اللحم مشرمل بالفول

السلام عليكم ورحمة الله وبركاته









هذا طبق اخر كنوجدو بالفول
و كيجي شهوة منو





هذا رابط الطبق السابق للي مشافتوش


الفول بالكروفيت بالمراحل المصورة من كوزينتي كما العادة



ان شاء الله يكون افادة جديدة ليكم
و يساعدكم فتنويع تقديمكم للفول


نخليكم مع المقادير والطريقة











المقادير:





قطع لحم فيلي مقطعة الى شرائح رقيقة و صغيرة
قزبر ومعدنوس
بصلة بيضاء
راس ملعقة صغيرة صوص الصوجا
راس ملعقة صغيرة سكر
راس ملعقة صغيرة ابزار
راس ملعقة صغيرة سكنجبير
راس ملعقة صغيرة تحميرة
ملعقة صغيرة كامون
ملعقة صغيرة قزبر حبوب
ورقة غار
زيت













الطريقة:





اولا بعد منقينا الفول





كنرقدوه فالماء واحد ربع ساعة و نغسلوه مزيان





و كنديرو الماء يغلى مزيان حتى يدير السبولة




وكنلوحو فيه الفول يتسلق





مدة 10 دقائق لا اكثر





و كنصفيو الفول من الماء السخون





و كنكبوه فإناء فيه ماء بــــارد مــثــــــــلــــــــــــــج
باش نوقفو عملية الطياب و باش يبقى الفول محافظ على لونو الاخضر
كيف غتشوفو فالصور

بعدها كنبداو نزولو للفولة القشرة الرقيقة للي مغطياها



بالطريقة المبينة فالصور




اي اننا كنحيدو اعلى القشرة الرقيقة للفولة




و كنخرجوها من الغلاف ديالها بالضغط عليها من الاسفل




و ها هو الفول ديالنا واجد




و كنبداو فتحضير الطبق النهائي



فمقلاة كنعمل الزيت مع البصلة مشلضة رقيقة
و العطرية : الملح + راس ملعقة صوص الصوجا + راس ملعقة صغيرة سكر+ راس ملعقة صغيرة سكنجبير




و كنخلي الكل يتشحر بعد متتشحر البصلة كنضيف عليها كاس كبير ماء و كنخليها حتى كتتعسل و كتكتاسب لون ذهبي محمر و كتتشرب التوابل



كنحيدها من المقلات و نحطها على جنب

و كندير بلاصتها اللحم مع الملح + راس ملعقة صغيرة ابزار
+راس ملعقة صغيرة تحميرة + ملعقة صغيرة كامون
+ملعقة صغيرة قزبر حبوب + ورقة غار + الزيت



كنشحرها و نضيف عليها كاس كبير ماء
و نخليها حتى تتشرب الماء و التوابل
و تتشبع بالنكهات و توقف فالمرق




كنحيدها على جنب





و كندير بلاصتها الفول




وكنضيف القزبر و المعدنوس مشلضين




كنحركو شوية و نضيف عليه البصلة للي عسلت فالاول
ثم اللحم و كنحرك كل المكونات



و نخليه يتشرب البنة فوق عافية مهيلة واحد 2 دقائق

و نطفي عليه
و هاهو واجد















التقديم :




قدمتو كوجبة رئيسية



مرفق بسلطة خفيفة و خبز



شخصيا عجبني هاد الطبق اكثر من الاول
ان شاء الله تجربوه





و بالصحة و الراحة

انا شاء الله تعجبكم الوصفة و تكون اضافة جديدة و مفيدة ليكم


و كيف واعدتكم غنحط ليكم باقي اطباقي و وصفاتي المحضرة بالفول




اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

خرشف معمر بالكفتة و محمر

السلام عليكم ورحمة الله وبركاته

للي عزيز عليه الخرشف و للي معزيزش عليه
كنصحكم تجربو هاد الطبق

مدام حنا باقين ففصل الربيع و الخرشف من الورقيات الربيعية
فكيكون واجد باثمنة مناسبة و لكن كنحيرو فطرق تقديمو

و طبعا كيف واعدتكم باعطائكم افكار و طرق اخرى لتقديمو
هاني غنويركم وحدة من طرقي المفضلة
و هي الخرشف معمر بالكفتة و محمر

كيجي بنـــين كيذوب فالفم و متشبعوش منو
طبعا الى كنتو من عشاق الخرشف و الكفتة و الشوى هههههه

نخليكم مع المقادير و الطريقة
و عذروني على قلة التواجد لاني كنت مريضة شوية
و باقي مدعدعة خخخخخ

المقادير:

(حسب عدد الاشخاص )

ساق خرشف طري منقي و مقطع و مبخر او مسلوق
(من الافضل تختارووها صغيرة و طرية باش متكونش كلها لياف و خيوط)
كفتة
توابل للكفتة: ربيع مشلض، ملعقة كامون، راس ملعقة تحميرة، راس ملعقة ابزار، ملح
زيت او زبدة للدهن

