أومليت بالخرطال و صوص الصوجا

السلام عليكم ورحمة الله وبركاته

اليوم غنقدم ليكم هاد الامليت




بالبيض طبعا و الشوفان و الحليب و الصوجا



كتجي زوينة للفطور او الكاسكروط او عشى خفيف
ان شاء الله تكون اضافة جديدة لوصفاتكم


نخليكم مع المقادير و الطريقة

المقادير :





حسب عدد الاشخاص





بيض
ملعقة صغيرة خرطال /شوفان لكل بيضة
(طبعا كنستعمل الخرطال المعلب الجاهز لانه اسهل فالطبخ)
حليب لترطيب الخرطال (ملعقة كبيرة حليب لكل ملعقة صغيرة خرطال)
رشة سكر
ملح
قطرات من صوص الصوجا
معدنوس للتزيين












الطريقة:





اولا كناخذو الخرطال و نضيفو عليه الحليب باش يترطب




و كنهرسو البيض فانية و كنضيفو ليه التوابل



قليل من الملح و رشة سكر و قطرات من صوص الصوجا




ثم كنضيفو للكل الخرطال المرطب بالحليب



و كنخلطو بالطراب لتتجانس المكونات




و فهاد الاثناء كنكونو دهنا المقلات بالزيت او الزبدة غير طبقة خفيفة




انا كيف مبين فالصورة كندهن بشيتتة المطبخ





و كنديرو المقلات تسخن




و نكبو فيها خليط الامليط





و نخليوه يطيب على نار مهيلة الى متوسطة




بعد متنضج الامليت كنرشو عليها المعدنوس مشلض

التقديم :








و نقدموها سخونة او دافية او حتى باردة










فطبق التقديم




مرفقة بالخبز او فقط تكال بالفرشيط لانها غداء متكامل



البيض و الخرطال كيكملو بعضهم البروتينات و الالياف
و المعادن و الكالسيوم و الفيتامينات


ان شاء الله تجربوها تردو عليا خبر
و تكون وصفة جديدة و مفيدة







ملاحظة :

كلنا كنعرفو فوائد الخرطال
او ما يسمى بالفصحى الشوفان و بالفرنسية
avoine

لكن للاسف قليل فين كنستعملوه فمطبخنا المغربي مع انه كان يستعمل زمان
لانه مفيد و مغذي بحال الشعير و اكثر
غير ببحث بسيط غتلقاو كل فوائدو ومميزاتو للي كتنفع الصغار و الكبار على حد سواء
اولها انه مضاد للاكتآب للي ولا مرض العصر كلشي طايح عليه الضيم هههه
يضبط معدلات الكوليسترول فالدم يحارب السمنة لانه كيغذي و كيشبع فنفس الوقت
و يحمي ويقلل من الاصابة بالسرطانات حفظكم الله و شفاكم
و الليستة طويلة ...

و ممكن تعملو بيه كلشي من حلويات لخبز و معجنات و حتى سلطات و شوربات ...
و ان شاء الله نحاول نحط ليكم وصفات اخرى من كوزينتي بالخرطال
باش تتشجعو اكثر على اكلو و التنويع فيه

ان شاء الله تجربوها تردو عليا خبر
و تكون وصفة جديدة و مفيدة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

سلطة مونجتو مشرملة

السلام عليكم ورحمة الله وبركاتة

وصفتي لليوم

سلطة لذيذة و مغذية و سريعة التحضير:

سلطة مونجتو مشرملة

المقادير :

منجتو
( او كيف تسمى بالفرنسية: haricots coco verts / haricot plat )
ملح
ثوم
كمون
زبدة
قزبر و معدنوس مشلضين

الطريقة :

اولا كناخذ منجتو و نرقدها فماء فيه خل للتخلص من الشوائب
و نقيها و نقطعهها طراف كيف كنعملو مع اللوبية الخضراء
و نعملها تتبخر

(ممكن تسلقوها حسب الرغبة انا افضل التبخير ل
لحفاظ على الطعم و اكبر كمية من الفوائد)

