السلام عليكم
مساكم طيب
تقبل الله صيامكم و قيامك و بارك في وقتكم
من رمضان الماضي كنت واعدتكم نزل وصفة فلان 4 نكهات و طبقات
بالبنان و الخوخ و العنب و كراميل و الڭوفريت
و لله الحمد اليوم كتاب نوفي بوعدي و نزلها
ان شاء الله تعجبكم الوصفة كيف عجبكم المنظر
نخليكم مع المقادير و الطريقة
المقادير :
1 ليتر حليب
2 علب فلان بدون نكهة و غير محلى
فواكه حسب المتوفر انا كان عندي
كرموص كحل
خوخ
بنان
بعويد
عنب احمر
ڭوفريت باي نكهة كتفضلو
نكهات غذائية لإعطاء اللون و الطعم للفلان
انا استعملت نكهة الڤانيلا و نكهة الپيستاش و نكهة الڤرومبواز و نكهة الكراميل
سكر حسب الذوق
الطريقة :
اولا نجهزو النكهات باش غير يغلا الفلان نضيفوها ليه قبل ميبرد
كنحضر الفلان
كنخلط بودرة الفلان مع الحليب و السكر فالخلاص الكهربائي باش يسهل عليا خلطها بنجاح
و كنعمل الخليط فكاسرونة و نديرو يفيض
و فهاد الاثناء كنجهز الكؤوس و الفواكه باش غنشكل الطبقات و التزيين
(انا قدمتو فكؤوس من الحجم الكبير الطويل بدل الزلايف باش نقدر نزينو ونعمل فيه عدة طبقات متباينة)
قطعت البانان هو الاول ترونشات
و كذلك هرست الڭوفريت مكعبات صغيرة
و قطعت الخوخ ترونشات مثلثة
و خليت العنب كامل دون تقطيع
لما فاض الفلون قسمتو على 4 يعني 1/4 ليتر لكل نكهة
خلطت 1/4 ليتر الاولى مع نكهة الموكا باش تعطيني فلون الكراميل
و 1/4 ليتر الثانية مع الڤانيلا باش يعطيني فلون الڤانيلا
و 1/4 ليتر الثالثة مع نكهة الپيستاش باش يعطيني فلون الپيسطاش
و 1/4 ليتر الرابعة مع نكهة الفرومبواز باش يعطيني فلون الفرومبواز
و بديت فتشكيل طبقات الفلان و الفواكه
اولا عملت ترونشات البانان فقاع الكاس
و ضفت عليها طبقة من فلان الكراميل
خليتو شد فراسو شوية
و بعدو عملت طبقة من الڭوفريت
و عملت عليه طبقة من فلان الڤايلا
خليتو شد فراسو شوية
و عملت طبقة من ترونشات الخوخ
و ضفت ليه طبقة من فلان البيستاش
خليتو شد فراسو شوية
ستفت عليه حبات العنب
و ضفت ليهم فلان الفرومبواز
و هاهما طبقاتي جاهزة
دخلتها للثلاجة حتى جمدات مزيان
و لما حان وقت التقديم خرجتها و زينتها
بحبات عنب
و ترونشات كرموص كحل
و ترونشات بعويد
و ترونشات خوخ
كيف مبين فالصور
و قدمتها بالصحة و الراحة
التقديم:
يتقدم بارد او برجة حرارة المحيط
هاد الفلان راه جد مغذي لانه منوع بالفواكه و كيشبع مزيان
و كيليق للضيافة
و ممكن تعوضو النكهات و الفواكه حسب المتوفر عندكم و حسب ذوقكم
ان شاء الله تكون وصفة مفيدة
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
المشاركات
