مسمن بالڤانيلا او مسمن "حبيبتي ربيعة" بطريقتي

السلام عليكم و رحمة الله



عواشركم مباركة مسعودة
باشما تمنتيو ان شاء الله


اليوم غنزل ليكم وصفة عندها ذكريات جميلة من الطفولتي
و هي ساهلة ومكتختالفش على باقي وصفات المسمن التقليدية بزاف
غير فيها اضافات بسيطة كتخلي المذاق غــــــــــــــــــزال و التوراق و الخفة اكثر

كانت جارتنا الله يرحمها و يوسع عليها كتعمل المسمن بهاد النكهة

و كنت نحماق عليه ملي كنجي من المدرسة كنشم ريحتو من باب العمارة
واخا كانت الله يجزاها خير الدنيا وا الاخرة فالطابق الرابع لكن الريحة كانت لا تقاوم
كنت مسمياه " مسمن حبيبتي ربيعة " لاني هكا كنت كناديها الله يرحمها هي و كل اموات و احياء المسلمين

و هاد الايام مع الحمل و الرغبات للي مكتساليش هههه
تفكرتو و كان طعمو تحت لساني و حاولت نعملو واخا كنت صغيرة لما توفات الله يوسع عليها و متاحتش ليا باش ناخذ عندها الوصفة



فعملتو بطريقتي المعتادة للمسمن مع اضافة النكهة المميزة "الڤانيلا"
و لله الحمد وفقت و جا المذاق نفسو و بقيت ناكل و ندعي ليها بالرحمة
و انا اكيدة انكم لو جربتوه تبقاو تدعيو مع "حبيبتي ربيعة " الله يرزقها الجنة هي و كل المسلمين

المهم طولت عليكم السيرة كيف العادة
النكهة للي زايدة فهاد المسمن و للي كتخليه غير عن باقي المسيمنات هي الڤانيلا
و بلا منزيد نطول عليكم (للي فيه شي فيه الله يعفو)
نخليكم مع المقادير و الطريقة


المقادير :



العجين :


 غرام 500دقيق فورص ممتاز

غرام200 دقيق فينو


فانيلا للتنسيم

نصف ساشي خميرة الحلوى
قبصة ملح
ماء دافئ لجمع العجين

خليط الدهن للتوراق:


 غرام150 زبدة
 ميليليتر100 زيت
نصف ساشي خميرة الحلوى
ڤانيلا (ممكن تستخدمو السكر ڤاني او روح الڤاني او الڤانيلا الحقيقية عواد)












خليط الرش :

 غرام50 فينو
 غرام50 فورص

الطريقة :


نخلطو دقيق الفورص مع الفينو


و نصف ساشي خميرة الحلوى و الملح و الڤانيلا





و نبداو نضيفو الماء الدافئ و حنا كنجمعو العجينة و ندلكوها مزيان




حتى تولي متماسكة و لينة و طيعة فاليد و تشكل كرة ملسة


نديروها فبلاستيك غذائي و نخليوها ترتاح 15 دقيقة

بعدها نشكلو بالعجين اسطوانة او حربل (او بودان او مزود طويل) كيف مبين فالصورة

و نقطعوه لكويرات متساوية




(شخصيا كنحاول ندير فكل كرة 100 غرام باش يجيوني المسيمنات مقادين)

نكورو الكويرات مزيان و نزيتوهم و نستفوهم فسطح مزيت


و نغطيوهم ببلاستيك غذائي و نخليوهم يرتاحو لقليلة 15 دقيقة ،

كلما رتاحو كلما كنو اسهل فاتوراق و جاو خفاف و كانت النتيجة افضل


بعد مترتاح الكويرات بنداو فتجهيز المسمن
نجهزو اولا سطح العمل ندهنوه بالزيت





تجهيز خليط الدهن :



كناخذو الزبدة ندوبوها

و نضيفو عليها الزيت و النصف خمارة و الڤانيلا (اما روح الڤانيلا او السكر ڤاني او الڤانيلا الحقيقية نكرطوها من عود الڤانيلا )

و نخلطوهم مزيان مع بعض

و نخليوه على جنب باش ندهنو بيه المسمن وقت التشكيل


تجهيز خليط الرش :

كنخلطو دقيق الفورص مع دقيق الفينو

و نخليوه على جنب باش نرشو بيه المسمن وقت التشكيل


نبداو بتوراق المسمن على بركة الله


دائما كنسبقو أول كرة











نطلقوها رقيقة بزاف حتى تولي شفافة فوق سطح مزيت


 

و ندهنوها بخليط الزبدة مذابة مع الزيت و الڤانيلا و الخمارة










و نرشوها بخليط دقيق الفورص و الفينو

نبداو فتشكيل المسمنة و نتوريقها

 
نطويو الربع الاول فتمام نصف الورقة


 







و نطويو الربع الثاني ايضا فتمام نصف الورقة كيف مبين فالصورة كنحصلو على مستطيل

ندهنو بخليط الدهن و نرشو بخليط الدقيق و الفينو
و نطويو الجزئين على بعض باش كنحصلو على مستطيل طويل

و ندهنو بخليط الدهن و نرشو بخليط الدقيق
و نطويو الربع الاول فنفصف المستطيل

و كذلك الربع الثاني فنصف المستطيل
كيف المعتاد و كيف مبين فالصور




و دهنو و نرشو بقبيصة من خليط الدقيق

و نطويو الجنبين على بعض للحصول على مربع
و هاهي المسيمنة مورقة و جاهزة

نكملو بنفس الطريقة مع كل الكرات حتى نساليوهم

نخليوهم يرتاحو تحت بلاستيك غذائي


و نجهزو المقلة نديروها تسخن


و نبداو نڭرصو اول مسمنة ندهنوها من الوجهين بمسحة زيت
و نديروها تطيب فالمقلة

 







باش يجي المسمن مورق اكثر و يتنفخ فالطياب عملو نفس طريقة البطبوط




يعني غير تلوحو المسمنة فوق المقلة قلبوها فالحين على الوجه الثاني





و بعدها بقاو تقلبو فيها حتي تطيب

و تكتاسب لون ذهبي محمر

كيف مبين فالصور





و هاهو المسمن بالڤانيلا جاهز

التقديم :

قدموه بالصحة و الراحة

مع كويس اتاي او قهوة

و مرفقات عسل او كنفتير


واخا ميحتاج دواز غير بوحدو تاكلوه بلا اتاي بلا عسل

بريحتو و مذاقو لا يقــــــاوم (بالنسبة لي طبعا )

الريحة للي كيعطي فالدار ديال الڤاني غــــــزالة غير عن ريحة الزيت المعتادة ديال المسمن


و كيجي مورق و خفيف

نتمنى تجربوه و تردو عليا خبر

و متنساوش " حبيبتي ربيعة " الله يرحمها و يوسع عليها و كل اموات و احياء المسلمين بدعواتكم الطيبة









اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته