السلام عليكم
عواشركم مباركة
و الله يكتب لينا اجمعين فهاد الايام المباركة نيل المغفرة و العتق من النار
الله يتقبل منا و منكم الصيام و القيام و صالح الاعمال
هاد الوصفة ديال الكاراميل كتجي غزالة احسن من ديال الزنقة "تويكس ، مارس..."
و ممكن تعملو بيها عدة حلويات و ڭلاص حسب ذوقكم
ان شاء الله تنال اعجابكم
نخليكم مع المقادير و الطريقة :
المقادير:
80 غرام سكر
120 غرام زبدة لينة
2 معالق كبيرة عسل
1 علبة حليب مركز محلى (390 غرام)
ممكن تحفظوها فالثلاجة فقرعة او علبةمعقمة محكمة الاغلاق
و تستعملوها ككريمة دهن للخبز و الحلويات
او تعمرو بيها الحلويات كيكو دواز اتاي
او تصايبو بيها الڭلاص و الديسير
حسب ذوقكم
الطريقة
كنبداو فتجهيز الكاراميل
كنجهزو الكاراميل بالطريقة التقليدية
اي اننا كنخلطو الحليب المركز المحلى مع السكر و العسل و الزبدة
و كنعملو الكل فكاسرولة و نديروه فوق عافية مهيلة يذوب
مع التحريك المستمر باش ميلصقش لينا السكر فقاع الكسرولة
لما كتتمازج المكونات مع بعضها كنزيدو فجهد العافية و حنا كنحركو
حتى كتبان لينا الكريمة بدات كتغلى و كتعمل فقاعات كيف مبين فالصورة
هنا غيبدا لونها يتغير للون الكاراميلي
ننقصو عليها العافية و نبقاو مستامرين فالتحريك
حتى تعقد و تثقال و تولي على شكل كراميل مع لون ذهبي جميل
متكثروش ليه الطياب و الا غيتحرق
و ممكن ايا تضيفو ليها اللوز مطحون او مهمرمش او كاوكاو او اي مكسرات
شخصيا هادالكراميل كنعملو فعدة حاجات حلويات و ديسير
ان شاء الله تنال اعجابكم و تجربوها و تقولو لي رايكم فيها
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
المشاركات