الطريقة :

ســــاهلـــة

بعد مكنقيو الخرشف بالطريقة المعروفة
اي اننا نحيدو ليه ديك الجلدة الشفافة للي كتكون مغطياه
و كنحيدو من الخيوط و كنقطعوه لصبيعات طوال
ممكن تتعمر او تتحشى (طولها بين 6 و 8 سنتيمتر)

و كنرقدوه فالماء معصور فيه حامضة
و من الافضل نخليوه فذاك الماء مدة فالثلاجة مثلا ساعة
حتى يتحيد منو التراب و الرواسب
و فنفس الوقت الحامض كيقتل الطفيليات
و كيحافظ على لون الخرشف باش ميتاكسد و يولي لونو بني بدل الاخضر

ثم كنصفيوه و نعاودو نشللوه بالماء
و نديروه يتسلق مع شوية ملح او يتبخر
انا هنا بخرتو باش يحافظ على مذاقو و طراوتو

بعدها كنتبلو الكفتة
بالربيع مشلض، ملعقة كامون، راس ملعقة تحميرة، راس ملعقة ابزار، ملح
ممكن ديرو التوابل للي كتفضلو
انا درتها توابل عادية باش متغلبش على طعم الخرشف

و كنحربلو الكفتة على شكل صبيعات

و كنعمرو بيها صبيعات الخرشف للي وجدنا

ممكن ديرو الكفتة بين 2 صباع خرشف يعني تسدو عليها

و تولي 3 طبقات طبقة خرشوف طبقة كفتة ثم طبقة خرشوف
انا خليتها طبقة وحدة

و بديت كنستف الصبيعات المعمرين فمول كيدخل للفرن

بعدها دهنتها بشوية زبدة

و دخلتها تتحمر فالفران

التقديم :

قدمتو سخون

و طار هههههه

راجلي عجبو بزاف مع انو معندوش بزاف مع الخرشوف
و حتى ريان للي مكياكلش الخرشف كلا منو

ملاحظة:

و طبعا ممكن تنقيو الخرشف و تنظفوه بالطريقة للي ذكرت الماء و عصير الحامض

و لو كنتو عتحفظوه فالثلاجة قبل الطبخ قطروه من خليط الماء و الحامض

و ديروه فميكات بلا متشللوه باش يبقى محافظ على لونو فالثلاجة لحين وقت الطبخ

و ان شاء الله نحط ليكم طرق اخرى لطبخ و تقديم الخرشف

طرق كثيرة كيجي بيها لذيذ
و تنوعو منو محد موسم الخرشوف باقي

ان شاء الله تعجبكم طريقتي و تفيدكم

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

قطبان لداند مشرملين مع سلطة خفيفة

السلام عليكم و رحمة الله

وصفتي لليوم هي قطبان لداند حفاف ظراف





و هذا طبق ساهل ماهل و سريع التحضير
يليق لوجبة الغذاء كيف العشاء

المقادير :

سدر بيبي مقطع مكعبات و مشرمل
(انا كنشريه واجد بشرمولتو و كنزيد نشرملو باش تزيد البنة)

للسلطة و التزيين و التتبيل
مطيشة خيار خص
ملح
ابزار
ربيع
كامون
خل
زيت

الطريقة :


سهلة و سريعة



حتى لو كانت قطبان لاداند مشرملة
كنزيدها شرمولة:



رشة زيت، رشة ملح، رشة ابزار، ملعقة كامون، ربيع مفروم، و كنخلطها و نستفها فالقطبان و ندخلها للثلاجة
و نخليها تتخمر و تشرب التوابل

لما كيقرب وقت الاكل كنسخل الشواية
( اما شواية اللحم، او شواية البانين)



و كندير قطيباتي يتحمرو
وكنوجد سلطة خفيفة كنفرشها فاطباق التقديم
خص و مطيشة و خيار او فڭوس و كنتبلهم بشوية ملح و خل و ابزار على خفيف



و نزين بيها الطبق

التقديم:



بعد مينضجو القطيبات كنقدمهم فالحين فاطباق السلطة
بدون خبز ههههه



للي بغات تغمس تكثر الشرمولة و تزيد عليها مطيشة و تشحرها





و نقدمهم بالصحة و الراحة

نصيحة:

لحم القطبان سواء كان لحم او دجاج او داند او سمك... ،
كيبغي يتخمر فالشرمولة داخل الثلاجة
باش يتشرب التوابل و يجي طري و بنين ،
لذلك وجدوه بساعات من قبل الطبخ،
احسن شي يبات باش كيجي بنين ،
و متكثروش ليه الطياب، باش ميجيش ناشف و صعب فالاكل


