كيك بڤروا موس ڭلاصي باللوز و الشلاط و نيسكافي

السلام عليكم ورحمة الله وبركاته

هذا الكيك بڤروا موس ڭلاصي

و كيف عجبكم المنظر
نتمنى يعجبكم قلبا و قالبا
و يكون ساهل عليكم فالمقادير و التحضير

المقادير :

مقادير الكيك او الجينواز:

ممكن تستخدمو اي جينواز كتنجح ليكم

انا عملت:

2 بيضات
1 ملعقة كبيرة زبدة بحرارة المطبخ
6 معالق كبيرة دقيق
2 معالق كبيرة حليب بودرة
1 ملعقة كبيرة مايزينة
2 خمارات حمرين
1 فاني
2 ملاعق كبيرة كاوبيل ( بودرة الشكلاطة)
1 كأس شاي حليب

مقادير الحشوة او كريمة الموس

ممكن تعملو الموس بالطريقة التقليدية بالبض او تستعملو الجاهزة حسب الرغبة انا عملتها بالموس الجاهزة لضيق الوقت

علبة كريمة الديسير (موس) بنكهة الشكلاطة و الفاني
1/2 نصف لتر حليب بارد يقارب التجمد
2 دانون مسوس (بدون سكر) بارد
250 غرام قشدة طرية بارد
لوز مقشر و مڭرمل و مهرش
ملعقة كبيرة نيسكافيه
و 2 ملاعق كبيرة شكلاطة سوداء محكوكة

للتزيين :

شكلاطة سوداء محكوكة
شكلاطة سوداء باريط او اعمدة صغيرة
حبات حلوى
طبعا لكن الاختيار في التزيين بالمتوفر عندكم

الطريقة :

طريقة الكيك او الجينواز :

كنفصلو بياض البيض عن الصفار
و نطربو البياض مزيان مع قبصة ملح
حتى يتكثف و يتضاعف حجمو
و طبعا ملي نقلبو الإناء و يبقى البياض لاصق
نعرفو اننا نجحنا فالتطلاع ديالو

ملاحظة :

المهم هو اننا نحافضو على نفس السرعة فالتطراب
يعني منغيروش سرعات الطراب
و ايضا نتاكدو ان الإناء للي غنطربو فيه يكون ناشف تماما
و متكونش فيه قطيرة الماء

كنوضعو بياض البيض على جنب
و نجيبو إناء اخر
نديرو فيه صفار البيض
(عادة كنطربوه مع السكر لكن بما انني كنحاول نتفادا السكر فمعملتوش)
كنضيف على الصفار 1 ملعقة كبيرة زبدة بحرارة المطبخ
+ 2 معالق كبيرة حليب بودرة
و نطربهم مزيـــان حتى يبياض الصفار و يعقد

ثم نضيف عليهم 2 ملاعق كبيرة كاوبيل ( بودرة الشكلاطة)
+ 1 فاني و نطربهم حتى يتمازج الخليط

ثم نضيف 6 معالق كبيرة دقيق
+ 1 ملعقة كبيرة مايزينة
+ 2 خمارات حمرين
+ 1 كأس شاي حليب

و نطربهم حتى يعقادو
كيخص العجينة تكون عاقدة وثقيلة

بعدها كنبدا نضيف على الخليط بياض البيض
بشوية بشوية و كنحركها غير بشوية ماشي بالطراب
و نحاول منهرسش البياض
يعني كيبقاو طريفات ديالو باينين فالعجين
باش كتجي هشيشة و رطيطبة و كطلع خفيفة
كيف مبين فالصور

و نكون وجدنا المول للي كيتفتح
و دهناه بالزبدة و غبرناه بالدقيق
و سخنا الفران على درجة 180 C°
و ندخلو الكيك ديالنا يطيب بين 25 و 30 دقيقة
الوقت كيختلف حسب انواع الفرارن و حفظهم للحرارة

فهذ الاثناء ندوزو نوجدو كريمة لاموس

بعد مكيطيب الكيك
و كنتاكدو انو طاب مزيان من الداخل
كنديموليوه يعني نحيدوه من المول
و نسقيوه بالسيرو
انا عمل ملعقة نسكافيه و دوبتها فنصف كاس ماء
مع شوية سكر راس ملعقة و قطرات من روح اللوز
و سقيت بيها الكيك
مدام انو بنكة الفاني و اللوز و النيسكافي و الشوكولا

طريقة الحشوة او كريمة الموس:

كنقسمو كل المقادير على 2

كناخذو نصف لتر الحليب البارد كنقسموه على 2
ربع لتر / ربع لتر
و كنقسمو علبة القشدة الطرية او الكريم فريش 250 غرام على 2 ايضا
يعني 125 غرام + 125 غرام
و نبداو فتحضير الموس

تحضير موس الفاني :

كناخذو الساشي الاول ديال الموس بالفاني
و نضيفو عليه ربع لتر حليب
+ 1دانون مسوس
+ 125 غرام كريم فريش = قشدة طرية
مضفتش السكر لان الغبرة ديال الموس حلوة متحتاجش
و نضربو الكل مزيان
حتى تعقاد الموس و تولي قابطة فراسها و تخلي الخطوط باينين

