قطبان لداند مشرملين مع سلطة خفيفة

السلام عليكم و رحمة الله

وصفتي لليوم هي قطبان لداند حفاف ظراف





و هذا طبق ساهل ماهل و سريع التحضير
يليق لوجبة الغذاء كيف العشاء

المقادير :

سدر بيبي مقطع مكعبات و مشرمل
(انا كنشريه واجد بشرمولتو و كنزيد نشرملو باش تزيد البنة)

للسلطة و التزيين و التتبيل
مطيشة خيار خص
ملح
ابزار
ربيع
كامون
خل
زيت

الطريقة :


سهلة و سريعة



حتى لو كانت قطبان لاداند مشرملة
كنزيدها شرمولة:



رشة زيت، رشة ملح، رشة ابزار، ملعقة كامون، ربيع مفروم، و كنخلطها و نستفها فالقطبان و ندخلها للثلاجة
و نخليها تتخمر و تشرب التوابل

لما كيقرب وقت الاكل كنسخل الشواية
( اما شواية اللحم، او شواية البانين)



و كندير قطيباتي يتحمرو
وكنوجد سلطة خفيفة كنفرشها فاطباق التقديم
خص و مطيشة و خيار او فڭوس و كنتبلهم بشوية ملح و خل و ابزار على خفيف



و نزين بيها الطبق

التقديم:



بعد مينضجو القطيبات كنقدمهم فالحين فاطباق السلطة
بدون خبز ههههه



للي بغات تغمس تكثر الشرمولة و تزيد عليها مطيشة و تشحرها





و نقدمهم بالصحة و الراحة

نصيحة:

لحم القطبان سواء كان لحم او دجاج او داند او سمك... ،
كيبغي يتخمر فالشرمولة داخل الثلاجة
باش يتشرب التوابل و يجي طري و بنين ،
لذلك وجدوه بساعات من قبل الطبخ،
احسن شي يبات باش كيجي بنين ،
و متكثروش ليه الطياب، باش ميجيش ناشف و صعب فالاكل


وطبعا الطياب كيكون قبل التقديم مباشرة لان اللحوم لما كتبرد كيصعاب مضغها و بالتالي هضمها

الله يرزقنا و إياكم خيرات الدارين و لا يحرمنا من طيبات الجنة و نعيمها
دمتم في رعاية الكريم
أمنــار
أم ريـَّــان

وعليكم السلام ورحمة الله وبركاته

معجنات پيني ليشي بصوص طوماط الكفتة و الفرماج

السلام عليكم ورحمة الله وبركاته






المعجنات او الپات بشكل عام
من الاكلات المفضلة عندي
لانها سهلة سريعة لذيذة و كنقدرو ننوعو فيها كيف بغينا

طبق اليوم نتمنى ينال اعجابكم




هو طبق بالمعجنات الايطالية
المعروفة باسم :
الپيني ليشي penne lisce




حنى كنقولو ليها القوادس هههه
(الايطاليان تففنو حتى عياو وسماوها قلم الريشة الاملس و حنا المغاربةواعرين كيف ديما كنجيو ڭود مكيتجلاوش لينا الاسماء ههههه)


المهم بلا كثرة كلام نخليكم مع المقادير و الطريقة














المقادير :





500 غرام معجنات پيني ليشي
6 معالق كبيرة صوص طوماط
حبة مطيشة كبيرة
ملعقة كبيرة ملح
ملعقة صغيرة تحميرة
3 فصوص كبيرة ثوم
زيت
ربع ضامة بنة عجل

250 غرام كفتة عجل
250 غرام فرماج احمر
بصلة كبيرة
ربطة صغيرة معدنوس
ملح ، كامون ، ابزار و زبدة لتتبيل الكفتة















الطريقة :

اولا نجهزو الثوم نقيوه و نقطعوه او نحكوه او نطحنوه




انا طحنتو



كيف مبين فالصور باش يذوب مع الصلصة



نغسلو حبه مطيشة و نقطعوها بقشورها





و نطحنوها فالخلاط مع 3 معالق كبيرة ماء




حتى نحصلو على عصير كثيف نخليوه على جنب



و نعملو الصوص طوماط فطنجرة



و نطقوها بالماء و نضيفو ليها الثوم و الملح و الابزار و التحميرة و ربع ضامة البنة و الزيت



ونحركو كل المكونات حتى تذوب مع بعضها مزيان
ثم نضيفو عصير مطيشة للي جهزنا و قياس الماء الكافي باش متتحرق الصوص



و نخليوها تطيب و تخثر على نار مهيلة




فهاد الاثناء نديرو قياس الماء الكافي فاش غطيب المعجنات يغلى

و نجهزو الكفتة
نشلضو البصلة و نديروها فمقلة حتى تتشحر و تذبل



و نضيفو ليها الكفتة متبلة بالملح و الكامون و الابزار و نضيفو للكل قياس الماء الكافي فاش غتطيب الكفتة دون إضافة زيت


