سپاڭيتي بدانون و الورقيات الخضراء

السلام عليكم ورحمة الله وبركاته

اليوم غنقدم ليكم سباڭيتي
ساهلة ماهلة و كاملة مكمولة فيها الغذاء الكافي لكل طبق




هاد السباكيتي كتجي فنة خفيفة ضريفة و سريعة التحضير
و بالنسبة لي هي طبق رئيسي كافي و وافي كيشبع و كيغذي




ان شاء الله تكون اضافة جديدة و مفيدة ليكم الحبيبات


نخليكم مع المقادير و الطريقة

المقادير:


المقادير حسب عدد الاشخاص عينك ميزانك

سپاڭيتي القمح الكامل افضل
يوغورت مسوس (بدون سكر) /او الكريم فريش المعلبة
انا كنستعمل ديال جودة كيجي احسن
لان قوامو فيه الفرماج او الجبن الابيض اكثر
ملح
جلبانة مسلوقة
ملعقة كبيرة سكنجبير طري محكوك






قزبر و معدنوس مشلضين
بصلة خضارية او فقط اوراقها لو كانت طرية او پورو
مكور ابيض او اخضر مشلض



ملعقة زبدة
بيضة (لكل طبق)
شريحة كفتة (لكل طبق / انا استعملت الكفتة ديال بيبي الملفيفة بالفرماج كانت جاهزة عندي)





طوماط سوريز للتزيين

الطريقة :

اولا كنغسلو الخضر ديالنا و نقيوها
و كنديرو الماء يغلى ، و كنعملو فيه الجلبانة الطيب ،




غير يغلى الماء كنصفيو منو الجلبانة و نحطوها على جنب



و كنعملو فيه السپاڭيتي تتسلق مع الملح





كنخليوها طيب بلا متتعجن يعني بين 3 الى 5 دقائق لا اكثر





نصفيوها و نخليو الماء فاش غلات



نضيفو عليه كاس كبير ماء و نخليوه يغلا على جنب




و نعملو للسپاڭيتي ملعقة زبدة
ثم نضيفو عليها الجلبانة و دانون مسوس



و ملعقة كبيرة سكنجبير طري محكوك
و الربيع و المكور و البصل الاخضر
و نخلطو كل هاد المقادير
و نذوقو الى خصها الملح نضيفوه حسب الذوق

نديرو شرائح الكفتة تتحمر انا عملتها فالفرن لان فيها الفرماج
(كتباع جاهزة او ممكن تعملوها انتم)
و فالماء المغلي كنهرس البيض بخفة
غير يطيب البياض كنهز البيضة من الماء بحرص



و كنحط الكل فطبق التقديم و نزين بالطوماط سوريز

التقديم:






قدميها دافية او باردة





كتجي لذيذة و خفيفة






و اكيد مغذية لان فيها اللحم والبيض و الخضار و النشا و الكالسيوم

اتمنى تجربوها و تنال اعجابكم و تكون طريقة جديدة لتقديم السپاڭيتي



اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





أمنــار





أم ريـَّــان


وعليكم السلام ورحمة الله وبركاته

الحرشة في دقائق

السلام عليكم


اليوم غنقدم ليكم وصفة حرشة ساهلة و ناجحة و سريعة التحضير
و ان شاء الله تنال اعجابكم





بهاد المقادير و الطريقة ممكن تعملو اما حريشات صغار او حرشة واحدة كبيرة
و طبعا ممكن تحشيوها وتنسموها حسب الذوق او تضيفو ليها للي بغيتو حسب ذوق



نخليكم مع المقادير و الطريقة












المقادير :



500 غرام سميدة الحرشة
ملعقة صغيرة ملح،
ملعقة كبيرة سكر
رأس ملعقة خميرة الخبز،
فانيلا
خميرة حلوى ،
فنجان حليب بودرة (50 غرام)
فنجان زيت ( 75 ميليليتر )
1/4 لتر ماء









الطريقة :




في إناء نخلطو المقادير الناشفة بالتتابع
500 غرام سميدة الحرشة + ملعقة صغيرة ملح
+ ملعقة كبيرة سكر + رأس ملعقة خميرة الخبز
+ خميرة حلوى +فنجان حليب بودرة + فانيلا
نخلطو كلشي مزايان



بعد ما يتخلط كلشي النواشف



نضيفو الزيت



ونفتلوها
كيف تانفتلو الكسكس او البات بريزي



حتا تشرب الزيت مزيان
نضيفو4/1 لتر ماء ونعجنو السميد



حتا نحصلو على خليط رخو
و متماسك فنفس الوقت



و نخليوها ترتاح
و نديرو المقلة تسخن



فهاد الوقت ناخدو طبسيل صغير
نديرو فيه السميدة



و ناخذو العجين ديالنا
نقسموه كويرات صغار



على القياس لي بغينا
و نبداو فتوجاد الحرشة
نكرصو الكويرة بشوية فطبيسيل



نمرمدو الكويرة فالسميد
على الوجهين بزوج



و نحطوها فالمقلة بعد ما سخنات
و طبعا تكون على عافية مهيلة



باش تطيب على خاطرها
و امتحرقش من برا
و تبقى معجنة من الداخل



و هاهيا واجدة فيسع لفطور او الكاسكروط




التقديم :

