تجربتي مع التنظيف بالبخار

السلام عليكم ورحمة الله وبركاته







اليوم بإذن الله غنتقاسم معكم تجربتي مع التنظيف بالبخار
و نخليكم تحكمو عليها
للي كيعرفني غيعرف اني معڭازة الى ابعد حد
يعني للي بيني و بين شغال الدار كيف للي بين السما و الارض هههه






اولا و قبل كل شيء هاذي هي الالة للي كتنظف بالبخار

عندها عدة رؤوس



كتسهل التنظيف مثلا الزجاج و المرايا و الحيطان و الاسطح و الخشب ....



تساعد في الوصول و تنظيف الاماكن الضيقة و الصعبة الوصول



تساعد في حك الاماكن الضيقة
...

و عندها عدة استعمالات اخرى من غير التنظيف
ان شاء الله نعرفكم عليها فمواضيع اخرى

كنعمروها بالماء
و نبرونشيوها فالپريز و نخليوها تسخن
لما كتجهز غتسمعو البخار كيتكون (كيف كنسمعوه فالمقراج او فالكافتيير)


و بسم الله نبدء


بديت باول بقعة مووووووسخة و عمرها متحكات راه مكذبتش انا معڭازة



و هي الحيط للي ورا الفران ديال الضوء
عمري محركتو من بلاصلاصتو من نهار حطيتو و هو مسكين ثابت
كنمسحو لكن معمري مسحت وراه
و نهار بغيت نحداڭ هههه تخلعت
لكن تذكرت التي الصغيرة و قلت علاش منجربها اولا


نخليكم مع الصور ابلغ فالوصف




طلقت البخار على الحيط للي كلو ادام و زيوت و رواسب بخار الفرن




و دشيت راس الالة منين كيخرج البخار ربطت معه منديل نظيف



و بديت كنمسح



و انا كنضغط على زر الالة مرة مرة باش كتخرج دفعات منا لبخار السآآآخن
عنداكم تمسوه بايدكم راه كيحرق



و مسحت الحيط بمنديل ناشف




و هاهي النتيجة



دوزت البخات على الفران و مسحتو حتى هو بمنديل ناشف و رديتو لبلاصتو




دوزت البخار على الكويزينير












و لاهوتاسبيرونت






العيون و الحديدات ديال الكويزينير دخلتهم يتغسلو مع الماعن




و مسحت الكل بمنديل ناشف


و هاهي النتيجة




نفس الشيء عملتو مع باقي حيوط الكوزينة




و بيبان البلاكارات و الپوتاجي ....





و هاهي النتيجة النهائية لتنظف الكوزينة بالبخار






نفس الشيء عملتو مع باقي حيوط الدار



حتى الاماكن للي رونها ريان بالرسم (الله يهديه و يصلحو)




و هاهي النتيجة



و الزجاج و الاسطح ( تلفازة / طبالي / رخام/ ...)




و المرايا و الدوش و الطواليطات اعزكم الله








كلشي دوزت عليه البخار


و مسحت بمنديل ناشف و نظيف













و كيف كتشوفو النتيجة ظاهرة فالصور
مكتتطلبش بزاف ديال الوقت و الجهد
ماشي بحال الى بقينا كنخلطو فالماء و المنظفات و حك حك حك حك ...


ملاحظة : هاد الالة الصغيرة عندها عدة استعمالات و اهمها على الملابس و ان شاء الله نصور ليكم تجارب اخرى بيها و نشاركم بيها


ان شاء الله تكون تجربتي مفيدة ليكم و تعطيكم فكرة جديدة عن التنظيف بالبخار

لا تنسوني من صالح الدعوات لي و لاهلي الحبيبات هذا طلبي منكم فارجوا ان لا تبخل علي




اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال


الله يرزقنا و إياكم خيرات الدارين و لا يحرمنا من طيبات الجنة و نعيمها


دمتن في رعاية الكريم



اختكن أمنــار




أم ريـَّــان




وعليكم السلام ورحمة الله وبركاته

يوم من ايامي الرمضانية بالصور

السلام عليكم ورحمة الله
ان شاء الله تكونو كاملات بالف خير حبيباتي

واخا جات التهنئة بشهر الخير و الطاعات معطلة لكن كنتمنى ليكم رمضان مبارك كريم عليكم كاملات
أعاده الله علينا و عليكم بالخيرات و اليمن والبركات
و جعلنا و إياكم من العتقاء من النار
وكــل عــام وأنتــم بخيــر


حبيباتي هذا يوم من ايام رمضان
 2009 ديال السنة الماضية
كانو طلبو مني الاخوات نشارك بيه
لكن متاحش لي الوقت لتحميلو
و مكتابش نزلو الا هاد السنة سبحان الله

ان شاء الله يكون فيه حاجة مفيدة

ايامي الرمضانية عادية جدا
مكنديرش شيحاجة زايدة عن باقي ايام السنة من ناحية الشقا ديال الدار
الا طبعا شعائر رمضان المبارك هي للي كتخلي اياموا مميزة عن باقي الايام



كيف سبق و قلت كنفضل نجهز اغلب الاشياء للي غنحتاج من قبل باش نكسب الوقت و نقلل من الوقوف فالكويزينة فشهر الطاعات



المعجنات كنجهزها ب15 يوم قبل رمضان (بطبوط ، محاشي، بريوات ...) و كنكونجليها








الخضر و الاعشاب كنقيها و نڭرضها حسب الاطباق لاش غنستعملها و كنحفظها فالبلاستيك بطريقة سحب الهواء باش تبقى مزيانة و محافظة على منافعها اكبر مدة



