة التحضير
و ممكن تعويض الليمون باي فاكهة اخرى متوفرة
و كيبقى ليكم كل الحرية فالتفنن فالتقديم .

المقادير :

الخص
الليمون
خل
سكر( او ساشي سكر الفاني)
قرفة

الطريقة :

نغسلو الخص و نقيوه و نشفوه مزيان و نقطعوه لشرائح طويلة

و كذلك الليمون نغسلوه و نقيوه و نقطعوه لشرائح دوائر رفيعة
نقطعو بعضها على 4 و نخليو البعض على شكل دائرة للتزيين

فإناء نخلطو الخص مع الخل و السكر و قطع الليمون و القرفة

و نفرشوها فطبق التقديم و نزينوها بشرائح الليمون مرشوشة بالقرفة ( و السكر حسب الذوق)

التقديم :

و نقدموها فالحين

بالصحة و الراحة

ملاحظة:

الخص و كل الخضر الورقية مكتصبرش بعد التتبيل يعني متعملو ليها الصوص و التوابل حتى تبغيو تقدوها، لانها كتتاكسد و كتدبال بسرعة ، فخليوها ناشفة لحين التقديم عاد تبلوها كيف بغيتو.

اللهم ادمها نعمة و بارك لنا فيها
و اكتب لي بها حسنة ترضاها
و اجعل فيها الصحة و العافية

الله يرزقنا و إياكم خيرات الدارين
و لا يحرمنا من طيبات الجنة و نعيمها
دمتم في رعاية الكريم

أمنــار
أم ريـَّــان

خبيزات

السلام عليكم

حبيباتي هاد الخبيزات مقاديرهم سهلة و بسيطة
و كيليقو يترفقو مع اي وجبة

ممكن تعملو بيها سندويتش
او تعمروها باي حشوة او تاكلو بيها اطباقكم ...

المقادير :

كيلوغرام دقيق فورص الممتاز
ملعقة كبيرة خميرة الخبز (انا كنستعمل الخميرة حبوب)
ملعقة كبيرة سكر
ملعقة كبيرة ملح
فنجان زيت
ملعقة صغيرة خميرة الحلوى
ملعقة صغيرة فاني للتنسيم(اختياري)
ماء دافي للعجن

الطريقة :

في إناء العجين ذوبت خميرة الخبز مع خميرة الحلوي
و السكر و كاس من دقيق الفورص و كاس ماء دافي
خلطت الكل
و غطيت الاناء وخليتها تتخمر و تتفاعل
حتى تضاعف حجمها.

بعد مخمر الخليط ضفت عليه الملح و الفاني و فنجان الزيت و الكمية المتبقية من الدقيق

و عملتو فالعجان يتدلك و يتعجن مزيــــان

و كنضيف الماء الدافي بشوية بشوية عيني ميزاني لان العجين خصو يكون لين

عجنتها على السرعة 1 و كنت كنوقف العجان كل 3 دقائق ترتاح العجينة و نعاود نخدمو باش يكون فيها الهواء كثير و تخفاف

كيخص العجينة تكون لينة و خفيفة و متمازجة مزيان، يعني رطبة لكن مكتلصقش فاليدين ملي تكوروها

لاحظو الفقاعات الصغيرة كيتبين ان العجينة مهوية و معجونة مزيان

بعد متعجن نخليوها ترتاح ،و تخمر فالاناء غطيوها واحد ربع ساعة

و متعجنوهاش بعد مترتاح حاولو تبقا فيها فقاعات الهواء باش تجي خفيفة و منفوخة
نوجدو سطح العمل ؛ نرشوه بالدقيق

و ناخذو العجينة نقسموها الى كويرات بحجم متوسط و نستفوها فطاوة مدهونة

و نحهاولو نخليو فراغ كافي بين الكرات باش ميلصقوش بعد التخمير و الخبز!

نغطيوها و نخليوها تخمر و يتضاعف حجمها
و ندخلوها للفرن ،
ممكن دهنوها لو حبيتو بالبيض او بالحليب منسم ، او بالڭليكوز مداب فالماء الساخن، و ترشوها بالزنجلان او السانوج

انا دهنتها بالحليب منسم بالفاني و سكر و خليتها عادية بلا رش !

و هاهيا بعد مطابت

و طبعا كنعملها بكمية كبيرة و نستف فالكونجيلاتور كيف العادة

التقديم:

قدموها بالصحة و الراحة كيفما بغيتو
سندويتش ، او مرفق لاطباقكم ...

ملاحظة:
نوع و جودة الدقيق المستعمل كيلعب دور كبير فنجاح المعجنات عامة ،
لذلك حاولو تتاكدو من ان الدقيق جديد
و لونو ميكونش مايل للبيج او الرمادي ،
و لما تشدوه بين صباحكم يتساس بالخف بلا ميخلي تكتلات،
لانه للي كيتكتل كيكون شبع رطوبة و بداتو الغمولة
فمكيعطيش نتائج مزيانة فالمعجنات!