نقدموها مع اتاي او قهوة و حليب





بالصحة و الراحة







ملاحظة:

بالنسبة للاخوات للي مكيعرفوش اش من نوع سميدة يختارو للحرشة
فهناك 2 انواع اساسية باش كتعمل الحرشة
اما سميدة الحرشة
او سميدة الكسكس الرقيقة باش كنعملو الكسكس
بزوجهم كتجي بيهم الحرشة زوينة فاختارو للي يناسب ذوقكم

ايضا بالنسبة للحليب البودرة ممكن الاستغناء عليه و استعمال الحليب السائل او اللبن او الرائب
يعني بدل متعملو الحليب البودة و تعجنو الحرشة بالماء
عجنوها بنفس قياس السائل يعني 1/4 ربع ليتر حليب او لبن او رائب لكل نصف كيلو سميد حرش


و بشكل عام الجودة ديال الحرشة
(و العجائن عامة لما تكون الوصفة فيها نوع من انواع مستخلصات الحبوب)
متعلقة بجودة السميد او الحرش المستعمل
يعني لو كان قديم او ماشي شي نوع زوين
ممكن متصدقش
او تجي ناشفة
و نراعيو المقاييس ديال السوائل
يعني كمية الماء او الحليب باش كتجمع العجينة
كتاثر فيها جودة الدقيق و نوعو
عامة في كل المعجنات
كاين الدقيق للي كيشرب الماء بزاف و كاين للي لا

يعني عينك ميزانك لما تبغي تديري اي وصفة
خوذي بعين الاعتبار ان الطحين انواع


بالنسبة للاخوات للي غيسولي على قياس الفنجان
فهنا كنقصد فنجان القهوة كحلة العادي المتعارف عليه (ماشي فنجان القهوة و حليب)
كيهز قياس نصف كاس عنبة

كاس العنبة كيهز 125غرام
او 150 ميليليتر
لو كان عامر حتى الفم ديالو
و الفنجان هو نصف كاس عنبة



اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته

السپاڭيتي مارينا او السپاڭيتي بفواكه البحر

السلام عليكم



وصفتي لليوم سپاڭيتي مارينا او السپاڭيتي بفواكه البحر




هي سهلة جدا و لذيدة بزاف
و اليوم غنعاود تنزيلها مع اعادة تنسيق الصور

نخليكم مع المقادير و الطريقة



المقادير :





350 غرام سباڭيتي
3معالق كبيرة صوص طوماط (صلصة الطماطم )
ملعقة ملح،
ملعقة صغيرة تحميرة
راس ملعقة كامون،
راس ملعقة بودرة الكروفيت
6فصوص ثوم ،
ورقة سيدنا موسى (ورقة الغار )
250 غرام كروفيت
الى عندكم الكلمار او السيمپيا ضيفوهم
50 غرام فطر
50 غرام ذرة
علبة طون،
زعتر ،
ربيع



الطريقة :




اولا نبداو بالصلصة
فمقلة نديرو الزيت ديال الطون
و الملح و التحميرة و الكامون و الثوم
و صلصة الطماطم
و 2 معالق كبار ماء




نحركو المقادير باش تمازج فوق نار معتدلة
حتا تبدا تفور




بعد ما تبدا الصلصة تغلي نضيف 2 معالق اخرى ماء
و نضيف ورقة سيدنا موسى



و نخلي الصلصة تتكثف ملي تثقال و تعقد نطفي عليها


ونضيف المقادير المتبقية




الكروفيت و الفطر و الذرة
و الربيع و بودرة الكروفيت
و الزعتر و الطون
الى عندكم الكلمار او السيمپيا ضيفوهم

و نخليها حتا الوقت التقديم

ندير الماء حتا يغلي
و نلوح فيه السباڭيتي




لمدة ماتفوتش 5 إلى 7 دقائق
باش تبقى محافظة على جودتها
و ماتتعجنش



و نديرها تتقطر فشبيكة




بيلما تقطر الماء الزايد




نخلط صلصة المارينا لي وجدت




(الصلصة مع الكروفيت و الفطر و الذرة و الربيع و بودرة الكروفيت و الزعتر و الطونانا مكانش عندي الكلمار او السيمپيا حتا هما تيجيو لذاذ)





و نديرها تسخن و تتشرب النكهات على نار متوسطة




لما تتجانس كل المكونات ناخذ كمية من الخلطة 6 معالق كبيرة مثلا و نخليها على جنب باش نزين بيها الطبق من الفوق










و نظيف السباڭيتي على الصلصة



و نخلطها مزيان حتا تتمازج







نعملها فطبيسلات فردية او طبسيل جماعي



و نزينها بالصوص للي خليت على جنب



لتقديم :


نقدمها بالصحة و الراحة سخونة او دافية




تتاجي لذيذة شهوة منه

انا شخصيا كيعجبوني ليپات حيت ساهلين فالتحضير و ممكن تنوعي فيهم كيف بغيتي
للغذاء او العشاء كطبق رئيسي او مرفق او حتى طبق ضيافة


ان شاء الله نزل ليكم عدة وصفات لاطباق الپات بطرق جديدة و منوعة


اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته