السلام عليكم ورحمة الله وبركاته
عواشركم مباركة
و الله يكتب لينا اجمعين فهاد الايام المباركة نيل المغفرة و العتق من النار
الله يتقبل منا و منكم الصيام و القيام و صالح الاعمال
وصفتي لليوم سهلة جدا من ناحية الجهد و المقادير و لذيذة كذوب فالفم
الشورت بريد Shortbreads هي وصفة سابلي سكتلندية الاصل
نوع من الغريبة او البيسكوي سابلي
ممكن تشكليها بالطوابع حسب ذوقك بالاحجام و الاشكال للي تناسبك
ان شاء الله تنال اعجابكم كيف عجبتني شخصيا
نخليكم مع المقادير و الطريقة :
المقادير :
80 غرام سكر ڭلاصي (او 100 غرام الى عزيزة عليكم الحلاوة )
200 غرام زبدة مالحة بدرجة حرارة المطبخ
250 غرام دقيق فورص
50 غرام مايزينا
الطريقة :
اولا نجهزو كل المقادير بدجة حرارة المطبخ
و نديرو الفران يسخن على
درجة حرارة
150
الى 180 C°
ناخذو الزبدة و السكر ڭلاصي نعملوهم فإناء و نبداو نخلطوهم و ندعكوهم مزيان
حتى يوليو بحال پوماد او كريمة ملسين و متمازجين مع بعض
ثم نضيفو ليهم المايزينا
و الدقيق
و نعجنوهم مزيان
حتى نحصلو على عجينة متمازجة و لينة
نشكلو بها كرة ملسة
كيف مبين فالصور
كناخذو العجينة ديالنا و نطلقوها فوق سطح العمل او ورق الزبدة
نعملوها بالسمك للي بغينا غليضة او رقيقة انا عملتها رقيقة ممكن تقطعوها حسب ذوقكم بطوابع الحلوة او غيرها
انا قطعتها على شكل مربعات البسكوي
و زينتها بالفرشيطة بثقوب و خطوط
ستفتها فوق ورق الزبدة المفرش فالطاوة
و دخلتها تطيب بين 10 الى 13 دقيقة ، كيخصها تبقى بيضاء متتحمرش
سمحو لي الصور جات مواضحاش لاني حداڭيت و عجنت بيدي
و الى عجنت يدياتي كيجيهم بوهزاز هههه اجا ميزڭيهم
و هاهما جاهزين للتقديم او الحفظ لحين الحاجة
التقديم :
ممكن تقدموهم كيف هما مع اتاي او قهوة
او تزينوهم بالشكلاطة او الكراميل او اي اضافة بغيتو
او تزين بيهم الڭلاص و الديسيرات
و متحڭروش هذ الوصفة لانها فعلا كتجي لذييييذة بزاف مقارنة مع مقاديرها البسيطة
و الوليدات كتعجبهم بزاف
ملاحظة :
هاد المقادير كتعطيكم نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة
فعلبة حافظة محكومة الاغلاق
و ايضا ممكن تضيفو ليها منسمات و فواكه جافة حسب ذوقكم اما تخلطوها مع العجين او تمرمدو فيها الحلوى قبل الطبخ او بعده
و ممكن تزيدو كمية السكر او تنقصوها حسب اذواقكم
يعني العجينة كتبقى واحدة و التنويع فالاذواق
حسب الرغبة و المتوفر في كل مطبخ
و ان شاء الله نزل ليكم وصفات اخرى بعجينة الشورت بريد كنظن غتنال اعجابكم لانني شخصيا وليت مدمنة عليها
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
المشاركات
