الصوصيص بخيزو

السلام عليكم ورحمة الله وبركاته

هادا كان عشنا البارح

ساهل فالتحضير لكن المذاق كيجي لذيــذ

نخليكم مع المقادير و الطريقة

المقادير:

صوصيص

خيزو مبخر او مسلوق و مقطع صبيعات صغار
قزبر و معدنوس مشلضين
ضرس ثوم محكوك
ملح
ابزار
كامون
تحميرة

الطريقة:

كنقي خيزو و نقطو صبيعات

و نديرو يتبخر

كنفضلو مبخر باش يبقى محافظ على طعمو و مكوناتو الغذائية

لما كيطيب خيزو

كندير الصوصيص يتشحر ف 2 كيسان كبار ديال الماء

بدون زيت

كينخليه يطلق الزيت ديالو بلا منزيد ليدام

لما كيطيب الصوصيص و كتكون الصوص ديالو عقدات

كنضيف ليه باقي المقادير

خيزو + القزبر و المعدنوس+ الثوم المحكوك

+ الملح و الكامون و التحميرة و الابزار

و نحرك الكل و نخليهم يتشحرو شوية حتى تعقد المرقة او الصوص مزيان

و يتشرب خيزو البنة ديال التوابل

التقديم :

و كنقدمو سخون مع الخبز

و بالصحة والراحة

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

حرشة معمرة بالطون

السلام عليكم ورحمة الله وبركاتة

هاد الوصفة كيف ختها "حرشة معمرة بالدجاج"
لان الحرشة ممكن تعمروها بللي بغيتو
المهم هو العجين اما الحشو فنتوما تفنو فيه

بلا كثرة البلابلا نخليكم مع المفيد

و هو الحرشة معمرة بالطون
كتجي شهوة منها لذيذة و خفيفة

هيا نفس عجينة الحرشة
لكن كنضيفو ليها شوية ديال الدقيق الحرش (سبيسيال)
باش كتجي سهلة فالتعمار بلى متقطع لينا

و صدقوني كتجي لذييييذة و ممكن ترفقيها بسلطة او غيرها

و تكون وجبة رئيسية
كيف عملت انا قدمتها فالعشاء
مع سلطة مشكلة خفيفة

و نتمنا تعجبكم


تابعوني مع المقادير و الطريقة المفصلة

المقادير:

مقادير الحرشة :

500 g غرام سميدة الحرشة
(يعني سميدة الرقيقة )
100 g غرام دقيق حرش سبيسيال
ملعقة صغيرة ملح، ملعقة كبيرة سكر
رأس ملعقة خميرة الخبز، فاني
خميرة حلوى ،فنجان حليب بودرة
فنجان زيت
لتر ماء 1/4 (ممكن إضافة الماء اكثر حسب جودة الدقيق المستعمل)

مقادير الحشوة :

علبة ديال الطون
قبصة ملح، إبزار ، كامون
شوية ديال كنور (قريصة)
ضرس ثوم محكوك
بصلة مشلضة
(انا استعملت اوراق البصلة الخضارية حيت كانتعندي جديدة)
ربيع مفروم
شوية ديال سكنجبير طري محكوك ( راس ملعقة)

الطريقة:

طريقة الحرشة :

في إناء نخلطو المقادير الناشفة

بالتتابع كيف مبين فالصور
500 غرام سميدة الحرشة
+ 100 غرام دقيق حرش سبيسيال
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ فاني
+فنجان حليب

نخلطو كلشي النواشف مزايان

و نضيفو الزيت
و نفتلوها كيف تانفتلو الكسكس
او البات بريزي حتا تشرب الزيت

ثم نضيفو4/1 لتر ماء

ونعجنو السميد
حتا نحصلو على خليط رخو
و متماسك فنفس الوقت
(ممكن إضافة الماء اكثر حسب جودة الدقيق المستعمل)

ممكن تقسمو العجين بعد متعجنوه مباشرة
و تخليوه يرتاح كيف كنعملو مع المسمن

و نخليوها ترتاح و تخمر شوية او تطلق

باش تسهال فالتڭراص من بعد

و تبداو فالتعمار باول كرة الى الاخيرة

طريقة الحشوة :

شحرت البصلة و الثوم
فالزيت ديال الطون
و ضفت ليها العطرية :
قبصة ملح، إبزار ، كامون
شوية ديال كنور (قريصة)
بعد مطابت البصلة ضفت ليها الطون
و شوية ( راس ملعقة) ديال سكنجبير طري محكوك
و حطيتها على جنب تبرد

طريقة الحشو او التعمار :

بعد موجدنا الحشوة و بردات

و بعد مرتاحت العجينة
نبداو على بركة الله التعمار

بعدما قسمنا العجين لخبيزات

اي كويرات فنفس الحجم
كنقسمو كذلك الحشوة بعدد الكراتالسطح للي غنخدمو عليه كنرشوه بالسميد الحرش ديال الحرشة و نبداو نعمرو

كناخذو الكرة نبسطوها او نكرصوها

و نحطو وسطها ملعقة من الحشوة
و نبداو نجمعو الجنبات و نطبقوها
و نكرصوها غير شوية باش تلصق
و نمرمدوها على 2 جهات
فالسميد الحرش ديال الحرشة
و نستمرو فهاد العملية حتى نكملو كل الكرات

و بعد منكملو التعمار نسخنو المقلة

(مقلة وجدة افضل)

و نبداو نطيبو الحريشات ديالنا

على نار مهيلة حتى يتحمرو
و يطيبو على خاطرهم

كيف مبين فالصور

التقديم:

كيف قلت فالاول انا قدمتها فالعشا
مرفقة بسلطة مشكلة خفيفة

و ممكن ترفقوها بللي بغيتو
و كتكال باردة او سخونة

ملاحظة:

ممكن لو شاط ليكم العجين تحفظوه فالثلاجة للغد ليه
و تعاودو تعمروه ببقايا ديال الاكل للي شاطت ليكم
كتكون اكلة شهية و مغدية فنفس الوقت
و طبعا كتكسبو الاجر بعدم رمي البقايا

الجودة ديال الحرشة (و العجائن عامة)متعلقة بجودة السميد او الحرش المستعمل
يعني لو كان قديم او ماشي شي نوع زوين
ممكن متصدقش
او تجي ناشفة
او تهرس ملي تبغيو تعمروها
و ايضا كمية الماء باش كتجمع العجينة
كتاثر فيها جودة الدقيق و نوعو
عامة في كل المعجنات
كاين الدقيق للي كيشرب الماء بزاف و كاين للي لا

يعني عينك ميزانك لما تبغي تديري اي وصفة
خوذي بعين الاعتبار ان الطحين انواع







اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتم في رعاية الكريم





اختكم أمنــار





أم ريـَّــان


وعليكم السلام ورحمة الله وبركاته