ملاحظة :

باش تطلع معانا الموس مزيان
لابد ميكون الحليب و دانون الكريم فريش بــــــــارديــن

ملي كتعقد الكريمة كنضيفو ليها اللوز المهرمش
و نكبوها فالمول على الكيك
و ندخلوها للثلاجة (كونجولاتور) تبرد
و نوجدو الطبقة الثانية فهاد الوقت

تحضير موس الشكولاتة :

و بنفس الطريقة

كناخذو الساشي الثاني ديال الموس بالشوكولاتة
و نضيفو عليه ربع لتر حليب المتبقي
+ ملعقة صغيرة نسكافيه مدوبة فالحليب
+ 1دانون مسوس
+ 125 غرام كريم فريش = قشدة طرية
و نضربو الكل مزيان
حتى تعقاد الموس و تولي قابطة فراسها و تخلي الخطوط باينين
و نضيفو عليها :
الشكلاط الاسود المحكوك و ملعقة صغيرة نسكافيه يابس
باش كيعطي المذاق و كتحس بيه فالاكل

و نكبوها فالمول على الكيك
على الطبقة الاولى للي غتكون بدات كتجمد
و نسويو السطح ديالها مزيان
و ندخلوها للثلاجة (كونجولاتور) تبرد

انا بيتها اكثر من 24 ساعة
باشما بقات فالثلاجة باشما كتجي احسن
لكن ممكن تخليوها 6 ساعات او 12 إلى مكانش عندكم الوقت

ملاحظة:

لو كان عندك المول كيلصق او صعب فالفك
ممكن ديري البلاستيك الغذائي او الفيلم اليمونتير
و تغلفي بيه المول عاد تكبي فيه الموس
باش يسهال عليك تجبديها من بعد

التزيين :

بعد مكتجمد مزيان وكنبغيو نزينوها
كنجبدوها من المجمد
و نديموليوها من المولي عني نحيدوها من المول

زيتها بالمتوفر عندي
حكيت عليها الشكلاط الاسود
و بقطع الشكلاطة الطويلة
و بقطع حلوى كانت عندي

ملاحظة :

انا زينتها بساعة قبل التقديم و رديتها الكوجيلاتور
و ملي بغيت نحطها
خرجتها من الكوجيلاتور بشي 20 دقيقة تقريبة
و قدمتها بعدها

التقديم :

قدمتها بوحدها بدون مرفقات
لاعصير لا موناضة
بما ناها كلاصي فمتحتاجش

للاسف مصورتهاش مقطعة
حيت رجع الطبسيل خاوي الكوزينة ههههه

لكن فالصور كيبانو الطبقات
وكيبان اللوز و الشكلاط فالوسط ديال الموس

جات خفيفة خصوصا انها محلواش بالزاف
كيف لاحظتو مستعملتش السكر لافالعجين لا فالموس
لان كاوبيل و غبرة الموس كتكون حلوة
فللي متبع ريجيم او حمية صحية كتجيه زوينة

و بالصحة والراحة


اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





أمنــار





أم ريـَّــان


وعليكم السلام ورحمة الله وبركاته

الڭلية او الذرة مقلي

السلام عليكم ورحمة الله وبركاته







ان شاء الله
تكونو كلكم بخير و على خير

اليوم غنقدم الڭلية



طبعا الڭلية (ڭلية الذرة خصوصا) محببة عند الكبار و الصغار
و هي اسهل ما يكون





و كلكم كتعرفو ليها لكن مافيها باس نوريكم طريقتي مصورة




نخليكم مع المقادير و الطريقة









المقادير :








ذرة يابس

ملح
زيت






الطريقة:




اولا نقيو الذرة نغسلوها و نشفوها مزيان
(بعد المرات كتكون فيها شوائب و غبار )






الكميات كتبقى حسب عدد الاشخاص:

لكل كاس ذرة
كنعملو 2 معالق كبيرة زيت
و رشة ملح حسب الذوق


ناخذو كاسرولة ,طنجرة او كوكوط تكون ثقيلة القاع
باش تتوزع فيها الحرارة بشكل متساوي و متحرقش لينا الڭلية




كنعملو اولا الزيت تسخن على عافية متوسطة
غير تبان لينا الزيت بدات تغلي



كنلوحو فيها حبوب الذرة و نحركوها مزيان باش كلها تتزيت
لو كانت الزيت زايدة ممكن تصفيوها



و نعملو فوقها غطاء
من الافضل يكون مثقب بحال الكسكاس باش يخلي الهواء يتبخر

و نخليوها تطيب على عافية مهيييييلة




و طبعا بعد مدة غنبداو نسمعو الفرقعات ديال الذرة

لما كيطيب كلها و ميبقاش صوت الفرقعة

نرشوها بالملح حسب الذوق او السكر او القرفة او الڤانيلا ...

و كنديروها فطبق التقديم









التقديم:




و هاهي




بالصحة و الراحة




بإذن الله نزيدكم وصفات ديال الڭلية بالذرة لتقديمها بطرق و نكهات و اشكال متنوعة





و ان شاء الله يكون موضوع مفيد

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته