ڭراتان وردة البطاطة بالكفتة و مطيشة و الدنجال بكريمة الفطر

السلام عليكم و رحمة الله

مساكم طيب تقبل الله صيامكم و قيامكم


كيف واعدتكم




هذي وصفة كراتان وريدة البطاطة بالكفتة و مطيشة و الدنجال بكريمة الفطر



ان شاء الله تنال اعجابكم مذاقا كيف عجبتكم شكلا



نخليكم مع المقادير و الطريقة


المقادير :

حسب عدد الاشخاص (هاد القياس يكفي 4 اشخاص او اكثر حسب ههه)



كلشي مجهز من قبل



4 بطاطات
1 بصلة كبيرة بيضاء
2 مطيشات كبار
2 دنجالات كبار
350 غرام كفتة
توابل الكفتة
2 معالق معدنوس مشلض
ملح
ابزار
كامون
زيت

للڭراتيناج و الكريمة:




2 معالق من بودرة كريمة الفطر و 1 معلقة دقيق عادي
1/4 ليتر حليب
ملعقة زبدة
راس ملعقة موطارد
رشة زعتر


الطريقة :




اولا نغسلو الخضر و نقيوها و نقطعوها
نقيو البطاطة و نقطعوها رقائق بحال شيبس و نملحوها

و نقليوها او نشحروها فشوية زيت غير تدبل ماشي تتحمر

نشحرو البصلة مشلضة مع الزيت و البزار و الملح حتى تدبل

نقطعو المطيشة شرائح طويلة و نشحروها فالزيت مع الملح و الابزار

نقطعو الدنجال شرائح طويلة نملحوه و نخليوه يقطر من الماء
و نقليوه او نشحروه فالزيت حتى يتحمر

نتبلو الكفتة بالملح و الكامون و توابل الكفتة و نشحروها مع شوية من البصلة للي سبق و جهزنا و ملي تطيب نضيف ليها المعدنوس مشلض و نخليها تتشحر حتى تنشف من الماء الزايد



و دابا نبداو فتجهيز الكريمة بيشاميل بنكهة الفطر
للڭراتيناج و الكريمة:

2 معالق من بودرة كريمة الفطر او غير 2 معالق دقيق عادي
1/4 ليتر حليب
ملعقة زبدة
راس ملعقة موطارد
رشة زعتر




فالخلاط كنعملو 2 معالق صغيرة من بودرة كريمة الفطر مع ملعقة كبيرة دقيق و راس ملعقة موطارد و رشة زعتر و نخلطو الكل مع 1/4 ليتر حليب




بعدها ندوبو ملعقة زبدة كبيرة فالكاسرولة و نضيفو ليها الخليط و نبقاو نحركوه حتى يعقاد






و نبداو فتجهيز الكراتان ديالنا

انا عملتو فمول سيليكون على شكل وردة المارڭريتا فسهل عليا العمل
اولا كنقدمو المقادير ديالنا على 3 باش نشكلو بيها طبقات



نستفو شرائح البطاطة فجنبات المول على شكل بتلات الزهرة
كيف مبين فالصورة



ثم نضيف فوسط المول الكفتة



و نستف عليها ترونشات مطيشة



و بعدها ترونشات دنجال



ثم البطاطة



ثم البصلة
و نكب عليهم شوية كريمة بيشاميل الفطر
و نعاودو نفس العملية 2 مرات باش نشكل 3 طبقات



و اخيرا نغطي الكل بطبقة كفتة و نغطي جنباتها بترونشات البطاطة



و نكب الباقي من كريمة البيشاميل بنكهة الفطر





و ندخل الكل يتڭراتينا فالفرن مدة 25 الى 30 دقيقة



و ملي يحين وقت التقديم



نقلب المول فطبق التقديم



و هاهي وريدتي جاهزة

التقديم :




انا كنت قدمتها فوجبه الافطار مرفقة بسلطة و عصير





ممكن تعملو اي خضار كتفضلو



المهم هي الفكرة ديال تقديم الڭراتان بشكل اخر بدل المعتاد




ان شاء الله تكون وصفة مفيدة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته