سموثي نص/نص 2 ألوان اڤوكا/خوخ

السلام عليكم ورحمة الله وبركاته

عصير اليوم:
عصير سموثي نص/نص اڤوكا/خوخ

نخليكم مع المقادير و الطريقة البسيطة

المقادير :

اڤوكا

خوخ

تفاح

سكر او عسل للتحلية حسب الذوق
ماء

دائما الكميات حسب عدد الاشخاص

شخصيا لكل كاس عصير من الحجم الكبير كنعمل :

نصف اڤوكا كبيرة + نصف تفاحة كبيرة
نصف خوخة كبيرة + نصف تفاحة كبيرة
سكر او عسل للتحلية حسب الذوق

و كنطحن كل كاس كبير بنصف كاس عنبة ماء

يعني ربع كاس للنصف المطحون بالاڤوكا و ربع كاس للنصف المطحون بالخوخ
باش كيجي القوام ثقيـــــل و عاقد او ما يسمى سمـوثي

وممكن تعوضو الماء بعصير الليمون حسب الرغبة

الطريقة :

اولا كنغسلوالفواكه فالماء و الخل و كنضفوها مزيان

شخصيا مكنقشرش الفاكهة لان القشر كيعطيني طعم و قوام مميز اضافة الى اللون و الفائدة اغلب الفيتامينات كتكون مركزة فالقشرة فمن غير الصحي نلوحها

كنقطع الخوخ
و التفاح و نحيد ليه العلف

و كذلك كنخوي الاڤوكا بالملعقة

كيف قلت

لكل كاس عصير من الحجم الكبير كنعمل :
نصف اڤوكا كبيرة + نصف تفاحة كبيرة
نصف خوخة كبيرة + نصف تفاحة كبيرة
سكر او عسل للتحلية حسب الذوق

و كنطحن كل كاس كبير بنصف كاس عنبة ماء

يعني ربع كاس للنصف المطحون بالاڤوكا
و ربع كاس للنصف المطحون بالخوخ

ثم فالخلاط كندير الجزء الاول من السموثي

الماء و التفاح و الخوخ و السكر او العسل
و كنطحن الكل مزيان حتى كيتجانسو

و كنكبو فالكؤوس مائلة
للحصول على 2 عصائر فنفس الكاس بدون ميختالطو

كيف كتبين الصورة

ثم كنطحن الجزء الثاني من السموثي

الماء و التفاح و الاڤوكا و السكر او العسل
و كنطحن الكل مزيان حتى كيتجانسو

و كنكبو فالكؤوس مائلة دائما للحصول على 2 عصائر فنفس الكاس بدون ميختالطو

و كيف سبق و قلت كنطحن كل كاس كبير بنصف كاس عنبة ماء
باش كيجي القوام ثقيـــــل و عاقد او ما يسمى سمـوثي
يعني قياس الماء حسب عدد الكؤوس للي بغيتو تقدمو اي حسب عدد الاشخاص كل كاس كبير بنصف كاس متوسط

التقديم :

كنقدم السموثي مباشرة بعد الطحن

ممكن يشرب او يؤكل بملعقة حسب الرغبة

فالصيف بحال دابا كنطحنو بالماء المثلج اما فالبرد فبالماء عادي

و دائما غير يتطحن يتقدم باش تكون الاستفادة من فوائد الفاكهة اكبر

ملاحظة :

مملن تعملو السموثي باي فاكهة متوفرة عندكم
و ممكن تنوعو فالألوان بمساعدة الملونات الغذائية و المنكهات

و ان شاء الله تكون فكرة التقديم نافعة و التزيينكيبقى حسب الرغبة انا قدمتو دون تزيين لان شكل النص نص تزيين بحذ ذاتو

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

عصير التفاح و النعناع المنعش

السلام عليكم ورحمة الله وبركاتة

هذا عصير سريع مغذي و لذيذ

و جد منعش
كيحيد العطش
بالتفاح و النعناع و الحليب

نخليكم مع المقادير و الطريقة

المقادير :

حسب عدد الاشخاص

تفاح
نعناع
لتر حليب
(انا استعملت لتر الا ربع ماء المثلج مع كاس كبير بودرة الحليب (نيدو)
و فنجان من مكعبات ثلج)
سكر حسب الذوق
نصف كاس عصير حامض

الكميات حسب عدد الاشخاص
نفس قياس التفاح نفس قياس الماء او الحليب
مثلا الى درتو رابعة ديرو رابعة من كلشي المقادير بنفس الكمية
باش يجيكم العصير متجانس و سميك نوعا ما ماشي غير ماء جاري

الطريقة :

اولا كنغسلو النعناع ديالنا مزينا و نقيوه
و ناخذو غير الاوراق بلا ساق و نخليوه يتقطير
و كنغسلو التفاح و نقيوه
و نقطعوه مكعبات صغيرة
و نضيفو ليه نصف كاس عصير حامض
باش ميتاكسدش و يحافظ على لونو

ثم فالخلاط كنديرو مكعبات الثلج مع النعناع و التفاح الحليب بودرة نيدو

او الحليب العبار

و قليل من الماء
غير القياس فاش عنطحنو الفواكه مزيان

و كنطحنو الكل مزيان
حتى كيتجانسو و كنضيفو قياس الماء الكافي (الحليب)

باش يعطينا عصير ثقيل و قوامو عاقد

و نقدموه مباشرة بالصحة و الراحة

التقديم:

قدمتو مزين بعريشات نعناع

هو عصير ساهل سريع و مغذي و منعش فنفس الوقت

و ممكن تعوضو التفاح باي فاكهة متوفرة عندكم

و بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

وعليكم السلام ورحمة الله وبركاته

عصير التفاح بالكرموص و العنب الاسود بالحليب

السلام عليكم ورحمة الله وبركاته

عصير اليوم:

التفاح بالكرموص و العنب الاسود بالحليب بالصور كالعادة

نخليكم مع المقادير و الطريقة البسيطة

المقادير :

دائما الكميات حسب عدد الاشخاص
حسب عدد الاشخاص

عنب الاسود
تفاح
كرموص اسود
حليب بودرة(ثلاثة معالق لكل كاس)

ماء انا استعملت لتر الا ربع ماء المثلج مع فنجان من مكعبات ثلج
سكر حسب الذوق

الكميات حسب عدد الاشخاص

مثلا الى درتو رابعة ديرو رابعة من كلشي المقادير بنفس الكمية
باش يجيكم العصير متجانس و سميك نوعا ما ماشي غير ماء جاري

الطريقة :

اولا كنرقدو العنب فالماء و الخل باش نتخلصو من المبيدات الحشرية و الحشرات للي ممكن تكون فعنقود العنب
بعدها كنشللوه مزيان بالماء و نقيوه
انا خليتو بالقشر ديالو و بالعلف
لانهم مفيدين جدا للصحة

و كنغسلو التفاح و و نخليوه بقشرو و نقيوه من العلفة

و نقطعوه مكعبات صغيرة
و كذلك نغسلو الكرموص و نقطعوه

ثم فالخلاط كنديرو مكعبات الثلج مع حبات العنب و التفاح و الكرموص

و قليل من الماء
غير القياس فاش عنطحنو الفواكه مزيان

و كنطحنو الكل مزيان

حتى كيتجانسو و كنضيفو قياس الماء و الحليب البودرة الكافي

باش يعطينا عصير ثقيل و قوامو عاقد
مكنضيفش السكر لان حلاوة الفواكه تكفيني
انتم اضيفو السكر حسب الذوق

و نقدموه مباشرة بالصحة و الراحة

التقديم:

قدمتو مباشرة بعد الطحن

مزين بالكرموص

عصير ساهل سريع و مغذي و منعش فنفس الوقت

و ممكن تعوضو الفواكه للي استعملت بالمتوفر عندكم

و بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان

كوكتيل الفواكه

السلام عليكم و رحمة الله



هاد الكوكتيل كيجي لذيذ و قوامو تقيل و عاقد




يصلاح للتقديم فالعراضات اوالايام العادية
و الاهم انه اقتصادي وصحي بدون نقاش
و ممكن تعملي بيه كميات كبيرة
و تعملوه باي نوع فواكه عندكم ماشي بالضرورة للي عملت انا

المقادير:

انا كان عندي فالفواكه :
بنان
تفاح
ليمون
فريز
الماء فاش تسلق الروز (بدون ملح طبعا)
سكر حسب الذوق (شخصيا كنفضلو طبيعي دون اضافة سكر)


للتزيين:
قطع فريز
و سكر ڤاني( سنيدة )

الطريقة:

اولا كنغسل الفواكه مزيان بالماء والخل باش تتحيد منها الكيماويات والطفيليات للي ممكن تسبب فالاسهال!
و بعدها كنغسللها بالماء و نمسحها و النشفها
و نقي البنان و التفاح و نقطعو قطع صغيرة
و كنعصر الليمون (ممكن تقطعوه حتى هو و تطحنوه مع باقي الفواكه)
و نقطع الفريز لقطع كبيرة

اما ماء الروز فكيكون ديما عندي فالثلاجة




فالطحانة كنعملو قطع البنان و التفاح تتطحن مع ماء الروز
( الماء فاش سلقنا الروز بلا ملح)
بعد متطحن مزيان كنظيف عليها قطع الفريز و نطحنها غير شوية
باش تبقا القطع طريفات صغيرة تحس بيها فالعصير،
ثم كنضيف عصير الليمون باش ميكحالش العصير (لان البنان والتفاح كيتاكسدو )

و بعدها كنظيف للكل السكر حسب الذواق
(للاشارة انا مضفتش السكر للعصير لانه كيعجبنا مذاق الفواكه بدون اضافة سكر)

التزيين:

زينت الكؤوس بالسكر سنيدة الڤاني (ديال الساشي) فالحواف







طريقة تزيين:


بسيطة كتاخذي 2 طباسل صغار
واحد كتعملي فيه الماء و الثاني ديري فيه السكر الفاني او اي شيء تحبي تزيني بيه

الطبسيل الاول تعملي فيه مقدار ديال الماء ملعقة كبيرة ماء مثلا،

كتكفي فيه الكاس





و تخليه يتقطر




و كتعاودي تكفي الكاس فطبسيل درتي فيه السكر





تحركيه و تهزيه من فوق السكر و تسوسيه من السكر الزائد





و هاهو واجد للتقديم






(او السكر الفاني او القرفة او السكر الملون او رقاقات اللوز او الشكلاط او اي شي بغيتو تزينو بيه. . .)

ان شاء الله نحط ليكم بعض طرق تزيين الكؤوس بشكل بسيط و انيق و فمتناول الجميع



و كنتك فجنب الكاس نصف فريزة مقطعة على شكل عرف الديك

و كنكب العصير فالكيسان بالدواز باش ميتوسخوش جنبات الكاس او يتقطر لينا العصير

التقديم:






و نقدموه بالصحة و الراحة بارد او بدرجة حراة المطبخ فاي وقت



انا كنقدم هاد الكوكتيل بفواكه عدة حسب المتوفر عندي لكن الطريقة كتبقى واحدة

نصيحة وشرح مهم:


لما كنسلق الروز او اي معجنات كنسلقو غير فالماء بلا ملح
باش لما كنصفيه كنحتافظ بهذاك الماء فالثلاجة
و كنصايب بيه العصائر و كنعقد بيه الصوص
(ماء الروز او اي نوع معجنات سلقتها بدون ملح بدل الحليب او الماء فقط)

لان ماء الروز كيعطي للعصير ثقل و سماكة
مكيجيش جاري وفنفس الوقت اقتصادي
و للي ذاقو مكيعرف مناش صايبتيه
مكيكونش فيه مذاق الحليب
و ايضا مكيكونش مزرڭ و جاري بحالا معصور بالماء

و اهم شي انه الاطفال و الناس للي عندهم المصارن حساسة
ممكن يشربو كوكتيل اي نوع فواكه
بلا ميخافو من الاصابة بالاسهال
لانه معروف ان اغلب الفواكه ممكن دير اسهال
لكن معروف ايضا ان الروز و الماء فاش تسلق
كيساعدو على الشفاء من الاسهال،
يعني شربو قدما بغيتو بدون خوف!





