فلان بالبنان

السلام عليكم ورحمة الله وبركاته

ان شاء الله تكونو كلكم بالف خير

كيف واعدتكم هادي وصفة اخرى و طريقة اخرى

فلان بالبنان

ساهل ماهل

و كيليق تقدميه كديسير للضياف
اقتصادي جدا و ممكن تنوعي فيه حسب المتوفر عندك من فواكه

ان شاء الله ينال اعجابكن

نخليكم مع المقادير و الطريقة

المقادير :

دائما الكميات حسب عدد الاشخاص

بنان
فلان بودرة سريع التحضير بدون سكر او نكهات
سكر
حليب
ملعقة صغيرة نكهة البنان للتنسيم

الكميات حسب عدد الاشخاص
معروف ان علبة الفلون العادية كتتخلط مع نصف ليتر حليب
و كتعطي 4 الى 6 فلانات حسب حجم الاناء فاش غيتقدم
يعني ضاعفو الكميات حسب الحاجة

الطريقة :

اولا كنقطع البنان الى قطع صغيرة
و نضيف ليه ملعقة عصير ليمون باش نقلل التأكسد
و نخليها على جنب

و كنحضر الفلان
كنخلط بودرة الفلان مع الحليب و السكر
فالخلاص الكهربائي باش يسهل عليا خلطها بنجاح

و كنعمل الخليط فكاسرونة و نديرو يفيض

و فهاد الاثناء كنجهز الكؤوس (انا قدمتو فكؤوس فيرين بدلالزلايف للتغيير)

و لما كيفيض الفلان كنضيف ليه ملعقة من روح البنان (نكهة )

كنخلطها حتى تندمج مع الفلان

و كناخذ الڤيرين و ندير فكل كاس ملعقة كبيرة من قطع البنان

و نكب عليها الفلان

و كندخل الفلان للثلاجة يجمد لحين التقديم

التقديم :

ممكن وقت التقديم تزينيه من الفوق بنفس الفاكهة اي البنان او تفنني فالتزيين حسب الرغبة

قدمتو بعد مجمد تماما

و الصور كيتبين انه ثابت مع ان الكاس مقلوب

و ممكن تعوضو البنان باي فاكهة متوفرة عندكم

و بالصحة و الراحة

ملاحظة :

الفلان المحضر بالبنان ممكن حفظو فالثلاجة ليوم واحد فقط لا اكثر
لان من المعروفان طعم البنانا كيتغير بعد التقشير
لذلك يفضل استهلاك فلان البنان فنفس يوم التحضير

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته

الشْنيـك

السلام عليكم ورحمة الله وبركاتة

اليوم غنزل ليكم
وصفة الشنيك المعتمدة عندي
و ان شاء الله تجربوها و تعجبكم
كيف جربتها انا و عجباتني

بالنسبة للشنيك
فمكنستغنيش عن وصفة
OUM KHALIL ET ADAM

ماشاء الله عليها
(و نقلتها ليكم بالحرف مع تعديلات بسيطة)
بعد مجربتها عدة مرات
و دائما كيجي الشنيك غزال شهوة منو
فالله يجزاها عني خيرات الدارين

المقادير :

هاذي مقادير الوصفة الاصلية :

نصف كيلو طحين فورص

ربع معلقة صغيرة الملح

قليل من الماء الدافىء

4 معالق كبار سنيدة

1 فاني

1 بيضة

2 معالق كبا خميرة الخبز

2 معالق كبار الزبدة او 50 غرام

1خميرة الحلوى

لتوراق العجين:

200غرام الزبدة مخلطة ب1 خميرة و1 فاني

للحشوة

كريم باتسيير

الفواكه المرقدة
اصفر البيض لدهن شنيك

الطريقة:

نخلطوا جميع مقادير العجينة
اللي دكرت اضافة الماء الدافىء
حتى تجتجمع و ندلكوها مزيان

انا خدمتها فالعجان(معڭازة)

تم نقسموها الى 6 كويرات متساوية

كناخدوا كل كويرة و نبسطوها
و نورقوها بخليط الزبدة مع الخميرة و الفاني
و نشكلوهم بحال المسمنة

و هكدا بالنسبة للكويرات كلهم

تم نبسطوا المربعات
و نعملوا واحدة فوق واحدة
و احنا كنعملو الزبدة
حتى نكملوا المربعات كلهم
و نكملوا خليط الزبدة
خاص داك 200 غرام الزبدة
كلها تدخل في العجين اثناء التوراق

كنخليوها ترتاح
و من الافضل تدخليها للثلاجة
كتكون افضل فالتوراق

و نوجدو الكريم باتيسيير

انا كناخذ البودرة الجاهزة
كنخلطها كيف معروف مع الحليب و السكر
و ممكن نضيف عليها اي نكهة
و نديرها تطيب مع التحراك المستمر
حتى تعقاد
كيف مبين فالصور

كنجبدو العجينة ديلانا من الثلاجة
على بال متبرد الكريمة
(باش متقطعش لينا العجين)

كنطلقو

العجينة فوق سطح مرشوش بشوية فورص

و ندوزو عليها الدلاك

و نحاولو ما امكن نشكلوها بحال مستطيل

باشتجي ساهلة فاللف

حتي تعطينا سمك مناسب

تقريبا كيكون بحجم راس الاصبع

وناخذو الكريم باتيسيير
و نسرحوه فوقها
و بعدها ندردرو عليها الزبيب

و نلويوها بحال الزربية

بدون ضغط باش متخرش الكريم باتيسيير

تم الى الفريكو

حتى تقساح لينا العجينة
باش تجينا ساهلة في التقطاع
على شكل شنيك

و تبارك الله كلشي كيعرف للطريقة

تم نوضعوهم في لاطة مدهونة
و نخليوهم حتى يخمروا شي ساعة الوقت

تم ندهنوهم تم الى الفرن

من بعد مكيطيبو كندهنهم بشوية الكونفيتير

و ندرردروا عليم شويو اللوز

ملاحظة :

الاخت ام ادم و خليل قالت هدا الطريقة الشنيك

دائما كتعملها كانت خداتها من واحد الكتاب

كيجيوا احسن من ديال الزنقة
ببزاف المرات روعة روعة
و حتى اللي داقهم كيطلب مقاديرهم
و كيخرجوا تبارك الله 20 شنيكة

و صراحة كيجي رائع

كيف قالت مولاتو
غير كيف شفتو فالصور انا ضاعفت المقادر
يعني ضربتها ف 2
و عطاتني 40 شنيكة

و فبلاصة الفواكة المرقدة او المعسلة

عملت الزبيب

و غيرت بعض الشي فالمقادير
درت الزبيب بدل الفواكه المعسلة
و مرات كندير الشكلاطة

و كندهن بكونفتير المشماش بدل العسل

لانه كيضيف نكهة خاصة

و بدل مندهن بالبيض

(لإعطاء اللون الذهبي)
عادة كندهن المعجنات بالڭليكوز
لاني عندي النيف حساس شوية
ولو يكون منكه كنشمو
يعني كنكره نشم رائحة البيض المدهون فالمعجنات
و بدلو اما كندهن بالحليب و السكر و روح اللوز
او بالڭليكوز و الماء و روح اللوز

التقديم :

كيف قلت
من بعد مكيطيبو كندهنهم بشوية الكونفيتير
ديال المشماش ( حيت كيعطي نكهة المشمش)
و لمعة زوينة
و ندرردروا عليم شويو اللوز
و نقدمهم بالصحة و الراحة

ملاحظة :

انا كنعمل كمية كبيرة كيف قلت 40 شنيكة

و كنطيبها نصف طيبة يعني يلاه كتبدى تتحمر
و كنجبدها نخليها تبرد
و نقسمها فميكات و ندخلها للفريزر

و هكا كيكون ديما عندي الشنيك المنزلي واجد

ملي كنبغيه للفطور او الكاسكروط
او ملي كيجيني شي ضيف او زائر على غفلة

كنجبد الشنيكات

و نستف العدد للي بغيت فالطاوة
و ندخلهم يكملو التحمار ديالهم فالفران
و ملي كنخرجهم
عاد كندهنهم بالكونفيتير
( احسن شي يكون ديال المشماش)
و ندرد عليهم اللوز مهرمش
و هاهما واجدين
للتقديم
سخان و لذاذ