وطبعا الطياب كيكون قبل التقديم مباشرة لان اللحوم لما كتبرد كيصعاب مضغها و بالتالي هضمها

الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
أمنــار
أم ريـَّــان

وعليكم السلام ورحمة الله وبركاته

معجنات پيني ليشي بصوص طوماط الكفتة و الفرماج

السلام عليكم ورحمة الله وبركاته






المعجنات او الپات بشكل عام
من الاكلات المفضلة عندي
لانها سهلة سريعة لذيذة و كنقدرو ننوعو فيها كيف بغينا

طبق اليوم نتمنى ينال اعجابكم




هو طبق بالمعجنات الايطالية
المعروفة باسم :
الپيني ليشي penne lisce




حنى كنقولو ليها القوادس هههه
(الايطاليان تففنو حتى عياو وسماوها قلم الريشة الاملس و حنا المغاربةواعرين كيف ديما كنجيو ڭود مكيتجلاوش لينا الاسماء ههههه)


المهم بلا كثرة كلام نخليكم مع المقادير و الطريقة














المقادير :





500 غرام معجنات پيني ليشي
6 معالق كبيرة صوص طوماط
حبة مطيشة كبيرة
ملعقة كبيرة ملح
ملعقة صغيرة تحميرة
3 فصوص كبيرة ثوم
زيت
ربع ضامة بنة عجل

250 غرام كفتة عجل
250 غرام فرماج احمر
بصلة كبيرة
ربطة صغيرة معدنوس
ملح ، كامون ، ابزار و زبدة لتتبيل الكفتة















الطريقة :

اولا نجهزو الثوم نقيوه و نقطعوه او نحكوه او نطحنوه




انا طحنتو



كيف مبين فالصور باش يذوب مع الصلصة



نغسلو حبه مطيشة و نقطعوها بقشورها





و نطحنوها فالخلاط مع 3 معالق كبيرة ماء




حتى نحصلو على عصير كثيف نخليوه على جنب



و نعملو الصوص طوماط فطنجرة



و نطقوها بالماء و نضيفو ليها الثوم و الملح و الابزار و التحميرة و ربع ضامة البنة و الزيت



ونحركو كل المكونات حتى تذوب مع بعضها مزيان
ثم نضيفو عصير مطيشة للي جهزنا و قياس الماء الكافي باش متتحرق الصوص



و نخليوها تطيب و تخثر على نار مهيلة




فهاد الاثناء نديرو قياس الماء الكافي فاش غطيب المعجنات يغلى

و نجهزو الكفتة
نشلضو البصلة و نديروها فمقلة حتى تتشحر و تذبل



و نضيفو ليها الكفتة متبلة بالملح و الكامون و الابزار و نضيفو للكل قياس الماء الكافي فاش غتطيب الكفتة دون إضافة زيت


نجهزو الفرماج الاحمر نحكوه او نقطعوه و نقسمو الكمية على 2 قسم غنخلطوه مع الصوص طوماط و القسم اثاني مع الكفتة





غير يوصل الماء درجة الغليان



نلوحو فيه المعجنات ديالنا



و نحركوها و نخليوها تطيب



مدة لا تتجاوز 7 دقائق كاقصى حد انا كنخليها 5 دقائق فقط باش متتعجنش


فهاذ الاثناء لما تتشحر الكفتة و تنشف من الصوص



نضيفو ليها المعدنوس مشلض و ملعقه صغيرة زبدة و الفرماج الاحمر و نخلطو الكل



و نفس الشيء بالنسبة للصوص طوماط غير تعقاد نطفيو عليها



و نضيفو ليها نصف كمية الكفتة للي حضرنا و الفرماج الاحمر والمعدنوس مشلض
و نخلطوها مزيان باش يذوب و يندامج معها و هي باقي سخونة





غير طيب المعجنات نقطروها من الماء مزيان



و نعملوها فطنجرة نظيفة و نضيفو ليها الصوص طوماط للي جهزنا



و نخلطو مزيان حتى تتشرب الپيني ليشي الصلصلة



نعموها فاطباق او طبق التقديم



و ناخذو الكمية المتبقية من الكفتة و نزينو بيها فوق كل طبق و نرشو بشوية فرماج



و هاهي جاهزة للتقديم
















التقديم:





نقدموها و هي باقي سخونة





بالصحة و الراحة




و ممكن لو بردات تدخلوها للفرن تسخن




كتجي رائعة و الفرماج كيعطي طعم و شكل مميز للصوص











اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد



اللهم ادمها نعمة و بارك لنا فيها و اكتب لي بها حسنة طيبة و احفظها من الزوال


الله يرزقنا و إياكم خيرات الدارين و لا يحرمنا من طيبات الجنة و نعيمها


دمتم في رعاية الكريم


أمنــار


أم ريـَّــان

وعليكم السلام ورحمة الله وبركاته