و ممكن تستعملو الروز نفسو ماشي غير الماء ديالو



ان شاء الله تعجبكم طريقتي و تفيدكم









الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم


اختكم أمنــار

أم ريـَّــان




و عليكم السلام ورحمة الله وبركاته

الخرشوف مشرمل بكفتة

السلام عليكم ورحمة الله وبركاته

كيف واعدتكم باعطائكم افكار و طرق اخرى لتقديم الخرشف
هاني غنويركم طريقه سهلة و سريعة







الخرشوف مشرمل بالكفتة
(اي كفتة عندكم لحم احمر او ابيض او سمك)
كيجي بنـــين طبعا الى كنتو من عشاق الخرشف و محبي الكفتة

نخليكم مع المقادير و الطريقة

المقادير:

(حسب عدد الاشخاص )

ساق خرشف طري منقي و مقطع و مبخر او مسلوق
(من الافضل تختارووها صغيرة و طرية باش متكونش كلها لياف و خيوط)
بصلة بيضاء مشلضة
كفتة
مرات كنستعمل كفتة العجل او لاداند او السردين...
او نص نص كنحلطهم كتجي كلها بحال كفتة اللحم لا فرق
توابل للكفتة: ربيع مشلض، ملعقة كامون، راس ملعقة تحميرة، راس ملعقة ابزار، ملح

زيت او زبدة

الطريقة :

ســــاهلـــة

بعد مكنقيو الخرشف بالطريقة المعروفة
اي اننا نحيدو ليه ديك الجلدة الشفافة للي كتكون مغطياه
و كنحيدو من الخيوط و كنقطعوه لصبيعات طوال



و كنرقدوه فالماء معصور فيه حامضة
و من الافضل نخليوه فذاك الماء مدة فالثلاجة مثلا ساعة
حتى يتحيد منو التراب و الرواسب
و فنفس الوقت الحامض كيقتل الطفيليات
و كيحافظ على لون الخرشف باش ميتاكسد و يولي لونو بني بدل الاخضر

ثم كنصفيوه و نعاودو نشللوه بالماء
و نديروه يتسلق مع شوية ملح او يتبخر
انا هنا بخرتو( بكمية كبيرة )باش يحافظ على مذاقو و طراوتو
واحتفظت بيه فالثلاجة كل مرة كناخذ القياس للي يكفيني بقا عندي اكثر من 4 ايام
فالثلاجة ماشي المجمد

كنشلض البصلة



و كنديرها تتشحر فالمقلاة مع الزيت و نصف كاس ماء



لما كتذبل البصلة كنضيف ليها التوابل و الكفتة المتبلة



ونخلي الكل يتشحر



ثم كنضيف الخرشف المبخر و المقطع الى اصابع صغيرة
و نضيف نصف كاس ماء و نخليه يتشرب بنة الكفتة و التوابل



حتى يتبخر المرق الزائد و يوقف
و نقدموه بالصحة و الراحة

التقديم :

قدمتو مع الخبز العربي




ممكن تعملوه ساندويتشات او تورتيلا
كيجي رآآآئع

ملاحظة:

و طبعا ممكن تنقيو الخرشف و تنظفوه بالطريقة للي ذكرت الماء و عصير الحامض

و لو كنتو عتحفظوه فالثلاجة قبل الطبخ قطروه من خليط الماء و الحامض

و ديروه فميكات بلا متشللوه باش يبقى محافظ على لونو فالثلاجة لحين وقت الطبخ

او بخروه ثم حفظوه فالثلاجة لو كنتو غتستعملوه فالايام الثلاثة او الاربعة بعد الطبخ

و بدل كفتة العجل ممكن تستعملو كفتة السمك
سردين ميرلا او دجاج او داند كيف عملت ،
او تعوضو الكفتة بشرائح اللحم
بقري او غنمي او داند او دجاج او سمك...حسب الذوق

و ان شاء الله نحط ليكم طرق اخرى لطبخ و تقديم الخرشف

ان شاء الله تعجبكم طريقتي و تفيدكم

اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

اختكم أمنــار

أم ريـَّــان