نجهزو الفرماج الاحمر نحكوه او نقطعوه و نقسمو الكمية على 2 قسم غنخلطوه مع الصوص طوماط و القسم اثاني مع الكفتة





غير يوصل الماء درجة الغليان



نلوحو فيه المعجنات ديالنا



و نحركوها و نخليوها تطيب



مدة لا تتجاوز 7 دقائق كاقصى حد انا كنخليها 5 دقائق فقط باش متتعجنش


فهاذ الاثناء لما تتشحر الكفتة و تنشف من الصوص



نضيفو ليها المعدنوس مشلض و ملعقه صغيرة زبدة و الفرماج الاحمر و نخلطو الكل



و نفس الشيء بالنسبة للصوص طوماط غير تعقاد نطفيو عليها



و نضيفو ليها نصف كمية الكفتة للي حضرنا و الفرماج الاحمر والمعدنوس مشلض
و نخلطوها مزيان باش يذوب و يندامج معها و هي باقي سخونة





غير طيب المعجنات نقطروها من الماء مزيان



و نعملوها فطنجرة نظيفة و نضيفو ليها الصوص طوماط للي جهزنا



و نخلطو مزيان حتى تتشرب الپيني ليشي الصلصلة



نعموها فاطباق او طبق التقديم



و ناخذو الكمية المتبقية من الكفتة و نزينو بيها فوق كل طبق و نرشو بشوية فرماج



و هاهي جاهزة للتقديم
















التقديم:





نقدموها و هي باقي سخونة





بالصحة و الراحة




و ممكن لو بردات تدخلوها للفرن تسخن




كتجي رائعة و الفرماج كيعطي طعم و شكل مميز للصوص











اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد



اللهم ادمها نعمة و بارك لنا فيها و اكتب لي بها حسنة طيبة و احفظها من الزوال


الله يرزقنا و إياكم خيرات الدارين و لا يحرمنا من طيبات الجنة و نعيمها


دمتم في رعاية الكريم


أمنــار


أم ريـَّــان

وعليكم السلام ورحمة الله وبركاته

طاجين الدجاج معسل و مخضر بطريقتي

السلام عليكم ورحمة الله وبركاتة















هاد الطاجن للي ذاقو عندي كيسولني على الطريقة
و فعلا كيجي لذيذ و للي ذاقو كيظن انه صعب التحضير
لكن هو سهل و كيوجد فيسع لو جاوك ضياف على غفلة

لو كان عندكم الوقت كافي ممكن تنصبوه مباشرة فالطاجين
اما لو منتو مزروبين فنصبوه فالكوكوط و قدموه فالطاجين بعد ميتحمر او فاي طبق تفضلو





انا كل مرة باش كنحضرو دجاج، كوكلي، سمان، حمام او حتى لحم او حوت
و كل مرة باش كنخضرو:
تفاح ، بعويد، اناناس، مشماش ، خوخ ، شهدية...
طري او معلب فواكه جافة حسب المتوفر

لكن طريقة الطبخ و التحضير كتبقى وحدة
ان شاء الله تعجبك و تفيدكم

نخليكم مع المقادير:




دجاجة (الحجم حسب عدد الاشخاص)
2 بصلات بيضين مشلضين
2 فصوص ثوم مهروس او مدقوق
1ملعقة صغيرة كامون
1ملعقة صغيرة عطرية الدجاج
نصف ملعقة صغيرة خرقوم
1 مكعب البنة زعفران
نصف ملعقة صغيرة سمن بلدي
15 حبة قاعقلا صاينة
5 حبان بسيبيسة صاينة
ملعقة وريقات نويويرة صاينين
ملح




ملعقة سكر فانيلا
2 معالق زبدة
ملعقة قرفة




للتخضير:



انا خضرة بالبعويد طري و المشماش يابس و الڭرڭاع و اللوز مهرمش

الطريقة:

اولا كنغسلو الدجاجة ديالنا بالماء و الملح و الخل او الحامض و نفركوها مزيان بالملحة الغليضة باش يتحد منهاكل الشوائب و ايضا كينقصو الدهون





ثم كنشدها نقطعها لاطراف ، انا كنبغي نقطعها كل طرف بوحدو باين يعني الى 9 اطراف

تنظيف و تقطيع الدجاج بالصور




و كنوجد الشرمولة التالية:





فإناء كندير الملح و 2 فصوص ثوم مهروس او مدقوق مع ملعقة صغيرة كامون و ملعقة صغيرة عطرية الدجاج
و نصف ملعقة صغيرة خرقوم و 1 مكعب البنة زعفران
و نصف ملعقة صغيرة سمن بلدي 15 حبة قاعقلا صاينة
مع 5 حبات بسيبيسة صاينة مع ملعقة وريقات نويويرة صاينين






