السلام عليكم ورحمة الله وبركاته
ان شاء الله تكونو كلكم بالف خير
المهم بلا منكثر عليكم الكلام كيف عادتي
ندوزو للمهم
اليوم غنتقاسم معكم وصفة من الوصفات المعتمدة عندي لموس الشوكولاطة
و هي موس الشكلاطة باللوز المحمر المهرمش
سهلة و بسيطة و الاهم لذيييييذة
ان شاء الله تنال اعجابكم
المقادير:
250 غرام شكلاطة سوداء بتركيز 70 % كاكاو او اكثر حسب المتوفر عندكم
20 غرام بودرة الكاكاو المر
5 بيضات (كبار)
30 غرام زبدة مالحة (ممكن تستعملو لابريري (لابريري ماشي زبدة العبار لان ديال العبار كتطلق الماء لذلك استعملنا الزبدة ديال العلبة مكتطلقش الماء)
50 غرام لوز محمر و مهرمش (بقشورو)
الطريقة :
اولا ندوبو الزبدة اما فحمام مريم او فالفرن دافي او الميكرواوند حسب الرغبة
انا ذوبتها فحمام مريم ( اي كسرولة فيها الماء غليان نوضعو عليها كسرونة اصغر و نوضعو الكل فوق عافية مهييلة)
بعد مندوبو الزبدة ندوبو معها ايضا الشكلاطة السوداء
سبب خلط الزبدة المالحة مع الشكلاطة السوداء باش نتفاداو ان الشكلاطة تقصاح بسرعة لما نخلطو معها باقي المكونات الزبدة كتخلي الشكلاطة لينة و كتضيف ليها لمعان ايضا)
فالوقت فاش كذوب الشكلاطة
كناخذو البيض و نفرقو صفار البيض عن البياض
كنطربو بياض البيض و نطلعوه حتى يشكل لينا موس قابطة فراسها
ثم كنضيفو للشكلاطة الذائبة بودرة الكاكاو المر و اللوز محمر و مهرمش و نخلطو الكل
ثم نضيفو ليهم صفار البيض و نطربو الكل
حتى يشكلو لينا موس شكلاطة كثيفة و ثقيلة
بعدنا نضيفو لهاد الخليط بياض البيض للي طلعنا من قبل
نضيفوه برفق بلا منطربو لكن نحاولو نخلطوه بملعقة او سپاتيل
بحركات خفيفة باش منهرسوش الموس ديالنا و نخسروها و هاهي جهزات
ممكن تعملوها بالشكل للي بغيتو اما فطبق واحد او فاطباق فردية
انا عملتها فكؤوس (ڤيرينات) باش يكون تقديمها اسهل
و لإعطاء شكل للموس عملتها فقمع الپوشوار
و عمرت بيها الڤيرينات
كيف مبين فالصور
و للتزين رشيتها بقليل من اللوز المحمر المهرمش
و دخلتها للثلاجة
مدة لا تقل عن 5 ساعات باش تشد راسها مزيان
التقديم:
بعد مقبطات الموس
قدمتها
بالصحة و الراحة
نتمنى تجربوها و تردوعليا خبر
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
أمنــار
أم ريـَّــان
وعليكم السلام ورحمة الله وبركاته
المشاركات