كنقي الثوم و الربيع و نشلضهم

في مقلاة كنعمل الزبدة ( نصف ملعة كبيرة القياس حسب الرغبة و حسب كمية منجتو المشرملة)

و نضيف ليها ثوم مفروم و الربيع مشلض و الملح و الكامون

و نشحر الكل على نار مهيلة

ثم نضيف منجتو

و نشوحها بضع دقائق حتى تتشرب الشرمولة

التقديم :

نقدمها سخونة او دافية

و ممكن تشحروها وتشرملوها بالزيت او زيت الزيتون او ارڭان ...
بدل الزبدة حسب الرغبة
و المذاق دائما لذيذ

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

حرشة معمرة بالكنفيتير و الكوك

السلام عليكم ورحمة الله وبركاته






كيف سبق و قلت انا من محبات الحرشة
و كنحاول ننوع فيها و فالحشوات ديالها (مالح حلو ...)







هاد المرة غنقدم ليكم الحرشة معمرة بالكفيتير و الكوك





كتجي غــــــــــــــــــــــــــــــزالة فــــــــــــنة رائــــــعة...
(هههه شكون شكار العروسة)





لكن ان شاء الله تجربوها و تردو عليا خبر



نخليكم مع المقادير و الطريقة

المقادير:





500 غرام سميدة الحرشة




ملعقة صغيرة ملح،
ملعقة كبيرة سكر

رأس ملعقة خميرة الخبز،
روح الڤانيلا غبرة
قطرات من روح الفرومبواز او سيرو بنكهة الفريز...

خميرة حلوى ،
فنجان حليب بودرة
فنجان زيت
1/4 لتر ماء / كاس ديال عنبة
(ممكن إضافة الماء اكثر حسب جودة الدقيق المستعمل)

للحشوه او العمارة


كوك محكوك جاهز
كنفيتير الفريز (من الافضل يكون كنفيتير ثقيل فيه طريفات الفريز كيجي افضل)
او اي كنفيتير باي نكهة حسب الذوق

الطريقة :








في إناء نخلطو المقادير الناشفة بالتتابع



كيف مبين فالصور
500 غرام سميدة الحرشة
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ روح الڤانيلا غبرة
+فنجان حليب




نخلطو كلشي النواشف مزايان و نضيفو الزيت





و نفتلوها






كيف تانفتلو الكسكس او البات بريزي حتا تشرب الزيت





ثم نضيفو4/1 لتر ماء ونعجنو السميد






و نضيفو ليه ايضا قطرات من روح الفرومبواز او سيرو بنكهة الفريز





ونخلطو مزيان حتا نحصلو على خليط رخو
و متماسك فنفس الوقت





(ممكن إضافة الماء اكثر حسب جودة الدقيق المستعمل)



و نخليوها ترتاح شوية





و قسمت العجين الى كويرات بقياس المشمشة الكبيرة




و بديت كنحشيها بملعقة صغيرة كونفتير الفريز
و ملعقة صغيرة ممسوحة كوك





كنحطهم وسط الكرة المبسطة






و كنعاود نسدها و نكورها





كيف مبين فالصور



و بعد منكملو التعمار



نسخنو المقلة (مقلة وجدة الثقيلة افضل)





و كنبداو نمرمدو كويرات الحرشة فالسميدة من كل الجهات






و نڭرصوها كيف مبين فالصورة




و نبداو نطيبو الحريشات ديالنا





على نار مهيلة





حتى يتحمرو و يطيبو على خاطرهم
و يكتاسبو لون ذهبي محمر

التقديم :





نقدموها سخونة اوباردة





كتجي معسلة و معلكة بالكوك من الداخل
و مذاق غــــــــــــــــــــــــزال








بالصحة و الراحة

اتمنى تجربوها و تنال اعجابكم و تكون طريقة جديدة لتقديم الحرشة




ان شاء الله نحط ليكم طرق اخرى لحشو الحرشة و التنويع فيها

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد





اللهم ادمها نعمة و بارك لنا فيها و اكتب لي بها حسنة طيبة و احفظها من الزوال





الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





اختكم أمنــار





أم ريـَّــان


وعليكم السلام ورحمة الله وبركاته