كنضيف للكل قياس نصف كاس صغير ماء و كندق الكل باش تتجانس النكهات و تذوب فبعضها،






بعدها كندير فيها قطع الدجاج و نفركها بهاد الشرمولة مزيان هي و البصلة
( لو مكنتش مزروبة راه كنخليها تتخمر و تشرب النكهات مزيان باش كتزيد تبنان اللحم ديال الدجاج و لو كنت مزروبة فكنديرها الطيب نيشان)




بعد ميتشرب الدجاج الشرمولة كنستفو و نديرو يتشحر فالكوكوط مع البصلة




و بعدها كنضيف عليه قياس الماء فاش يطيب و نسد عليه حتى ينضج





بعد مكيطيب الدجاج كنعزل الدجاج عن المرقة






و كنخليه ينشف من المرقة




و كنوجد الخليط باش غنحمرو
و هو : نصف ملعقة سكر فانيلا
مع نصف ملعقة قرفة
مع 2 معالق زبدة



كنخلطهم مزيان




و كندهن بيهم كل قطع الدجاج من كل الجهات




و كندخلهم للفرن يتحمرو







و كنبدا فتحضير التخضيرة

هاد المرة خضرة بالبعويد طري و المشماش يابس و الڭرڭاع و اللوز محمر و مهرمش،
مملن تخضرو بالانناس طري او معلب او يابس او بالتفاح او البنان او الخوخ معلب او اي شي عندكم
انا مكانش عندي المعلب فقضيت بالطازج احسن

خذيت البعويد غسلتو و نقيتو مزيان



و قطعتو ترونشات و حيدت ليه الزريعة




و درتو فكسرونة





مع بودرة عصير الاناناس




و مع فنجان صغير ماء





و عملتو فوق عافية مهيلة




باش يتعسل و يتشرب نكهة الاناناس

و زينت المشماش اليابس بعد مغسلتو و نشفتو بالڭرڭاع





اما المرق للي بقى واقف و عاقد ديال الدجاج



فضفت ليه مقدار كاس صغير من اللوز المحمر و المهرمش
و نصف ملعقة سكر فانيلا و نصف ملعقة قرفة



و ملي تحمر لينا الدجاج
خذيتالطاجين فاش غنقدم درتو يسخن
و درت فيه المرق اولا
ثم ستفت فيه قطع الدجاج



و على كل قطعة حطيت دوارة من بعويد المعسل
و عليها قطعة من المشماش المزين بالڭرڭاع




و عاود رشيت على الكل لوز محمر و مهرمش

التقديم :




قدمتو بعد السلطة


























مع خبيزات القمح و الشعير ديال الدار



مرفق بعصير البنان و التفاح بالحليب و اللوز





و فالاخير طبق ديسير مشكل


























ملاحظة:


كلما تخمر الدجاج فالشرمولة كلما كان الذ
هذا ينطبق على كل اللحوم (دجاج ،لحم، سمك...)
فمن الافضل تحضرو اللحم قبل بليلة فالشرمولة
و تخليوها تتشرب التوابل فالثلاجة مع البصل
عاد تنصبوها او طيبوها فاليوم الموالي


غتلاحظو انني نصبتو بلا زيت
لان الدجاج مكيحتاجش الزيت بزاف حيت جلدتو كلها دهنيات ،
و ايضا حيت فالشرمولة درت السمن
و زدت الزبدة فالتحمير و هو كافي،
للإشارة الزبدة كذوب و كتبقى فطاوة التحمير يعني الدجاج كيجي ناشف ماشي عامر بليدام

اما بالنسبة للمذاق الحلو فممكن تستغناو عليه لو كنتو غتقدموه لاشخاص عاملين رجيم او مرضي سكري

يعني بدل مديروه معسل و محمر ديروه غير محمر
و ايضا درجة الحلاوة انتم تختاروها انا كنعملو حلو غير شوية
لو بغيتوه يجي حلو و معسل اكثر زيدو السكر او السكر الفاني



ان شاء الله يعجبكم هاد الطبق
وصدقوني للي ذاقوعندكم غيبغي يعرف الطريقة


و كنديرها حتى للحم و الحوت بنفس الطرقية غير كيتغيرو شوية العطرية
اضافة الى العطرية المعتادة (ملح ابزار خرقوم سكنجبير كامون قاعقلة بسيبيسة نويويرة )
للدجاج كنضيف عطرية الدجاج "مروزية"
و للحم كنضيف شوية المساخن
و للحوت كنضيف شوية من التوابل الاربعة

راه هادي من وصفاتي السرية هههههه
لكن حتى شي منخبيه عليكم الحبيبات






و نتمنى متبخلو عليا بدعواتكم الطيبة
لاني فأمس الحاجة ليها






اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتم في رعاية الكريم

أمنــار

أم ريـَّــان

وعليكم السلام ورحمة الله وبركاته