الديسيرات بحال الفلان و الڭلاص و السوربي و الموس و الحلويات ايضا كنجهزها مسبقا و نحفظها اما فالثلاجة او فالكونجيلاتور






حتى من العجين ديال البيتزا و الفويتي و العشر دقائق و عجينتي للينة ... كنجهزو مسبقا و نقسمو حسب الكميات للي بغيت و نجمدو 


 بهكا كنسهل عليها العمل و كنكسب وقت كثير فرمضان بدل منضيع ساعات فالمطبخ



نبداو بإذن الله


يومي الرمضاني كيبدا فالسحور

قبل مننعس كنجبد البطبوط باش كنتسحرو من الكونجيلاتور



و نخليه يديكونجلا لوقت السحور
طبعا الماڭانة ديما عامرة باش تفيقني نوجد سحوري
غير كتصوني كنوض نتوكل على الله نغسل وجهي (كيكون فيا النعآآآآس هههه ختكم نعاسة)



و نمشي للكوزينة كنبدا اول شي بالماء نردو يغلى باش نعمر اتاي
و نرد البيض يتسلق ( كنسلقو ميديوم يعني كيبقى الاصفر صفر فاقع من الداخل ماشي جاري انما شاد فراسو )
و كندير البطيبطات يسخنو فالمقلة (حالتها )


و نعمر اتاي بالنعناع ممم



(باش ميجيناش العطش و ميضرناش الراس راه المغاربة معروفعليهم مدمنين ديال اتاي الى مشربناه يضرنا راسنا )
نجهز العصير


و نخرج الفلان و الحليب من الثلاجة



(سحورنا كيكون اساسو السوائل (اتاي ، حليب، عصير ، ماء )



و كنحط الطبلة دالسحور كيف كتشوفو


 : كل يوم و رزقو هنا كان رزق اليوم
بطبوط بالزيت العود و العسل ، بيض مسلوق مع مليحة و كويمينة ، اتاي منعنع، حليب ، عصير ،ماء ، فلان، جبن ، كاشير ، ديسير



و الله يطعمنا و اياكم من الجنة


بعد مكيترفع الاذان كنغسل سنيناتي نتوضى و نصلي





كنجمع الطبلة و نحط الميعنات فالكوزينة حتى للصباح 



و كنجمع الزبل حشاكم كنحطو فباب الدار باش مينساه مول الدار ملي يكون خارج فالصباح
 

و نرجع ننعس حتى للثمنية



كنفيق نغسل وجهي


و نجمع بيت النعاس و نخليها تتهوى



ريان باقي فبلاد الاحلام ههه




كنبدا بالكوزينة كنغسل الميعنات  

و نردهم لبلاصهم



و كنمسح الكويزينيير







و نطرف الكوزينة
 

 و كندير دورة فباقي البيوت الصالون غير كنهويه مكيحتاج تطراف كل يوم 



كنطرف بين الجلوس



و السيجور



للي كيصبح مرون



و كندور للطواليط و الدوش اعزكم الله

كنغسلهم و نقيهم









و ها سي ريان فاق



كنجهز ليه فطورو كل يوم حسب الموجود



و نخليه يفطر



على ما جمعت بيتو و دوزت فيها لاسپيراتور و خليتها تتهوى



و طبعا كنضرب طلية مرة مرة فالنت و المنتدى (البليه)



ملي كيفطر ريان كنجمع ميعنات فطورو نغسلهم و نطرفهم
و كيمشي يلعب فبيتو



و انا كندخل للكوزينة باش نجهز الطبق الرئيسي ديال الفطور و الشربة او السوب او الحسوة اليوم كانت حسوة الشعير بارڭان

كل يوم و رزقو

هذاك النهار كان ڭراتان الخضر و الكفتة



و كندوزت الجفاف فالدار





لما كيطيب طبق الفطور



كنحيد منو الغذا ديال ريان




لما كيأذن الظهر كنصلي

و بعدها كنقرى للي تيسر لي من القران 

حتى كتقرب الربعة ديال العشية

كنلبس لريان حويجاتو ديال لاصال




ونديه يتريني



كنرجع



نصلي العصر

... و نجلس نتكونيكتا و ندور فالنت و المنتدى

حتى للخمسة كنمشي نجيب ريان من لاصال و ندوش ليه و نعطيه كاسكروط ديالو



ملي كيقرب وقت الافطار كندخل الكوزينة




كنرد الحسوة تسخن 

و نطلقها بالحليب و نسمها بارڭان



و كنجهز العصير



و نخرج الفلون من التلاجة



و نسخن الڭراتان

و نجهز السلطة (كلشي مسلوق واجد مسبقا غير كنتبلها )
 

و ندريسي الطبلة






لما كيقرب الاذان 




كنجهز كلشي فاطباق التقديم و نحطو فالطبلة 

 لما كيأذن كنكسر صيامي بالتمر و الحليب او الماء

و كنصلي و نجلسو نفطرو على خاطرنا




حتى الافطار كيكون اساسو سوائل ( ماء ، حليب ،عصير، حسوة ، فلون)

كنجمع الطبلة



و نغسل الماعن


و نجفف الكوزينة



و نطرف كل حاجة فبلاصتها



و كنجبد البطبوط من الكونجيلاتور للسحور باش مننساه



و نمشي نصلي العشا و التراويح

و ها وقت النعاس جا تصبحو على خير الحبيبات 




تقبل الله صيامكم و قيامكم و ضاعف اجوركم و ادام عليكم رمضان الخير اعوام عديدة باليمن و البركات و غفران الذنوب و العتق من النار


كل ودي أمنار
أم ريـَّـان

amanarre