و هنا شرح بالصور للي ذكرت

لاحظوهنا الشنيك طيبتو نصف طيبة

لونو باقي متحمرش مزيان

بعد مجبدتو من الفريكو

و كملت ليه الطياب والتحمار

و هان فين تدهن بالكونفيتير

و دردرت عليه اللوز

جاهز للتقديم
رطب و سخون و لذيذ

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





أمنــار





أم ريـَّــان


وعليكم السلام ورحمة الله وبركاته

سابلي قشور الليمون بالزنجلان

السلام عليكم ورحمة الله وبركاته

اليوم عنقدم ليكم سابلي ساهل ماهل

و مقاديرو بساط و المذاق لذيذ
بالنسبة للناس للي عزيز عليهم الزنجلان و الليمون طبعا:

سابلي قشور الليمونبالزنجلان

المقادير :

200 غرام زبدة لينة
150 غرام سكر ڭلاصي
ملعقة فانيلا
كنشري روح الفانيلا (غبرة ماشي السكر فاني) بالعبار احسن و نكهتها اقوى من الساشي
2معالق كبيرة ماء زهر
2 معالق كبيرة خل
4 معالق كبيرة قشر الليمون محكوك رقيق

بيضة واحدة
15 سنتيليتر زيت
500 غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 غرام زنجلان

الطريقة :

في إناء كنطربو الزبدة مع السكر ڭلاصي

حتى الحصول على خليط كريمي ابيض

ما يسمى پوماد

ثم كنضيفو الزيت

و كنطربو مرة اخرى

ثم كنضيفو البيضة

و نطربو الكل مزيان حتى يتجانس و يعطينا كريمة موس ثقيلة

ثم نضيفو قشر الليمون

و نخلطو الكل حتى يتجانس الخليط

ثم نضيفو 2معالق كبيرة ماء زهر و 2 معالق كبيرة خل
و نخلط

ثم كنضيفو الدقيق المنخول

بشوية بشوية

مع الفاني و خميرة الحلوة و المايزينا ،

و نستمرو فإضافة الدقيق

بشوية بشوية

مع العجن

حتى الحصول على كرة متجانسة مكتلصقش فاليدين

كنسخنو الفرن بدرجة حرارة 180°

و كنبداو فتحضير السابلي

كنحطو العجينة ديالنا على سطح العمل النظيف

كنضيفو ليها الزنجلان

و نعجنها حتى يتمازج معاها

ملاحظة مضفتش الزنجلان فاول العجين باش ميشربش السوائل و
يجي مندي
كنبغيه يحافظ على طراوتو و يجي السابلي مڭرمل اكثر

و كنطلقوها بالمدلك

ثم كنبداو فتشكيل السابلي ديالنا باي شكل كتفضلو
حسب المراشم للي عندكم

انا عملتو بشكل شميسة

و كندردر شوية زنجلان على كل قطعة

وجدت الطاوة فرشتها بورق الزبدة

و بديت كنستف فيها السابلي
حاولو تهزوه بشي ملعقة او سباتيل
باش يحافظ على شكلو و ميكونوش فيه طباع الصبيعات

و دخلتو للفرن المسخن من قبل
على درجة حرارة 180 °
بين 10 او 15 دقيقة حسب السخونية ديال كل فران
خليتها حتى بردات و ستفتها فعلبة حافظة

التقديم :

قدموها بالصحة و الراحة

اما بشكلها العادي او الى بغيتو تزينوها حسب الذوق

كتجي هشيشة و و لذيذة بنكهة قشر الليمون و تڭرميلة الزنجلان

ملاحظة :

هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر

ممكن تحتافظو بيها مدة طويلة
فعلبة حافظة محكومة الاغلاق لو عملتوه بكمية كبيرة

و ايضا ممكن بدل قشر الليمون تستعملو قشر الحامض
حتى هو كيجي غزال
و بدل الزنجلان ممكن تستعملو اي حاجة
كاوكاو او لوز او كاجو او بيستاش او بندق او ڭرڭاع ...مهرمشين رقيق
او حتى الشكلاط او النافع او حبة حلاوة ...
يعني العجينة كتبقى واحدة و التنويع فالمنكهات
حسب الذوق و المتوفر في كل مطبخ

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته